ދަ ޑިމޮކްރެޓްސްގެ ޤައުމީ ޖަލްސާ މި މަހު 5 ގައި ބާއްވާނެކަން އެ ޕާޓީން އިއުލާނުކޮށްފި އެވެ. 

އިލެކްޝަންސް ކޮމިޝަންގެ ނައިބު ރައީސް އިސްމާއިލް ހަބީބު ވިދާޅުވީ ދަ ޑިމޮކްރެޓްސްގެ ނަމުގައި ސިޔާސީ ޕާޓީއެއް އުފެއްދުމަށް، ޖަލްސާ ބޭއްވުމުގެ ހުއްދަ، އެ ޕާޓީ އުފެއްދުމުގެ ހުއްދަ އަށް އެދިވަޑައިގަތް، ހ. ސީވީޑް އަލްއުސްތާޛް ޙަސަން ލަތީފަށް ދެއްވާފައިވާނެ ކަމަށެވެ. 

ދަ ޑިމޮކްރެޓްސް ޕާޓީ އުފައްދާ ޕާޓީޣެ ޖަލްސާ ބޭއްވުމުގެ ހުއްދަ އިލެކްޝަންސް ކޮމިޝަނުން ދީފައިވާކަން ހާމަކުރުމަށް އެ ޕާޓީގެ ފަރާތުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވީ ދަ ޑިމޮކްރެޓްސްގެ ގައުމީ ޖަލްސާ ޖުލައިމަހުގެ 5ވަނަ ދުވަހުގެ ރޭ (ބުދަ ދުވަހުގެ ރޭ) 8:30 ގައި ބޭއްވުމަށް ނިންމާފައިވާ ކަމަށެވެ. 

ޖަލްސާ އޮންނާނީ ގިޔާސުއްދީން ސުކޫލުގައި ކަމަށް ހަސަން ލަތީފު ވިދާޅުވި އެވެ. 

އެ ޖަލްސާ ބޭއްވުމަށް އިދާރީ ގޮތުން ކުރަން ޖެހޭ ކަންކަން މިހާރު ކުރެވެމުންދާ ކަމަށާއި، ޖަލްސާ އޮންނާނެ ކަން މިހާރު ޕާޓީގެ ފަރާތުން އިލެކްޝަންސް ކޮމިޝަނަށް ވެސް އަންގާފައިވާނެ ކަމަށް ހަސަން ލަތީފު ވިދާޅިވި އެވެ. 

ހަސަން ލަތީފުވަނީ 5ވަނަ ދުވަހުގެ ރޭ ދަ ޑިމޮކްރެޓްސް އިން ބާއްވާ ޤައުމީ ޖަލްސާ ކަވަރުކޮށްދިނުމަށް ހުރިހާ މީޑިއާތަކަށް ވެސް ދައުވަތު އަރުވާފަ އެވެ. 

ދަ ޑިމޮކްރެޓްސްއަކީ ސަރުކާރު ހިންގާ މައި ޕާޓީ އެމްޑީޕީގައި ތިބި ރައީސް މުޙައްމަދު ނަޝީދަށް ތާއީދުކުރައްވާ މެމްބަރުންތަކެއް އެ ޕާޓީން ވަކިވެވަޑައިގަތުމަށްފަހު އުފައްދާފައިވާ ސިޔާސީ ޕާޓީއެކެވެ. 

ދަ ޑިމޮކްރެޓްސްއިން މަސއްކަތް ކުރާނީ ވާދަވެރި ސިޔާސީ ޕާޓީއެއްގެ ގޮތުގައި ސަރުކާރު ޖަވާބުދާރީ ކުރުވުމަށްކަމަށް އެ ޕާޓީން ވަނީ ބުނެފައެވެ. 

ކުރިއަށް އޮތް ރިޔާސީ އިންތިޚާބުގައި ވެސް އެ ޕާޓީން ވާދަކުރާނެ ކަމަށާއި، ސަރުކާރު ބަދަލުކުރުމަށް ގުޅެން ޖެހުނު ކޮންމެ ބަޔަކާއި އެކު ގުޅިގެން މަސައްކަތް ކުރާނެކަމަށް ދި ޑިމޮކްރެޓްސްއިން ވަނީ ބުނެފަ އެވެ.