ބިންވެރިޔާ ޕްރޮގްރާމްގެ ދަށުން ގޯތި ހޯދަން އެދުނު ފަރާތްތަކުގެ ތެރެއިން، ޝަރުތު ހަމަވާ އެންމެނަށް ގޯތި ދިނުމަަށް ސަރުކާރުން ނިންމާފައިވާކަމަށާ، އެފަރާތްތަކަށް ގޯތި ދިނުމަށް، އަންނަ ޖުލައި މަހު ގުޅީފަޅު ހިއްކަން ފަށާނެ ކަމަށް ޕްލޭނިންގ މިނިސްޓަރު މުހައްމަދު އަސްލަމް ވިދާޅުވެއްޖެއެވެ. 

ބިންވެރިޔާ ސްކީމްގެ ދަށުން ގޯތި ދޭ އުސޫލާއި ގުޅޭ ގޮތުން މައުލޫމާތު ދިނުމަށް ހައުސިންގ މިނިސްޓްރީ އިން ބޭއްވި ނޫސްވެރިންގެ ބައްދަލުވުމުގައި، ވާހަކަދައްކަވަމުން އަސްލަމް ވިދާޅުވީ، ހުސްވި ހަފްތާގައި ގޯތީގެ ކަންތަކުގައި ރައީސް ސޯލިހު ކެބިނެޓު ބައްދަލުވުމެއް ބޭއްވި ކަމަށެވެ. އަދި އެ ބައްދަލުވުމުގައި މަޝްވަރާ ކުރެވުނު ގޮތަށް ރައީސް ސޯލިހު ނިންމެވީ ޕްރޮގްރާމަށް ކޮލިފައިވި ނުވަތަ ޝަރުތު ހަމަވާ އެންމެނަށް ވެސް ގޯތި ދޫކުރުމަށްކަމަށް އަސްލަމް ވިދާޅުވި އެވެ.

އެކަމާއި ގުޅިގެން، އެ ގޯތި ދޫކުރާނީ ކޮންތަނަކުންތޯ ނުސްވެރިއެއް ވަނީ ސުވާލު ކުރައްވާފައެވެ.

އެ ސުވާލަށް ޖަވާބު ދެއްވަމުން އަސްލަމް ވިދާޅުވީ ސިންގަލް އެޕްލިކެންޓްސް އަށްވުރެ ޖޮއިންޓް އެޕްލިކޭންޓްސް އަށް ވުމުން ލިބޭ ގޯތީގެ ބޮޑުމިން އިތުރުވާ ކަމަށާ، އަދި ޖޮއިންޓް އެޕްލިކޭންޓްސް އަށް އިސްކަމެއް ދީފައިވާނެ ކަމަށެވެ. އަދި ޝަރުތު ހަމަވާ 9000 އަށްވުރެ ގިނަ ފަރާތްތައް މިވަގުތު ތިބި އިރު އޭގެ ތެރެއިން ބައެއް ފަރާތްތަކަށް ޖޮއިންޓް އެޕްލިކޭންޓްސް ގެ ގޮތުގައި ވެވެން ހުރި ކަމަށާ، އެ ފަރާތްތަކަށް އެ ފުރުސަތު ދެއްވާނެ ކަމަށް އަސްލަމް ވިދާޅުވި އެވެ. އަދި އޭގެ ތެރެއިންވެސް ބާކީވާ، ޝަރުތު ހަމަވާ ފަރާތްތަކަށް، ބިން ހިއްކުމަށް ހަމަޖެހިފައިވާ ތަންތަނުން ބިން ދެވޭނެ ކަމަށް އަސްލަމް ވިދާޅުވި އެވެ. 

ނޫސްވެރިންގެ ބައްދަލުވުމައި އަސްލަމް ވިދާޅުވި ގޮތުގައި ސްކީމްގެ ދަށުން 15،164 ފޯމު ވަނީ ލިބިފަ އެވެ. އަދި ސިންގަލް އެޕްލިކަންޓާއި އެކި މީހުން ގުޅިގެން ޖުމްލަ 23،801 މީހުން ހިމެނޭ ގޮތަށް ފޯމު ހުށަހަޅާފައިވާކަމަށެވެ. އެގެ ތެރެއިން ޝަރުތު ހަމަވަނީ 12،794 ފޯމުކަމަށާއި، އޭގެ ތެރޭގައި ހިމެނެނީ 19،857 މީހުންކަމަށް އަސްލަމް ވިދާޅުވި އެވެ.

އެހެންކަމުން މިއަދު ގެޒެޓު ކުރާ ލިސްޓުގައި ހިމެނެނީ 10،314 މީހަކަށް ލިބޭ ގޯއްޗެވެ.