އެލިއާއިން ލޯންޗުތަކުގެ ކެޕްޓަނުންނަށް އަމާޒުކޮށްގެން 2014 ވަނަ އަހަރުން ފެށިގެން ބާއްވަމުންދާ "ބޯޓް އޮޕަރޭޓާސް ޓްރެއިނިންގް ޕްރޮގްރާމް" ކޮވިޑަށް މެދުކެނޑުމަށްފަހު އަނެއްކާވެސް ފަށައިފިއެވެ.

މިކަމާއި ގުޅިގެން އެލިއާއިން ނެރެފައިވާ ބަޔާނުގައި ބުނެފައިވަނީ މި ޓްރެއިނިންގް އަކީ އެލިއާ އާއި މޯލްޑިވްސް އިސްޓިޓިއުޓް އޮފް ޓެކްނޮލޮޖީ (އެމްއައިޓީ) ގުޅިގެން ކޮންމެ އަހަރަކުވެސް ބާއްވަމުން ގެންދާ ޓްރެއިނިންގް ޕްރޮގްރާމެއް ކަމަށެވެ.

އަދި މިއީ ކޮވިޑްގެ ސަބަބުން މެދުކެނޑުމަށްފަހު އިންތިޒާމްކުރެވޭ ފުރަތަމަ ޓްރެއިނިންގް ޕްރޮގްރާމް ކަމަށެވެ.

Advertisement

އެގޮތުން މިފަހަރުގެ ޕްރޮގްރާމަކީ މި މަހުގެ 4 ން 6 އަށް ޖުމްލަ 50 ބައިވެރިންނާއިއެކު ކުރިއަށް ގެންދިޔުމަށް ހަމަ ޖެހިފައިވާ ޕްރޮގްރާމެއްކަމަށް އެލިއާއިން މައުލޫމާތު ދީފައިވެއެވެ.

މީގެ ތެރޭގައި ތަފާތު ރިސޯޓުތަކާއި، ކަނޑު އުޅަނދުގެ ދަތުރުފަތުރުގެ ޚިދުމަތްދޭ ކުންފުނިތަކުގެ އިތުރުން ސަރުކާރުގެ ބައެއް މުއައްސަސާތައްވެސް ހިިމެނެއެވެ.

މި ޓްރެއިނިންގްގެ މައިގަނޑު މަގުސަދަކީ ކަނޑު އުޅަނދުފަހަރުގެ ކެޕްޓަނުން ހޭލުންތެރިކޮށް، ކަނޑު އުޅަނދުފަހަރުގެ ސަލާމަތާއި ރައްކާތެރިކަމާބެހޭ ފަންނީ މައުލޫމާތު ފޯރުކޮށްދިނުން ކަމަށް އެލިއާ އިން ވަނީ ބުނެފައެވެ.

އަދި ސެޝަންތަކަކަށް ބަހާލެވިގެން ބާއްވާ މި ޕްރޮގްރާމްގައި ކަނޑުމަތީގެ ޕްރޮފެޝަނަލިޒަމަށް ފޯކަސް ކޮށްގެން ކުރިއަށްގެންދާއިރު އައުޓްބޯޑް އިންޖީނު އެޅި ސްޕީޑްބޯޓުތަކުގައި އިތުބާރާއިއެކު ދަތުރުކުރުމަށް ބޭނުންވާ ތިއަރީއާއި ހުނަރުތައް ހިމެނޭ ހާއްސަ ސެޝަންތަކެއް މީގެ ތެރޭގައި ހިމެނޭ ކަމަށް އެލިއާ އިން މައުލޫމާތު ދީފައިވެއެވެ.

މީގެ އިތުރުން ސްޕީޑްބޯޓަށް ޚާއްސަ މެނިއުވަރ ކުރުމުގެ އުކުޅުތަކާއި، ނެވިގޭޝަން އަދި ޗާޓް ރީޑިންގ އާއި ސޭފްޓީ ޕްރޮޓޮކޯލްތަކާއި ކުއްލި ހާލަތުގައި އަމަލުކުރާނެ ގޮތްތަކުގެ އިތުރަށް ފަސްޓް އެއިޑް، ފަޔަރ ސޭފްޓީ އަދި އައުޓްބޯޑް އިންޖީނު ބެލެހެއްޓުމާއި، މައްސަލަ ހައްލުކުރުމުގެ ސެޝަންތަކެއްވެސް ހިމެނޭ ކަމަށް އެލިއާ އިން މައުލޫމާތު ދެއެވެ.

އެލިއާއިން ވަނީ މުޖްތަމައަށް ބޭނުންތެރި މިފަދަ ތަފާތު ޕްރޮގްރާމްތައް އެ ކުންފުނިން ހިންގަމުންދާކަން ފާހަގަކޮށް ކަނޑުމަތީގެ ސަލާމާތާއި ޕްރޮފެޝަނަލިޒަމް އަދި އަމަލީ ތަމްރީނުތައް ހިމަނައިގެން ސިނާއަތުގެ މިންގަނޑުތަކަށް ފެތޭ ގޮތަށް، އެލިއާއިން ފަރުމާކޮށްފައިވާ މި ޕްރޮގްރަމަށް ރިސޯޓުތަކާއި، ކަނޑުއުޅަނދުގެ ދަތުރުފަތުރުގެ ޚިދުމަތްދޭ ކުންފުނިތަކުގެ އިތުރުން ސަރުކާރުގެ މުއައްސަސާތަކުން ދެއްވާ ތަރުހީބަށް ޝުކުރު ދަންނަވާފައެވެ.