ބިންވެރިޔާ ސްކީމްގެ ދަށުން ގޯއްޗަށް އެދިފައިވާ ފަރާތްތަކުން އެކަމާއި ގުޅިގެން ގުޅުއްވުމުން، "އޯކޭ" އޭ ވިދާޅުވެ ޖަވާބު ދެއްވާ ކަމަށާ، އެހެން ނަމަވެސް، ގޯތި ދިނުމުގައި ކޮރަޕްޝަންގެ އެއްވެސް އަމަލެއް ނުހިނގާ ކަމަށް ޕްލޭނިންގ މިނިސްޓަރު މުހައްމަދު އަސްލަމް ވިދާޅުވެއްޖެއެވެ.
ސަރުކާރުން ގޯއްޗާއި ފްލެޓް ދިނުމަށްޓަކައި، ވަކި ފަރާތްތަކެއްގެ ލިސްޓެއް ހަދައި، އެ ފަރާތްތަކަށް ގޯތި ދިނުމަށް ނިންމާފައިވާ ކަމަށް ބައެއް މީޑިއާ ތަކުން ވަނީ ދާދިފަހުން ރިޕޯޓް ކޮށްފައެވެ.
އެކަން ފާހަގަކޮށް، ރައީސް އޮފީހުގައި ބިންވެރިޔާ ސްކީމްގެ ދަށުން ގޯތި ދޭ އުސޫލާއި ގުޅޭ ގޮތުން މައުލޫމާތު ދިނުމަށް ހައުސިންގ މިނިސްޓްރީ އިން ބޭއްވި ނޫސްވެރިންގެ ބައްދަލުވުމުގައި، ގޯތި ދިނުމުގައި ކޮރަޕްޝަންގެ އެއްވެސް އަމަލެއް ހިންގާފައިވާނެތޯ ނޫސްވެރިއެއް ވަނީ ސުވާލުކުރައްވާފައެވެ.
އެ ސުވާލަށް ޖަވާބު ދެއްވަމުން އަސްލަމް ވިދާޅުވީ، ބިންވެރިޔާ ސްކީމްގެ އެންމެ ބޮޑު މަގުސަދަކީ މާލޭގެ ރައްޔިތުންގެ ތެރެއިން ބިން ނެތް މީހުންނަށް ގޯތި ދިނުން ކަމަށެވެ. އެގޮތުން، އޭގެ ތެރޭގައި ހިމެނެނީ ބިމެއް ނެތް މީހުންނާއި، ބިމެއް ލިބެންވެސް ނެތް މީހުންގެ އިތުރުން ކުޑަ ކުޑަ ބިންކޮޅެއް ލިބިފައިވާ މީހުން ކަމަށް އަސްލަމް ވިދާޅުވި އެވެ.
އަދި އެނޫން، ޝަރުތު ހަމަ ނުވާ ފަރާތްތަކަށް ވަކި ލިސްޓެއް ހަދައިގެން ގޯތި ދީފައި ނުވާނެ ކަމަށާ، އެހެން ނަމަވެސް ގޯއްޗާއި ގުޅިގެން އެފަދަ ކަންކަމަށް އެދި ބައެއް ފަރާތްތަކުން މެސެޖު ކޮށްފައިވާ ކަމަށް އަސްލަމް ވިދާޅުވި އެވެ.
އެކި މީހުން، އެކި ކަންކަން، ލިސްޓު ހަދާ، ނޫން އެ ޒާތުގެ އެއްވެސް ކަމެއް ނުހިނގާ. ދެން މީސް މީހުން އަޅުގަނޑަށްވެސް މެސެޖު ކުރޭ. އަދި މިތާ ތިއްބެވި އެހެން ބޭފުޅުންނަށްވެސް މެސެޖު ކުރޭ. ކުޑަ ކުޑަ މުޖުތަމައު އެއް. އެންމެންވެސް އެންމެން ދަނޭ. އަޅުގަނޑުގެ ފޯނު ނަންބަރު ނޭނގޭ މީހެއްވެސް ދިވެހިރާއްޖޭގައި ނުވެސް އުޅޭނެ ކަންނޭނގެ. ފޯނު ކޮށްފައި ތިމަންނަގެ ކަންތައް ބަލާލަދޭއްޗޭ. އެހެން ބުނޭ މީހުން. ދެން އަޅުގަނޑު ހުންނާނެ ބުނެފައި. ނޯޓެޑް. އޯކޭ. ޔެސް އެކަހަލަ އެއްޗެހި ޖަހާފައި. އެއީ ދެން މެސެޖު ލިބުނީމާ ލިބުނުކަން އަންގާލަނީ. އެކަހަލަ ކަންތައް ވެފައި ހުންނާނެ ދެން ކޮމިޓީގައި ތިބި ބޭފުޅުންނަށްވެސް. އޭގެ އިތުރަށް ކަމެއް ހިނގާފައެއް ނޯންނާނެ. ލިސްޓެއް ހަދައި، ވަކި ބަޔަކަށް ބޭނުންވާ ގޮތަށް ވަކި ކަމެއް ކޮށްފައެއް ނޯންނާނެ.
ޕްލޭނިންގ މިނިސްޓަރު މުހައްމަދު އަސްލަމް
ބިންވެރިޔާ ސްކީމްގެ ދަށުން ގޯއްޗަށް ހުށައެޅި މީހުންގެ ތެރެއިން 19،857 މީހުން ގޯއްޗަށް ޝަރުތު ހަމަވާކަމަށް އަސްލަމް ވަނީ ވިދާޅުވެފައެވެ. އަދި އެ ހުރިހާ ފަރާތަކަށް ވެސް ގޯތި ދޭ ގޮތަށް ހަމަޖެހިފައިވާ ކަން ވެސް މިއަދުގެ ނޫސްވެރިންގެ ބައްދަލުވުމުގައި އޭނާ ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
