ކުރިއަށް އޮތް ރިޔާސީ އިންތިޚާބުގައި ފޮރިން މިނިސްޓަރު އަބްދުالله ޝާހިދަށް ރައިން މޭޓުކަން ދޭން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް މަޖުބޫރުވާނެކަން އެނގިލައްވާކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ވިދާޅުވެއްޖެ އެވެ. 

ތާރިގު މިފަދައިން ވިދާޅުވެފައިވަނީ ރައީސް ޞާލިހުގެ ކެމްޕޭނު ޓީމު މޯޓިވޭޓުކުރުމަށް ކުރިއަށް ގެންދިޔަ ސެޝަނުގެ ތެރެއިން ރައީސް ޞާލިހާއި ފޮރިން މިނިސްޓަރު އަބްދުالله ޝާހިދު އެކުގައި ތިއްބަވާތަން ފެނިގެންދާ ފޮޓޯއެއް ހިއްސާކުރައްވާ ކުރެއްވި ޓްވީޓެއްގަ އެވެ. 

އެ ފޮޓޯ ހިއްސާކުރައްވާ ތާރިގު ވިދާޅުވީ ފޮރިން މިނިސްޓަރު އަބްދުالله ޝާހިދަކީ ދިވެހިރާއްޖޭގެ މަސްކަނޑުން ބައެއް ވިއްކާލުމުގައި ރައީސް ޞާލިހުގެ ބައިވެރިއެއް ކަމަށެވެ.

އަދި އެހެންވުމުގެ ސަބަބުން ރިޔާސީ އިންތިޚާބުގައި ރައީސް ޞާލިހުގެ ރަނިން މޭޓުކަމަށް ޝާހިދު ހަމަޖައްސަން ޖެހިވަޑައިގަންނަވާނެ ކަމަށާއި، އެކަން ކުރަން އެމަނިކުފާނަށް މަޖުބޫރުވާނެކަމަށް ތާރިގު ވިދާޅުވި އެވެ. 

ރައީސް ޞާލިހުގެ ކެމްޕޭނު ޓީމު މޯޓިވޭޓުކުރުމަށް ބޭއްވި ސެޝަންގެ ތެރެއިން

ފޮރިން މިނިސްޓަރު އަބްދުالله ޝާހިދަކީ މިވަގުތު ރައީސް ޞާލިހުގެ އެންމެ އަރިސް ވަޒީރެވެ.

ރައީސް ޞާލިހުގެ ރަނިންމޭޓު އަދި ރަސްމީކޮށް އިއުލާނުކޮށްފައި ނުވި ނަމަވެސް، ރަނިންމޭޓަކަށް ވުން އެންމެ ގާތީ ޝާހިދުކަމަށް ސިޔާސީ މަޝްރަހު ދިރާސާ ކުރައްވާ ގިނަ ފަރާތްތަކެއް ދަނީ ވިދާޅުވަމުން ނެވެ. 

ފޮރިން މިނިސްޓަރު އަބްދުالله ޝާހިދު ގެންދަވަނީ ރައީސް ޞާލިހަށް ދެވަނަ ދައުރެއް ހޯދައިދޭން ޖެހޭކަމަށް ބުނެ ވަރަށް ބޮޑަށް ވަލާކާތުކުރައްވަމުން ނެވެ.