ސްވިޑެންގައި އަނެއްކާވެސް މުސްހަފު އެންދުމުން ޖުމްހޫރީ ޕާޓީގެ ލީޑަރު އަދި ރައްޔިތުން މަޖިލީހުގެ މާމިގިލި ދާއިރާގެ މެމްބަރު ޤާސިމް އިބްރާހިމް، ކަންބޮޑުވުން ފާޅުކޮށް މި އަމަލު ހަރުކަށި އިބާރާތުން ކުށްވެރި ކޮށްފިއެވެ.

ދުނިޔޭގެ އެންމެހާ މުސްލިމުން އަޟްހާ ޢީދުގެ ފުރަތަމަ ދުވަހުގެ މުނާސަބާތް ފާހަގަކުރިއިރު ސްވިޑެންގެ ސްޓޮކްހޯމްގައި ހުރި މިސްްކިތެއް ކުރިމަތީގައި މޮމިކާ ނަމަކަށް ކިޔުނު މީހަކު ވަނީ ކީރިތި ޤުރުއާން އަންދާލާފައެވެ.

މިއަމަލު ކުށްވެރިކުރައްވާ ޤާސިމް ކުރެއްވި ޓްވީޓުގައި ވިދާޅުވީ އިސްލާމްދީނާއި ދީނުގެ ތަހައްމަލުކުރުމާ ދެކޮޅަށް ހިންގާ މިދަފަ އަމަލުތައް ތަކުރާރު ވަމުންދާތަން ފެނުމަކީ ވަރަށް ބޮޑަށް ކަންބޮޑުވާ ކަމެއް ކަމަށެވެ.

އެގޮތުން ޤާސިމް ވަނީ މިއަހަރުގެ ޖެނުއަރީ މަހު ސްވިޑެންގެ ފާ-ރައިޓް ޕާޓީގެ ހަރުކަށި ލީޑަރަކު ކަމުގައިވާ ރަސްމުސް ޕަލުޑާން އިސްވެ ހުރެ މުސްހަފު އެންދި ހާދިސާއަށް އަލިއަލުވާލާފައެވެ.

އަދި މިފަދަ އަމަލުތަކަކީ ބައިނަލްއަގްވާމީ ދުނިޔޭގައި ދަމަހައްޓަންޖެހޭ އިހްތިރާމާއި ހަމަޖެހުމާއި މުޅިން ޚިލާފު އަމަލުތަކެއް ކަމަށް ޤާސިމް ވިދާޅުވިއެވެ.

މިއާއިއެކު އެހެން މީހުންނާއި ދޭތެރޭ މިފަދަ ރުޅިވެރި ސުލޫކެއް ގެންގުޅުމަށް، ކަންކަމުގައި ހިޔާލުފާޅުކުރުމުގެ މިނިވަންކަން، ބަހަނާއެއްގެ ގޮތުގައި ބޭނުންކޮށްގެން ނުވާނެ ކަމަށް ވެސް ޤާސިމް ވިދާޅުވިއެވެ.

އަދި މިއަމަލު ކުށްވެރި ކުރުމުގައި ޖުމްހޫރީ ޕާޓީގެ މެމްބަރުންވެސް ޤާސިމްއާއިއެކު މިކަމާއި ދެކޮޅަށް ތެދުވެ ތިބި ކަމަށް އޭނާ ވަނީ ފާހަގަކުރައްވާފައެވެ.