‏އެމްޑީޕީގެ ރިޔާސީ ކެންޑިޑޭޓް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު، އެމަނިކުފާނުގެ ކެންޕެއިނަށް ކ. ގުޅިއަށް ވަޑައިގެންނެވުމަށްފަހު، އެ އަތޮޅު ގުރައިދޫއަށް ވަޑައިގެންފިއެވެ.

ރައީސް ޞާލިހު ގުރައިދޫ އަށް ވަޑައިގެންނެވުމުން އެމަނިކުފާނަށް މަރުހަބާ ދެންނެވުމަށް އެރަށުގެ އެންޑީޕީއަށް ނިސްބަތްވާ ބައެއް ފަރާތްތައް ވަނީ ބަނދަރު ސަރަހައްދަށް އެއްވެފައެވެ. 

ގުރައިދޫ ގެ މި ދަތުރުގައި، ރައީސް ޞާލިހު ވަނީ އެ ރަށުގެ ރައްޔިތުންނާއި ބައްދަލުކުރައްވާ، ރައްޔިތުންނަށް ބޭނުންވާ ކަންކަމާއި ގުޅޭ ގޮތުން މަޝްވަރާ ކުރައްވާފައެވެ. 

ގުރައިދޫއާއި ގުޅީގެ އިތުރުން، ރިޔާސީ އިންތިހާބު ކެމްޕެއިނަށް މާލެ އަތޮޅު މާފުށްޓަށްވެސް ރައީސް ޞާލިހު ވަޑައިގަންނަވާނެ ކަމަށް އެމްޑީޕީން ބުނެއެވެ. 

ރިޔާސީ އިންތިހާބުގެ ކެމްޕެއިނަށް މި ހަފްތާގައި ރައީސް ޞާލިހު ވަނީ ށ އަތޮޅުގެ ހަތަރު ރަށަކަށް ވެސް ޒިޔާރައް ކުރައްވާފައެވެ. 

ކުރިއަށް އޮތް ރިޔާސީ އިންތިޚާބަށް ރައީސް ޞާލިހުގެ މެނިފެސްޓޯ އެކުލަވާލުމުގެ މަސައްކަތް ކުރަމުންދާއިރު، ރަށްތަކަށް ކުރައްވާ ދަތުރުފުޅުތަކުގެ ތެރެއިން ޙާލަތު ވަޒަންކުރުމާއި ރައްޔިތުންނަށް އެންމެ ބޭނުން ޖެހިފައިވާ ކަންކަން ބަލައި ދެނެގަތުމުގެ މަސައްކަތްތައް ވެސް ކުރިއަށް ގެންދިއުމަށް ވަނީ ނިންމާފަ އެވެ.