މި ސަރުކާރުން މާލޭގެ ރައްޔިތުންނަށް ހިލޭ ބަހާ ގޯތި ލިބުނު ފަރާތްތަކުގެ ލިސްޓުގައި، އެމްޑީޕީން ވަކިވެ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ވެރިކަން ބަދަލުކުރުމަށް މަސައްކަތް ކުރަމުން އަންނަ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހިމެނިވަޑައިގަތުމާއި ގުޅިގެން އަމާޒުވަމުން އަންނަ ފާޑުކިޔުންތަކަށް އެބޭފުޅާ ރައްދުދެއްވައިފި އެވެ. 

ހަސަން ލަތީފު ހިމެނިވަޑައިގަންނަވާހެން އެމްޑީޕީން ނިކުމެ ވަޑައިގެންނެވި ރައްޔިތުންގެ މަޖިލީހުގެ ބައެއް މެމްބަރުންނާއި، އެމްޑީޕީއަށް ނިސްބަތްވެ ވަޑައިގަންނަވާ ބައެއް ކައުންސިލަރުންނަށް ވެސް ވަނީ ސަރުކާރުން ހިލޭ ބަހާ ގޯތި ލިބިވަޑައިގެންފަ އެވެ. 

އެކަމާއި ގުޅިގެން އެމްޑީޕީގައި ތިއްބެވި ބައެއް ފަރާތްތަކުގެ ފާޑުކިޔުންތައް ވަނީ އަމާޒުވެފައެވެ. 

Advertisement

އެގޮތުން ސަރުކާރުގެ ބިންވެރިޔާ ޕްރޮގްރާމުގައި ބައިވެރި ނުވުމަށް އެމްޑީޕީން ވަކިވެ "ދި ޑިމޮކްރެޓްސް" ގެ ނަމުގައި ސިޔާސީ ޕާޓީއެއް އުފެއްދުމަށް މަސައްކަތް ކުރަމުންދާ ބައެއް މެމްބަރުން ބުނެ އެ ސްކީމުގައި ރައްޔިތުން ބައިވެރި ނުވުމަށް ބާރުއަޅާފައިވާކަމަށް އެމްޑީޕީގެ މެމްބަރުން ގެންދަވަނީ ތުހުމަތު ކުރައްވަމުންނެވެ. 

އެހެން ނަމަވެސް އެ ތުހުމަތުތައް ހަސަން ލަތީފު ވަނީ ދޮގުކުރައްވާ އޭނާ އަށް އަމާޒުވަމުން އަންނަ ފާޑުކިޔުންތަކަށް ރައްދުދެއްވާފަ އެވެ. 

އެގޮތުން ހަސަން ލަތީފު ވިދާޅުވީ، ބިންވެރިޔާ ސްކީމުގައި ބައިވެރިނުވުމަށް އެއްވެސް މީހެއްގެ ގާތުގައި ވިދާޅުވެފައި ނޯންނާނެ ކަމަށެވެ. އަދި އެ ސްކީމުގައި ބައިވެރިވުމަށް އޭނާ ވަރަށް ބޮޑަށް ބާރުއަޅުއްވާފައި ވާނެ ކަމަށެވެ. 

ސަރުކާރުން ދޭ ގޯތި ލިބުނު މީހުންގެ ލިސްޓުގައި އޭނާގެ ނަން އޮވެގެން ބަޔަކު މަލާމާތް ކުރި ނަމަވެސް، ރައީސް ޞާލިހަށް ސަނާކިޔާ، ގޯތި ނުވަތަ ފްލެޓު ހޯދުމުގެ ބޭނުމުގައި ރައީސް ޞާލިހުގެ ފައިބުޑަށް ވެއްޓިވަޑައިނުގަންނަވާނެ ކަމަށް ހަސަން ލަތީފު ވިދާޅުވި އެވެ. 

ހަސަން ލަތީފު އިތުރަށް ވިދާޅުވީ އޭނާއަށް ފާޑުކިޔުން އަމާޒުކޮށް، ދޮގު ތުހުމަތުތައް ކުރަމުންދާ ނަޒީހާ އަކީ ސަރުކާރުގެ ކުންފުނި މިފްކޯއިން މިހާރުވެސް 50000 ރުފިޔާގެ މުސާރަ ނަންގަވަމުންދާ ފަރާތެއް ކަމަށެވެ. 

ދައުލަތުން ބޮޑެތި މަންފާތައް ލިބެމުންދާތީ ސަރުކާރުގެ ދިފާއުގައި ކިތަންމެ މަލާމާތެއް ކުރެއްވި ނަމަވެސް، ރައީސް ޞާލިހަށް ދެވަނަ ދައުރެއް ހޯދައިދޭން ވަކާލާތު ނުކުރައްވާނެކަމަށް ހަސަން ލަތީފު ވަނީ ވިދާޅުވެފަ އެވެ. 

ހަސަން ލަތީފުގެ އިތުރުން ވެސް ދި ޑިމޮކްރެޓްސްއަށް ނިސްބަތްވާ ބޭފުޅުންގެ ތެރެއިން ގޯތި ލިބުނު ފަރާތްތައް ގެންދަވަނީ ރައީސް ޞާލިހަށް ފާޑުވިދާޅުވަމުން ނެވެ.

އަދި ގޯތި ދިނަސް އެމަނިކުފާނަށް ތާއީދު ނުކުރައްވާނެ ކަމަށާއި، މި ސަރުކާރުން ހިންގާ ޖަރީމާތަކުގައި މަތިޖެހުމަށް މަސައްކަތްޕުޅު ނުކުރައްވާނެކަމަށް އެ މެމްބަރުން ގެންދަވަނީ ވިދާޅުވަމުން ނެވެ.