އިންދިރާގާނދީ މެމޯރިއަލް ހޮސްޕިޓަލް، އައި.ޖީ.އެމް.އެޗްއަށް 22 ޑޮކްޓަރުން ނުވަތަ މެޑިކަލް އޮފިސަރުންނާއި 26 ރެޖިސްޓަރޑް ނަރުހުން ހޯދުމަށް އިޢުލާންކޮށްފިއެވެ.

މިކަމާގުޅިގެން އައި.ޖީ.އެމް.އެޗް އިން ކުރި އިޢުލާންގައި ދެ ރޭންކަކުން މެޑިކަލް އޮފިސަރުންނާއި ނަރުހުން ހޯދުމަށް އިޢުލާންކޮށްފައިވެއެވެ.

އެގޮތުން މެޑިކަލް އޮފިސަރުންގެ ވަޒީފާއަށް ހޯދާ މީހުންގެ އެންމެ އަަސާސީ ޝަރުތަކީ މޯލްޑިވްސް މެޑިކަލް އެންޑް ޑެންޓަލް ކައުންސިލް ގަބޫލްކުރާ ބޭސިކް މެޑިކަލް ޑިގްރީއެއް ހާސިލްކޮށް މޯލްޑިވްސް މެޑިކަލް އެންޑް ޑެންޓަލް ކައުންސިލް ގަބޫލްކުރާ މެޑިކަލް އިންސްޓިޓިއުޓެއްގައި އިންޓަރންޝިޕް ފުރިހަމަކޮށްފައިވުމެވެ. އެއީ ރޭންކް-7 ގައި ހިމެނޭ ވަޒީފާ އެކެވެ.

މިރޭންކްގެ ޑޮކްޓަރަކަށް އަސާސީ މުސާރައިގެ ގޮތުގައި -/18129 ރުފިޔާ އާއި މަގާމުގެ އެލަވަންސްގެ ގޮތުގައި -/10382 ރުފިޔާ އަދި މަސައްކަތައް ހާޒިރުވާ ކޮންމެ ދުވަހަކު -/281 ރުފިޔާ ލިބޭނެ ކަމަށް އިއުލާނުގައި ވެއެވެ. އެހެންކަމުން ދުވާލަކު 24 ދުވަހު ވަޒީފާ އަށް ނިކުންނަ ޑޮކްޓަރެއްގެ މުސާރައަށް ޖުމްލަ -/35255 ރުފިޔާ ލިބޭނެއެވެ.

މީގެ އިތުރުން، ރޭންކް-8 ގައި ހިމެނޭ މޯލްޑިވްސް މެޑިކަލް އެންޑް ޑެންޓަލް ކައުންސިލް ގަބޫލްކުރާ ބޭސިކް މެޑިކަލް ޑިގްރީއެއް ހާސިލްކޮށް، މޯލްޑިވްސް މެޑިކަލް އެންޑް ޑެންޓަލް ކައުންސިލް ގަބޫލްކުރާ މެޑިކަލް އިންސްޓިޓިއުޓެއްގައި އިންޓަރންޝިޕް ފުރިހަމަކޮށްފައިވުމުގެ އިތުރުން މަގާމުގެ މަސައްކަތުގެ ދާއިރާއެއްގައި 4 އަހަރު ދުވަހުގެ މަސައްކަތުގެ ތަޖުރިބާ ލިބިފައިވާ ޑޮކްޓަރުންނަށް، އަސާސީ މުސާރައިގެ ގޮތުގައި -/20004 ރުފިޔާ އާއި މަގާމުގެ އެލަވަންސްގެ ގޮތުގައި -/11456 ރުފިޔާ އަދި މަސައްކަތައް ހާޒިރުވާ ކޮންމެ ދުވަހަކު -/310 ރުފިޔާ ލިބޭނެ ކަމަށް އިއުލާނުގައި ވެއެވެ. އެހެންކަމުން ދުވާލަކު 24 ދުވަހު ވަޒީފާ އަށް ނިކުންނަ ޑޮކްޓަރެއްގެ މުސާރައަށް ޖުމްލަ -/38900 ރުފިޔާ ލިބޭނެއެވެ.

