ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ކެންޕެއިނަށް އިއްޔެ ދަތުރުކުރި ރަށްތަކުން ވާދަވެރިންނަށް ލިބޭނެ ވޯޓެއް ނެތް ކަމަށް ފޮރިން މިނިސްޓަރު އަބްދުالله ޝާހިދު ވިދާޅުވެއްޖެއެވެ. 

ރައީސް ޞާލިހު ގެ ރިޔާސީ ކެމްޕެއިން ހަރަކާތްތައް ރަސްމީކޮށް ފެށުމަށް ރޭ ށ. ފޯކައިދޫގައި ރޭ ބޭއްވި ޖަލްސާގައި ވާހަކަ ދައްކަވަމުން ޝާހިދު ވަނީ އިދިކޮޅު ފަރާތްތަކަށް ވަރަށް ބޮޑަށް ފާޑުވިދާޅުވެފައެވެ. 

އެގޮތުން ޝާހިދު ވިދާޅުވީ، އަދުގެ ސަރުކާރުގެ ވާދަވެރިން އުޅެނީ މިހާރު ވިއްކާނެ އެއްޗެއް އަދި ދައްކާނެ ވާހަކައެއް ނެތިގެން ކަމަށެވެ. އެހެންކަމުން އެފަރާތްތައް މިހާރު އުޅެނީ ބޮލަށް ދޮލަނގެއް ލައިގެން، ދޮލަނގަށް ފިތުނަ ލައިގެން އެ ވިއްކޭތޯ ކަމަށާ، އެހެން ނަމަވެސް މިއަދު ދިވެހި ރައްޔިތުން އެ ފިތުނައެއް ބަލައި ނުގަންނާނެ ކަމަށް ޝާހިދު ވިދާޅުވި އެވެ. 

މިއާއެކު ޝާހިދު ވަނީ، އެމްޑީޕީއާއި ވާދަކުރަން ބޭނުން ނަމަ، ހަރުދަނާ ސިޔާސަތަކާއިއެކު ނުކުމެ ވަޑައިގެން ވާދަކުރެއްވުމަށް އިދިކޮޅަށް ގޮވާލައްވާފައެވެ. އެހެން އެގޮތަށް ކަން ނުކޮށްފި ނަމަ ބޮޑުތަނުން ބަލި ވާނެ ކަމަށްވެސް ޝާހިދު ވިދާޅުވި އެވެ. 

ދިވެހިރާއްޖޭ އާއި އިންޑިއާ އާއި ދެމެދު ގާއިމް ކުރަމުންދާ ގުޅުމާަައި ގުޅިގެން އިދިކޮޅުން ހިންގަމުންދާ ހަރަކާތް ތަކާއި، ފޯޅަވަހީގެ މައްސަލާގައި ކަނޑުން ބައެއް ގެއްލިއްޖެ ކަމަަށް ބުނެ ދައްކާ ވާހަކަތަކަކީ ފިތުނަ އުފެއްދުމަށް ހިންގާ ހަރަކާތްތަކެއްގެ ގޮތުގައި މީގެ ކުރިންވެސް ޝާހިދު ވަނީ ސިފަކުރައްވާފަ އެވެ.