ބޯހިޔާވަހިކަން ކަށަވަރުކޮށްދިނުމަށް މި ސަރުކާރުން އަޅާ ފްލެޓުތައް ލިބޭ މީހުންގެ ލިސްޓު ހާމަކުރާނެ ތާރީޚެއް ޕްލޭނިން މިނިސްޓަރު މުޙައްމަދު އަސްލަމަށް ހާމަކޮށެއް ނުދެވުނެވެ. 

މި ސަރުކާރުން ބޯހިޔާވަހިކަން ކަށަވަރުކޮށްދިނުމަށް ދޫކުރާ ފްލެޓުތައް ލިބޭނެ ފަރާތްތަކުގެ ލިސްޓު މި ހަފްތާގައި އާންމު ކުރައްވާނެކަމަށް ޕްލޭނިން މިނިސްޓަރު ވަނީ މީގެ ކުރިން ވިދާޅުވެފަ އެވެ. 

ބިންވެރިޔާ ސްކީމްގެ ދަށުން ގޯތި ލިބޭ ފަރާތްތަކާއި ގުޅޭ މައުލޫމާތު ފޯރުކޮށްދިނުމަށް މިއަދު ޕްލޭނިން މިނިސްޓްރީން ރައީސް އޮފީހުގައި ބޭއްވި ޕްރެސް ކޮންފަރެންސްގައި ނޫސްވެރިން ވަނީ ފްލެޓު ލިސްޓު އާންމު ކުރާނެ ތާރީޚެއް ސާފުކޮށްދެއްވުމަށް މިނިސްޓަރު އަރިހުން އެދިވަޑައިގެންފަ އެވެ. 

އެގޮތުން މި ހަފްތާގައި ލިސްޓުތައް އާންމު ކުރައްވާނެކަމަށް ސަރުކާރުން މީގެެކުރިން ބުނެފައިވާއިރު، ސީދާ ތާރީޚެއް ސާފުކޮށްދެއްވުމަށް ނޫސްވެރިން ވަނީ ޕްލޭނިން މިނިސްޓަރު އަސްލަމް އަރިހުން އައްސަވާފަ އެވެ. 

އެހެން ނަމަވެސް މިއަދުގެ ނޫސްވެރިންގެ ބައްދަލުވުމުގައި ވެސް ފްލެޓު ލިސްޓު އާންމުކުރާނެ ތާރީހެއް މިނިސްޓަރު ވިދާޅެއް ނުވިއެވެ. މިނިސްޓަރު ވިދާޅުވީ ފްލެޓު ލިސްޓު ލިބޭ ފަރާތްތައް އެކުލަވާލުވުމުގެ މަސައްކަތް ވަރަށް ހަލުވި ސްޕީޑުގައި ކުރިއަށް ދާ ކަމަށެވެ. އަދި ދާދި އަވަހަށް އެ ލިސްޓު ވެސް އާންމު ކުރައްވާނެކަމަށް މިނިސްޓަރު ވިދާޅުވި އެވެ.

މިނިސްޓަރު އަސްލަމް އިތުރަށް ވިދާޅުވީ ފްލެޓު ލިބޭ ފަރާތްތައް އިއުލާނު ނުކޮށްގެން ވަރަށް ގިނަ ބަޔަކު ކަންބޮޑުވުން ފާޅުކުރަމުންދާ ކަމަށެވެ. އަދި ރައްޔިތުންގެ މަޖިލީހަށް އެމަނިކުފާނު ހާޒިރުކޮށް ވެސް ލިސްޓު އާންމު ކުރަނީ ކޮން ދުވަހަކުން ތޯ ސުވާލު ކުރައްވާފައިވާ ކަމަށެވެ. 

އެހެން ނަމަވެސް، އަވަސް އަރުވާލައިގެން ލިސްޓު އެކުލަވާލުމުގެ ކަންކަން ނުކުރައްވާނެ ކަމަށާއި، އެ މަސައްކަތް ކުރައްވަނީ އިންތިޒާމުތަކެއްގެ ތެރެއިން އެންމެ ހައްގު ފަރާތްތައް ހޮވައި، އެ ފަރާތްތަކަށް ފްލެޓުތައް ދިނުމަށްކަމަށް އަސްލަމް ވިދާޅުވި އެވެ. 

އަދި ލިސްޓު އެކުލަވާލެވުނުހާ އަވަހަށް ހާމަކުރައްވާނެކަމަށް ވެސް ވިދާޅުވި އެވެ.