ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު، 2018 ވަނަ އަހަރު ވެރިކަމަށް ވަޑައިގަންނަވަން ވެވަޑައިގެންނެވި ވައުދުގެ %90 އަށްވުރެ ގިނަ ކަންކަން މިހާރު ހިނގަމުންދާ ކަމަށް އެމަނިކުފާނު ވިދާޅުވެއްޖެއެވެ. 

ރިޔާސީ ކެމްޕެއިނަށް ށ އަތޮޅަށް ކުރައްވަމުންދާ ދަތުރުފުޅުގެ ތެރެއިން، ކެންޕެއިން ރަސްމީކޮށް ފެއްޓެވުމަށް ފޯކައިދޫގައި މިރޭ ބޭއްވި ޖަލްސާގައި ވާހަކަ ދައްކަވަމުން ރައީސް ޞާލިހް ވަނީ، މި ސަރުކާރު ވެރިކަމަށް ވަޑައިގެންނެވުމާއިއެކު، ސީޔާސީ ލީޑަރުންނަށާއި ނޫސްވެރިންނަށްވެސް މިނިވަންކަން ލިބިފައިވާ ކަމަށް ވިދާޅުވެފަ އެވެ. އަދި އޭގެ އިތުރުންވެސް އެމަނިކުފާނު ވެވަޑައިގެންނެވި ގިނަ ވައުދުތަކުގެ ލިސްޓު ކިޔާލައްވަމުން އެކަންކަމުގެ ބޮޑުގައި ނިމިފައި، ނުވަތަ ހިނގަމުންދާ ކަމަށް ވިދާޅުވި އެވެ. 

ރައީސް ޞާލިހު ވިދާޅުވީ މި ސަރުކާރުން ކުރި ހުރިހާ ކަމެއްވެސް ކޮށްފައިވަނީ ކޮވިޑްގެ ޢާލަމީ ވަބާގެ ތެރޭގައި ކަމަށެވެ. އަދި އެކަންކަން ކުރުމަށް ހޯދަންޖެހުނީވެސް ބޭރު ގައުމުތަކުގެ އެހީކަން އެމަނިކުފާނު ފާހަގަކުރެއްވިއެވެ. 

ރައީސް ޞާލިހުގެ ވައުދު ތަކުގެ 90 އިންސައްތަ ނިމިފައިވާ ކަމަށް އެމަނިކުފާނު ވިދާޅުވާއިރު، މި ސަރުކާރުގެ އެންމެ ބޮޑު ވައުދު ކަމުގައިވާ ތިލަމާލޭ ބުރިޖުގެ މަސައްކަތް ދައުރު ނިމޭއިރުވެސް ނުނިންމޭނެ ކަމަށް ސަރުކާރުން ވަނީ ބުނެފައެވެ. 

އަދި ބޯހިޔާ ވަހިކަމުގެ މައްސަލަ ހައްލު ކޮށްދެވިގެންދާ ކަމަށް ވިދާޅުވާ އިރު ބިންވެރިޔާ ސްކީމްގެ ދަށުން ހޯތި ލިބޭ މީހުންނަށް ގޯތި ދޭން ނިންމާފައިވާ ގިނަ ތަންތަން އަދި ހިއްކާވެސް ނުނިމެއެވެ. 

މީގެ އިތުރުން ވެސް މި ސަރުކާރުން މަސްވެރިންނަށް ވީ ވައުދުވެސް ނުފުއްދި، މަސްވެރިކަން އިންތިހާއަށް ދަށަށް ގޮސްފައިވާ ކަމަށް ގިނަ މަސްވެރިން އަންނަނީ ބުނަމުންނެވެ.