ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ވެރިކަމުގައި މުންކަރާތްތައް އާންމުވެގެން ދިޔަ ދިއުމުގެ ޒިންމާ ސަރުކާރުގެ ކޯލިޝަން ޕާޓުނަރު އަދާލަތު ޕާޓީން ނަގަންޖެހޭނެ ކަމަށް ކުރީގެ ނައިބު ރައީސް ޑރ މުޙައްމަދު ޖަމީލު އަހުމަދު ވިދާޅުވެއްޖެ އެވެ. 

ޑރ ޖަމީލު މިފަދައިން ވިދާޅުވެފައިވަނީ ރާއްޖޭގެ އިޖްތިމާއީ ޙާލަތާއި ގުޅޭގޮތުން ކަންބޮޑުވުން ފާޅުކުރައްވާ ކުރެއްވި ޓްވީޓެއްގަ އެވެ. 

އެގޮތުން ޑރ ޖަމީލު ވިދާޅުވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ވެރިކަމުގައި ރާއްޖޭގައި އިސްލާމްދީނާއި ޚިލާފު ކަންކަންކުރުން ގިނަވެފައިވާ ކަމަށެވެ. އަދި އިސްލާމްދީނުގައި އުފާ ފާޅުކުރުމާއި، އެކި މުނާސަބާ ފާހަގަކުރުމަށް ގެންގުޅޭ އުސޫލުތައް އޮޅޭގޮތަށް ހިންގާ ހަރަކާތްތައް ވެސް އިތުރުވެފައިވާ ކަމަށެވެ. 

އިސްލާމްދީނާއި ބީރައްޓެހި ކަންކަން އާދަޔާ ޚިލާފަށް މި ވެރިކަމުގައި އާންމުވެފައި ވީ ނަމަވެސް، ދީން ކުރިއެރުވުމަށްޓަކައި އުފައްދާފައިވާ އަދާލަތު ޕާޓީ ސަރުކާރުގެ ޕާޓުނަރެއްގެ ގޮތުގައި އޮވެ މަސައްކަތްކުރަނީ އެކަންކަމުގައި މަތިޖަހާ އޮއްބާލުމަށް ކަމަށް ޑރ ޖަމީލު ވިދާޅުވި އެވެ. 

އެއާއެކު އެމަނިކުފާނު ވިދާޅުވީ މި ވެރިކަމުގައި މުންކަރާތްތައް އާންމުވެގެން ދިޔަ ދިއުމުގެ ޒިންމާ އަދާލަތު ޕާޓީން ފުރިހަމައަށް ނަގަން ޖެހޭނެ ކަމަށެވެ. 

ޑރ ޖަމީލު މިފަދައިން ވިދާޅުވެފައިވާއިރު، މިއަހަރުގެ ބޮޑު ޢީދު ފާހަގަކުރުމުގެ ނަމުގައި ބައެއް ރަށްރަށުގައި ބޭއްވި ސްޓޭޖު ޝޯތަކުގައި ނިވާކަން ކުޑަކޮށް ހެދުން އަޅައިގެން އަންހެނުން ނަށާފައިވާކަން ފާހަގަކޮށް ބައެއް ދީނީ އިލްމުވެރިންގެ ފާޑުކިޔުން ވެސް ވަނީ އަމާޒުވެފަ އެވެ. 

ޢީދަކީ މުންކަރާތްތަކަށް ހުޅުވާލެވޭ ދޮރަކަށް ނުހެދުމަށް ޢީދު ޚުތުބާގައިވެސް ނަސޭހަތްތެރިވެފައިވާއިރު، އިޖްތިމާއީ މިންގަނޑުތަކާއި ޚިލާފަށް ހެދުން އަޅައިގެން ޢީދު ޝޯތައް ދިނުމާއި ދެ ޖިންސުގެ މީހުން މަސްހުނިވެގެން ބާއްވާ ނެށުންތަކާއި ހަފްލާތައް ހުއްޓުވާ، ޢީދު ފާހަގަކުރުމަށް ހިންގާ ހަރަކާތްތަކަކީ ވަކި ހުދޫދެއްގެ ތެރެއިން ކުރިއަށް ގެންދާ ހަރަކާތްތަކަކަށް ހެދުމަށް ސަރުކާރުން ބާރުއަޅަން ޖެހޭނެކަމަށް ބައެއް ދީނީ އިލްމުވެރިން ވަނީ ވިދާޅުވެފަ އެވެ.