ރިޔާސީ އިންތިޚާބުގެ ހުރިހާ ކެންޑިޑޭޓުން އިންތިޚާބުގެ ޚަރަދުތައް ކުރުމަށްޓަކައި ޚާއްޞަ ބޭންކް އެކައުންޓެއް ހުޅުވަންވާނެ ކަމަށް އިލެކްޝަންސް ކޮމިޝަން (އީސީ) ގެ ނައިބު ރައީސް އިސްމާއިލް ހަބީބު ވިދާޅުވެއްޖެއެވެ.
އެގޮތުން ހަބީބު މިއަދު ކުރެއްވި ޓްވީޓުގައި ވިދާޅުވީ ރިޔާސީ އިންތިޚާބުގެ ކޮންމެ ކެންޑިޑޭޓެއްގެ އިންތިޚާބާ ގުޅޭ އެންމެހައި ޚަރަދުތައް ކުރުމަށްޓަކައި، އެކަމަށް ޚާއްޞަކުރާ ބޭންކް އެކައުންޓެއް (އަލަށް ހުޅުވާ އެކައުންޓެއް) ދިވެހިރާއްޖޭގައި ހިންގާ ބޭންކެއްގައި، ކެންޑިޑޭޓުގެ ނަމުގައި، ހުޅުވަންވާނެ ކަމަށެވެ.
މިއާއިއެކު ރިޔާސީ އިންތިޚާބުގެ ކޮންމެ ކެންޑިޑޭޓަކުވެސް، އިންތިޚާބާ ގުޅިގެން ކުރާ އެންމެހައި ޚަރަދެއް ކުރަންވާނީ، އަލަށް މި ހުޅުވާ ބޭންކް އެކައުންޓް މެދުވެރިކޮށް ކަމަށް ހަބީބު ވަނީ ވިދާޅުވެފައެވެ.
އަދި ކެންޑިޑޭޓަށް އިންތިޚާބާ ގުޅިގެން، ލިބޭ އެންމެހައި ފައިސާގެ އެހީވެސް ޖަމާކުރަންވާނީ، އަލަށް ހުޅުވާ މި އެކައުންޓަށް ކަމަށް ހަބީބު ވިދާޅުވިއެވެ.
މީގެ އިތުރުން މި ފަދަ އެކައުންޓެއް ކެންޑިޑޭޓުންނަށް ޚާއްޞަކޮށްގެން، ފަސޭހައިން ހުޅުވޭނޭ އިންތިޒާމް ހަމަޖެއްސުމަށްޓަކައި، އީސީ އިން ވަނީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އާއި އެކީގައި މަޝްވަރާ ކުރައްވާފައި ކަމަށް ހަބީބު މައުލޫމާތު ދެއްވިއެވެ.
އަދި ބޭންކްތަކާއި ވާހަކަ ދައްކައިގެން، މި އިންތިޒާމް ހަމަޖައްސަވައިދެއްވާނޭކަމުގައި އެމްއެމްއޭއިން ވަނީ ވިދާޅުވެފައި ކަމަށް ހަބީބު ވަނީ ފާހަގަކުރައްވާފައެވެ.
ރިޔާސީ އިންތިޚާބުގައި ވާދަކުރައްވާ ބޭފުޅުން މިހާރު ވަނީ ކެންޕެއިން ފަށާފައެވެ. އެގޮތުން ރަށްރަށަށް ޒިޔާރަތް ކުރުމާއި ދޮރުން ދޮރަށް ހިންގެވުމުގެ ހަރަކާތްތައް ސިޔާސީ ޕާޓީތަކުން ވަނީ ފަށާފައެވެ.
Advertisement
This content is created and paid for by advertisers and does not involve Voice Journalists
