މާލެ އަތޮޅު ދިއްފުށީގައި ހުންނަ މޯލްޑައިވާސް ޑައިވިން ސެންޓަރުން ދިވެހި މަސްވެރިންނަށް ހާއްސަކޮށް ތައްޔާރުކޮށްފައިވާ ޕްރޮފެޝަނަލް ޑައިވިން ޕްރޮގްރާމްތަކެއް ފަށަން ނިންމައިފި އެވެ.

މިކަމާއި ގުޅޭގޮތުން މޯލްޑައިވާސް އިން ނެރެފައިވާ ބަޔާނުގައި ބުނެފައިވަނީ މިކަން ތައާރަފް ކުރަނީ މިނިސްޓްރީ އޮފް އިކޮނޮމިކް ޑިވެލޮޕްމަންޓުން ފޯރުކޮށްދޭ ދީލަތި އެހީގެ ތެރެއިން ކަމަށެވެ.

އެގޮތުން މި ޕްރޮގްރާމްތަކުގައި ބައިވެރިވުމަށް ޝައުގުވެރިވާ ފަރާތްތަކުން ޖޮބް ސެންޓަރ ޕޯޓަލް މެދުވެރިކޮށް ފޯމު ހުށަހެޅޭނެ ކަމަށް އެ ސެންޓަރުން ވަނީ ބުނެފައެވެ.

މި ޕްރޮގްރާމާ ބެހޭ އިތުރު މައުލޫމާތު ހޯދުމަށާއި ބައިވެރިވުމަށް މޯލްޑައިވާސްގެ ނަމްބަރު 7777532 ނުވަތަ [email protected] އަށް އީމެއިލް މެދުވެރިކޮށް ހިއްސާކުރެއްވުމަށް އެ ސެންޓަރުން ވަނީ އެދިފައެވެ.

މޯލްޑައިވާސް އަކީ، މަތީ ފެންވަރުގެ ސްކޫބާ ޑައިވިން ތައުލީމާއި ސެޓިފިކޭޝަނަށް މަޝްހޫރުވެފައިވާ ދުނިޔޭގެ ފެންވަރުގައި ފާހަގަކޮށްލެވޭ ޖަމިއްޔާއެއް ކަމަށްވާ ސްކޫބާ ސްކޫލްސް އިންޓަނޭޝަނަލް (އެސްއެސްއައި) އާ ގުޅިގެން ސަލާމަތާއި ރައްކާތެރިކަމަށް އިސްކަންދީ ޒަމާނީ ޓީޗިން ޓެކްނިކްސް ބޭނުންކޮށްގެން ފުޅާ ދާއިރާއެއްގައި ތަމްރީނު ޕްރޮގްރާމްތައް ހިންގުމަށް އިސްކަންދޭ ސެންޓަރެކެވެ.

މޯލްޑައިވާސްއިން މިހާރު ރާއްޖޭގެ މަސްވެރިންނަށް އޯޕަން ވޯޓާ ޑައިވަރ، އެޑްވާންސް، ފަސްޓް އެއިޑް، ރެސްކިއު އަދި ޑީޕް ޑައިވަރު ކޯސްތައް ހިމެނޭ ގޮތަށް އެސްއެސްއައި ޑައިވް ޕްރޮގްރާމްތައް ކުރިއަށް ގެންދެއެވެ.

މި ތަމްރީނު ޕްރޮގްރާމްތަކުގައި ބައިވެރިންގެ ކުރިން ސްކޫބާ ޑައިވިން ސެޓްފިކެޓާއި ތަޖުރިބާއަށް ރިއާޔަތްކުރާ ކަމަށް އެ ސެންޓަރުން ވަނީ ފާހަގަކޮށްފައެވެ.

24 އަހަރަށްވުރެ ގިނަ ދުވަސް ވަންދެން ލޯކަލް ޑައިވަރުން ކާމިޔާބުކަމާއެކު ތަމްރީނުކުރުމުގެ ރެކޯޑެއް އޮތް މޯލްޑައިވާސްއިން މުޖުތަމަޢުގެ ތެރޭގައި ވަރަށް ބޮޑަށް ގުޅި އަދި ތަމްރީނުގެ ތަފާތު ފުރުޞަތުތައް ފަހިކޮށްދިނުމަށް މަސައްކަތްކުރާ ކަމަށް އެސެންޓަރުން ވަނީ ފާހަގަކޮށްފައެވެ.