ރެޖިސްޓަރޑް ނަރުހުންގެ ގޮތުގައި މުވައްޒަފުން ހޯދުމަށް ވެސް 2 ރޭންކަކުން ވަނީ އިޢުލާންކޮށްފައެވެ. އެގޮތުން ޕަބްލިކް ސަރވިސް ރޭންކުގެ 5 ގެ ނަރުހުންގެ ހުންނަންޖެހޭ އަސާސީ ޝަރުތުތަކަކީ މޯލްޑިވްސް ނަރސިންގ އެންޑް މިޑްވައިފްރީ ކައުންސިލް ޤަބޫލުކުރާ ނަރސިންގ ދާއިރާއަކުން ޤައުމީ ސަނަތުތަކުގެ އޮނިގަނޑު ލެވެލް 5 ނުވަތަ 6 ގެ ސަނަދެއް ޙާޞިލުކޮށްފައިވުމެވެ.

އަދި ރޭންކް 7 ގެ ނަރުހުންގެ އަސާސީ ޝަރުތަކީ މޯލްޑިވްސް ނަރސިންގ އެންޑް މިޑްވައިފްރީ ކައުންސިލް ޤަބޫލުކުރާ ނަރސިންގ ދާއިރާއަކުން ޤައުމީ ސަނަތުތަކުގެ އޮނިގަނޑު ލެވެލް 7 ނުވަތަ 8 ގެ ސަނަދެއް ޙާޞިލުކޮށްފައިވުމެވެ.

ރޭންކް 5 ގެ ނަރުހަކަށް އަސާސީ މުސާރައިގެ ގޮތުގައި 11428 ރުފިޔާ، މަޤާމުގެ އެލަވަންސްގެގޮތުގައި 5333 ރުފިޔާ އަދި މަސައްކަތަށް ނިކުންނަށް ކޮންމެ ދުވަހަކަށް ޙާޒިރީ އިނާޔަތުގެގޮތުގައި 144 ރުފިޔާ ލިބޭނެއެވެ. ރޭންކް 7 ގެ ނަރުހަކަށް އަސާސީ މުސާރައިގެ ގޮތުގައި 13057 ރުފިޔާ، މަޤާމުގެ އެލަވަންސްގެ ގޮތުގައި 6094 ރުފިޔާ އަދި ޙާޒިރީ އެލަވެންސްގެގޮތުގައި ނިކުންނަށް ކޮންމެ ދުވަހަކަށް 165 ރުފިޔާ ލިބޭނެއެވެ.

މި ރޭންކުތަކުގެ ޑޮކްޓަރުންނާއި ނަރުހުންނަށްވެސް ސިވިލް ސަރވިސްގެ މުވައްޒަފުންނަށް ހަމަޖެހިފައިވާ އުޞޫލުން އިތުރު ގަޑީގެ މުސާރައާއި ބަންދު ދުވަސްތަކުގެ މުސާރަ ލިބޭނެ ކަމަށް އިއުލާނުގައި ވެއެވެ. 

ޑޮކްޓަރުންނާއި ނަރުހުންގެ އިތުރުން 6 މެޑިކަލް ލެބޯރެޓަރީ ޓެކްނީޝަނުން ހޯދުމަށްވެސް އައި.ޖީ.އެމް.އެޗްއިން ވަނީ އިޢުލާންކޮށްފައެވެ. މި ހުރިހާ މަޤާމަށްވެސް މީހުން ނެގުމަށް ހަމަޖެހިފައިވަނީ ދާއިމީ މުވައްޒަފުންގެގޮތުގައެވެ.

މި މަޤާމުތަކަށް ޝަޢުގުވެރިވާ ފަރާތްތަކުން މިމަހުގެ 10 ވާ ހޯމަ ދުވަހުގެ މެންދުރު 13:00 ގެ ކުރިން އެކަމަށް އެދި ހުށަހެޅުމަށް އެ ހޮސްޕިޓަލުން ވަނީ ހުޅުވާލާފައެވެ.