އަޟުހާ ޢީދު ޗުއްޓީއަށް ފުވައްމުލަކު ސިޓީއަށް ވަޑައިގެންނެވުމުން ފެނިލެއްވި މަންޒަރުން، ޔޫތު މިނިސްޓަރު އަހުމަދު މަހްލޫފް އަންތަރީސް ވެވަޑައިގެންފިއެވެ.
މަހުލޫފަށް ފުވައްމުލަކު ސިޓީގައި ހިނގަމުންދާ މަޝްރޫއު ތަކާއި، ނިމިފައިވާ މަޝްރުޢުތައް ފެނިވަޑައިގެން އެކަމާއި އެކަމާއި ހައިރާންވެ ވަޑައިގެން ކުރެއްވި ޓްވީޓެއްގައި ވިދާޅުވީ، އީދު ޗުއްޓީއަށް ފުވައްމުލަކަށް އައިސް ބަލާލިއިރު 'ކަމަކުދާކަށްނެތް' ކަމަށެވެ.
އެއަށްފަހު އޭނާ އެފަދައިން އެ ވިދާޅުވި ސަބަބު ހާމަކުރައްވަމުން، މަހްލޫފް ވަނީ، ފުވައްމުލަކު ބޮޑު ފުޓުބޯޅަ ދަނޑު ނިމިފައިވާ އިރު, ކައުންސިލް އާއި ހަވާލުކުރި ދެވަނަ ދަނޑު ވީއެންމެ އަވަހަކަށް ނިންމުމުގެ މަސައްކަތް މިނިސްޓްރީގެ ޓީމުން ކުރާ ކަމަށް އޭނާ ވިދާޅުވި އެވެ.
"3 ކޯޓުގެ ބެޑްމިންޓަން ސެންޓަރު ނިމިފަ. ޓީޓީ ސެންޓަރު ނިމިފަ. 2 ފުޓްސަލް ދަނޑު ނިމިފަ. އިތުރު ބައެއް ދަނޑުތައް ހެދުމަށް މަޝްވަރާ ކުރިއަށް. ވޮލީ ކޯޓު ނިމިފަ. ކުޑަކުދިންގެ ޕާކު ނިމިފަ. ސަރފް ޝެކް ނިމިފަ. އައުޓްޑޯ ޖިމް ނިމިފަ." ނިމިފައި ހުރި ކަންކަމުގެ ލިސްޓު ހާމަކުރައްވަމުން މަހްލޫފް ވިދާޅުވި އެވެ.
މީގެ އިތުރުން މަހްލޫފް ވިދާޅުވީ، ފުވައްމުލަކު ގައި ސްކޭޓް ޕާކް އެޅުމަށް ކޮންޓްރެކްޓުގައި ސޮއިކޮށްފައިވާ ކަމަށާ، އީދު ނިމުމުން އޭގެ މަސައްކަތް ފަށާނެކަމަށެވެ. އަދި ސިންތެޓިކް ޓްރެކްގެ ބިޑް ނެގުން 16 ޖުލައިގައި ބާއްވާއިރު، ދެން މާލަސްތަކެއްނުވެ އޭގެ އަމަލީ މަސައްކަތް ފެށޭނެ ކަމަށް އޭނާ ވިދާޅުވި އެވެ. ހަމަ އެހެންމެ، ފުވައްމުލަކު އިންޑޯ ސްޕޯޓްސް ކޮމްޕްލެކްސް ޓެންޑަރިނގް އަށް ފިނޭންސް އަށް ފޮނުވިފައިވާ ކަންވެސް އޭނާ ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
