ގިނަ ބައެއްގެ އެދުމާއި އެކު އަޟްޙާ ޢީދާއި ގުޅުވައިގެން މާލޭގެ އެކި ހިސާބުތަކުގައި ދިއްލި ބޮކިތަކާއި ގިޑިގެތައް ނެގުން ލަސްކޮށްފައިވާކަމަށް މާލެ ސިޓީ ކައުންސިލްގެ މޭޔަރ ޑރ މުޙައްމަދު މުޢިއްޒު ވިދާޅުވެއްޖެއެވެ.
މުޢިއްޒު ކުރައްވާފައިވާ ޓްވީޓެއްގައި ވިދާޅުވެފައިވަނީ މި ޢީދު ޗުއްޓީގައި އެކި ސަބަބުތަކާ ހުރެ ރާއްޖެއިން ބޭރަށް ދިޔަ ގިނަ ބަޔަކު ދަނީ އީދު ލައިޓްތައް ބަލާލުމުގެ ފުރުސަތު ލިބޭތޯ ސުވާލު ކުރަމުންކަމަށެވެ.
އަދި މާލެސިޓީ ކައުންސިލުން އެންމެ ފުރަތަމަ ނިންމީ ޖުލައި 2 އިން ފެށިގެން އެ ބޮކިތަކާއި ގިޑިގެތައް ނެގުމަށް ކަމަށް މޭޔަރ ވިދާޅުވިއެވެ.އެހެންނަމަވެސް ގިނަ ބަޔަކު މި މަންޒަރުތައް ބެލުމަށް ޝައުގުވެރިކަން ފާޅުކުރުމާއި ގުޅިގެން ކުލަބޮކިތަކާއި ގިޑިގެތައް ނެގުން އަންނަ ހަފްތާގެ ބަންދު ދެ ދުވަސް ކަމުގައިވާ ޖުލައި 7 އަދި ޖުލައި 8 ކަށް ފަސްކުރަން ނިންމާފައިވާ ކަމަށް މޭޔަރ ވިދާޅުވިއެވެ.
ސިޓީ ކައުންސިލުން އަޟްޙާ ޢީދަށް މަރުޙަބާ ކިޔުމުގެ ގޮތުން ގިޑިގެ ތަކާއި ކުލަބޮކިތަކުން މާލެ އާއި ވިލިމާލެ ޒީނަތްތެރިކޮށް ދިއްލާލަދެއްވީ، ޖުމްހޫރީ މައިދާނުގައި އެކަމަށްޓަކާ ބޭއްވި ޙަފްލާއެއްގައި މާލެސިޓީގެ މޭޔަރ ޑރ. މުޙައްމަދު މުޢިއްޒުއެވެ.
ރަމަޟާން މަހާއި ދެ ޢީދު ދެދުވަހާއި ގުޅުވައިގެން މިގޮތަށް ރަށުތެރެ ޒީނަތްތެރި ކުރުމަކީ ޢަރަބި އިސްލާމީ ޤައުމުތަކުގައި ޒަމާނުއްސުރެ ކޮށް އުޅޭ ކަމެކެވެ.
Advertisement
This content is created and paid for by advertisers and does not involve Voice Journalists
