ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ސަރުކާރުން ކުޅިވަރު ވަސީލަތްތައް ތަރައްގީ ކުރީ "މުޅިން އެހެން ލެވެލްއެއްގައި" ކަމަށް ޔޫތު މިނިސްޓަރު އަހުމަދު މަހުލޫފު ވިދާޅުވެއްޖެ އެވެ.
މަހުލޫފު މިފަދައިން ވިދާޅުވެފައިވަނީ މި ސަރުކާރުން ފ. މަގޫދޫގައި ތަރައްގީކުރަމުން އައި ވޮލީ ކޯޓުގެ މަސައްކަތް މުޅިން ނިންމާލެވިފައިވާކަން ހާމަކުރައްވާ ކުރެއްވި ޓްވީޓެއްގަ އެވެ.
އެގޮތުން މަހުލޫފު ވިދާޅުވީ މި ސަރުކާރުން މަގޫދޫގައި ތަރައްގީކުރި ވަރުގެ ވޮލީ ކޯޓެއް މީގެ ކުރީ ސަރުކާރުން ތަރައްގީ ނުކުރެވުނު ސަބަބު އެމަނިކުފާނަށް ވިސްނިވަޑައި ނުގަންނަވާ ކަމަށެވެ.
ފ. މަގޫދޫއަށް އެކަނި ބަލާލި ނަމަވެސް ރައީސް ޞާލިހުގެ ސަރުކާރުން ކުޅިވަރު ވަސީލަތްތައް ތަރައްގީ ކުރަމުން އަންނަ ލެވެލް ފެނިގެންދާކަމަށް މިނިސްޓަރު މަހުލޫފު ވިދާޅުވި އެވެ.
"ފ. މަގޫދޫގައި ތަރައްގީކުރި ވޮލީކޯޓުވެސް ނިމުނީއެވެ. މިފަދަ އެންމެ ކޯޓެއްވެސް މީގެ ކުރީގެ އެއްވެސް ސަރުކާރަކުން ރާއްޖޭގައި ތަރައްގީނުކޮށް އޮތްއޮތުމަކީ އެކަމުގެ ސަބަބު އަޅުގަނޑަށް އެއްގޮތަކަށްވެސް ނުވިސްނޭކަމެކެވެ. ކުޅިވަރު ވަސީލަތްތައް ޤާއިމްކުރުން ރައީސް ޞާލިހު މިވަނީ މުޅިން އެހެން ލެވަލްއަކަށް ގެންގޮސްދެއްވާފައެވެ"
ޔޫތު މިނިސްޓަރު މަހުލޫފު
މީގެ ކުރިންވެސް އެތައް ފަހަރެއްގެ މަތިން މަހުލޫފު ވަނީ ރައީސް ޞާލިހުގެ ސަރުކާރުން ކުޅިވަރު ވަސީލަތްތައް ތަރައްގީ ކުރުމަށް ކުރަމުން އައިސްފައިވާ މަސައްކަތްތައް ފާހަގަކުރައްވާ ތައުރީފު ކުރައްވާފަ އެވެ.
އޭނާ ވިދާޅުވީ އެކި ކުޅިވަރުތައް ތަރައްގީކުރުމަށް އެހެން އެއްވެސް ސަރުކާރަކުން ނުކުރާ މިންވަރަށް މި ސަރުކާރުން ޚަރަދުކޮށްފައިވާ ކަމަށެވެ.
Advertisement
This content is created and paid for by advertisers and does not involve Voice Journalists
