ދިވެހިރާއްޖޭގެ ގައުމީ ފުޓްބޯޅަ ސްޓޭޑިއަމް، ގަލޮޅު ދަނޑު، ތަޅާލުމަށްފަހު، އައު ފުޓްބޯޅަ ދަނޑެއް އެޅުމުގެ މަސައްކަތް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މިދައުރުގެ ތެރޭގައި ފެށޭނެ ކަމަށް ޔޫތު މިނިސްޓަރު އަހުމަދު މަހުލޫފް ވިދާޅުވެއްޖެއެވެ.

މިހާރު މާލޭގައި ހުރި ގަލޮޅު ދަނޑު ވަރަށް ބޮޑަށް ހަލާކުވެ، ދަނޑުގެ ދެކުނު ފަރާތް (ސަހަރާ ފަޅި) އަދި އިރުމަތީ ފަރާތް (ބޮޑު ގޭޓު ފަޅި) ބޭނުން ކުރުން ރައްކާތެރި ނޫން ކަމަށް ޕްލޭނިން މިނިސްޓްރީން އެންގުމާއި ގުޅިގެން އެ ސަރަހައްދު ބަނދުކޮށް ކޮންމެވެސް ވަރަކަށް މަރާމާތު ވެސް ކުރިއެވެ. 

އަދި އޭގެ ފަހުން، އެ ދަނޑުގެ ބަދަލުގައި އައު ދަނޑެއް އަޅާނެ ކަން މިނިސްޓަރު މަހްލޫފު ވަނީ ފާއިތުވި އަހަރުގެ އޭޕްރިލް މަހުގައި އިއުލާން ކުރައްވާފައެވެ. އަދި އެއީ އިންޑިއާގެ ލައިން އޮފް ކްރެޑިޓް (އެލްއޯސީ) ގެ ދަށުން ބަޖެޓު ކުރެވިގެން ކުރިއަށްދާ މަސައްކަތެއް ކަމަށްވެސް ވިދާޅުވި އެވެ. 

Advertisement

އެއަށްފަހު، އެ މަސައްކަތް އެއްވެސް ވަރަކަށް ކުރިއަށް ނުގޮސް އޮތުމުން ގިނަ ބައެއްގެ ފާޑުކިޔުންތައް އަންނަނީ ސަރުކާރަށް އަމާޒުވަމުންނެވެ. އެގޮތުން، ރައީސް ޞާލިހު ގެ ދައުރު ނިމޭއިރުވެސް ދަނޑުގެ މަސައްކަތް ނުފެށޭ ކަމަށާ، އެ ކަން މި ދައުރުގައި ވާނޭ ކަމާއިމެދުވެސް ގިނަ ބަޔަކު އަންނަނީ ސުވާލު އުފައްދަމުންނެވެ. 

އެކަންކަމަށް ރައްދު ދެއްވައި މަހްލޫފް ކުރެއްވި ޓްވީޓެއްގައި ވަނީ, އިންޑިއާގެ އެލްއޯސީގެ ދަށުން ގާއިމްކުރާ ގަލޮޅު ދަނޑު، 4 ސިންތެޓިކް ޓްރެކް (ތިނަދޫ، ފުވައްމުލައް، ހިތަދޫ އަދި ކުޅުދުއްފުށި) ، 3 ކޯޓުގެ ވޮލީބޯލް އިންޑޯ، 3 ކޯޓުގެ ނޭޝަނަލް ބާސްކެޓްބޯލް އެރީނާ އަދި ނެޝަނަލް ޓީޓީ ސެންޓަރު ގާއިމްކުރަން ޓެންޑަރކޮށް ބިޑު ނެގުން މިމަހު 16 ގައި ކުރިއަށްދާނެ ކަމަށެވެ. 

މިއާއެކު މަހްލޫފް ވިދާޅުވީ، ގަލޮޅު ދަނޑުގެ މަސައްކަތައް 42 މިލިއަން ޑޮލަރު ހަމަޖެހިފައިވާ ކަމަށެވެ. އަދި ދަނޑުގެ މަސައްކަތް މިދައުރުގައި ފެށޭނެ ކަމަށާ، އެ މަސައްކަތް ނިންމާނީވެސް ރައީސް ޞާލިހުގެ ވެރިކަމުގައި ކަމަށް މަހްލޫފް ވިދާޅުވި އެވެ. 

މީގެ އިތުރުން މަހްލޫފް ވިދާޅުވީ، ގަލޮޅު ދަނޑު ތަޅާލެވޭނީ ހުޅުމާލޭގައި ކުޅެވޭނެ އިންތިޒާމެއް ހަމަޖައްސާފައި ކަމަށެވެ. 

"ކުޅިވަރު ވަސީލަތްތައް ގާއިމްކުރުމުގައި މިސަރުކާރު މިއޮތީ މުޅިންއެހެން ލެވަލްއެއްގައި." މަހްލޫފް ވިދާޅުވި އެވެ.