މި ސަރުކާރު ކޯލިޝަނުގައި ވެސް ފަނިއަޅާ ހިތިފަތް ޖަހައިގެން ފަރުވާދޭން ޖެހުނު ކަމަށް ސަރުކާރުގެ ކޯލިޝަން ޕާޓުނަރު، އަދާލަތު ޕާޓީގެ ރައީސް އަދި ހޯމް މިނިސްޓަރު އިމްރާނު އަބްދުالله ވިދާޅުވެއްޖެ އެވެ. 

އިމްރާނު މިފަދައިން ވިދާޅުވެފައިވަނީ ށ. ފޯކައިދޫގައި ބޭއްވި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން ނެވެ. 

އިމްރާނު ވިދާޅުވީ ރައީސް ޞާލިހަކީ ކޯލިޝަނަށް ވަރަށް ބޮޑަށް އިޚްތިރާމު ކުރައްވާ ލީޑަރެއްކަމަށެވެ. މިހާތަނަށް ވެރިކަމަށް ކޯލިޝަން ހަދައިގެން އައިސް އެ ކޯލިޝަން ދެމެހެއްޓީ ހަމައެކަނި ރައީސް ޞާލިހު ކަމަށާއި، އެމަނިކުފާނަށް އެކަން ކުރެވުނީ ކެތްތެރިކަން އިސްކުރެއްވުމަށްކަމަށް އިމްރާނު ވިދާޅުވި އެވެ. 

އެވާހަކައާއި ގުޅުވާ އިމްރާނު ވިދާޅުވީ ރައީސް ޞާލިހުގެ ކޯލިޝަން ސަރުކާރުގައި ވެސް ފަންޏެއް އެޅިކަމަށެވެ. އަދި ހިތިފަތް ޖަހައިގެން ފަރުވާ ވެސް ދޭން ޖެހުނުކަމަށެވެ. 

އެހެން ނަމަވެސް ބަލި ފަސޭހަވެގެންދާއިރު ލަކުނުވެސް ނުހުންނާނެކަމަށް އިމްރާނު ވިދާޅުވި އެވެ. 

މިނިސްޓަރު އިމްރާނު ވާހަކަދައްކަވަނީ

އިމްރާނު މިފަދައިން އިޝާރާތްކުރެއްވީ އެމްޑީޕީެ ރިޔާސީ ޕްރައިމަރީއާއި ގުޅިގެން ޕާޓީގެ ދެ ރައީސުންގެ މެދުގައި އުފެދުނު ވާދަވެރިކަން ބޮޑުވެ ޕާޓީ ދެބައިވެގެން ދިޔަ ދިއުމަށް ކަމަށް ބެލެވެއެވެ. 

އެމްޑީޕީގައި ތިއްބަވާ ރައީސް ނަޝީދަށް ތާއީދުކުރައްވާ މެމްބަރުން ވަނީ ރައީސް ޞާލިހަށް ވަރަށް ގިނަ ތުހުމަތުތައް ކުރައްވާފަ އެވެ. އެމަނިކުފާނުގެ ނާގާބިލުކަމުގެ ވާހަކައާއި ވައުދުތައް ނުފުއްދާ ވާހަކަތަކުގެ އިތުރުން، އިންތިޚާބުތަކަށް ރައީސް ޞާލިހު ނުފޫޒު ފޯރުވަމުންދާ ކަމަށާއި، ޕްރައިމަރީ އިންތިޚާބު ވެސް ގަޑުބަޑުކޮށްފައިވާކަމުގެ ތުހުމަތުތައް ނަޝީދަށް ތާއީދުކުރައްވަމުން ގެންދެވި މެމްބަރުން އޭރުވެސް ދިޔައީ ކުރައްވަމުން ނެވެ. 

އެފަހުން ނަޝީދަށް ތާއީދުކުރައްވާ ވަރަށް ގިނަ އަދަދެއްގެ މެމްބަރުން ވަނީ އެމްޑީޕީން ވަކިވެ އާ ސިޔާސީ ޕާޓީއެއް އުފެއްދުމުގެ މަސައްކަތް ފަށާފައެވެ. އަދި ނަޝީދުވެސް ޕާޓީ ދޫކުރައްވާ ވަޑައިގެން މިހާރު ވަނީ ދަ ޑިމޮކްރެޓްސްގެ މަސައްކަތްތަކާއި ގުޅިވަޑައިގެންފަ އެވެ. 

ބަލި ފަސޭހަވާއިރު ލަކުނުވެސް ނުހުންނާނެކަމަށް އިމްރާނު އެ އިޝާރާތްކުރެއްވީ ރައީސް ނަޝީދާއި ނުލާ އެމްޑީޕީ ހިންގަމުންދާއިރު އެ ފަޅުކަން އިހުސާސް ނުކުރެވޭ ވާހަކައަށް ކަމަށް ބެލެވެއެވެ. އަދި ނަޝީދާއި ނުލާ ވެސް ކުރިއަށް އޮތް ރިޔާސީ އިންތިޚާބު އެމްޑީޕީއަށް ކާމިޔާބު ކުރެވިދާނެކަމަށް އިމްރާނު ވަނީ ވިދާޅުވެފަ އެވެ. 

އިމްރާނު ވިދާޅުވެފައިވަނީ ކުރިއަށް އޮތް ރިޔާސީ އިންތިޚާބުގައި ރައީސް ޞާލިހު އެއްބުރުން ކާމިޔާބު ކުރައްވާނެކަމުގެ ޔަގީންކަން އޮތް ކަމަށެވެ. އަދި އެމަނިކުފާނަށް މިއިންތިޚާބު ކާމިޔާބުކޮށްދިނުމަށް ވަރަށް ބުރަކޮށް ކެމްޕޭނު ޓީމުތަކުން މަސައްކަތްކޮށްދިނުމަށް ވެސް އިމްރާނު ވަނީ ގޮވާލައްވާފަ އެވެ.