މިއަހަރުގެ ސެޕްޓެމްބަރު މަހުގެ 9 ވަނަ ދުވަހު ބާއްވާ ރިޔާސީ އިންތިޚާބު އެއްބުރުން ކާމިޔާބު ކުރައްވާނެ ކަމަށާއި، އިންތިޚާބުގައި ވޯޓުލާން ފައްޓަވާނީ ވެސް އެއްލައްކަ ވޯޓާއި އެކުގައިކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެ އެވެ.
މި ރިޔާސީ އިންތިޚާބަށް ރައީސް ޞާލިހު ނިކުންނަވަނީ އަދާލަތާއި އެމްޑީއޭއާއި އެމްޑީޕީ ހިމެނޭ ކޯލިޝަނަކާއި އެކުގައެވެ.
އެމަނިކުފާނު ވިދާޅުވީ އެއީ މިހާތަނަށް ރިޔާސީ އިންތިޚާބަށް ނިކުންނަ މެމްބަރުން އެންމެ ގިނަ ކޯލިޝަން ކަމަށެވެ.
ކުރިއަށް އޮތް ރިޔާސީ އިންތިޚާބުގެ ފުރަތަަމަ ބުރު އެމަނިކުފާނު ފައްޓަވާނީ ވެސް އެއްލައްކަ ކޯޓުންކަމަށް ރައީސް ޞާލިހު ވަނީ ވިދާޅުވެފަ އެވެ.
"އަޅުގަނޑުމެންގެ އަމާޒަކީ އެދުވަހު (9 ސެޕްޓެމްބަރު) ގައި އެއްލައްކަ ވޯޓުން ފެށުން. ހަމަކޮށްލަން ދެން ޖެހޭނީ ކުޑަކުޑަ ތަންކޮޅެއް. އަޅުގަނޑު ހިތުން މާލެ އަތޮޅުން އެކަނިވެސް އެވަރު ކުރެވޭނެ"
ރައީސް ޞާލިހު
ރައީސް ޞާލިހު ވިދާޅުވީ ރާއްޖޭގެ ރައްޔިތުން ބޭނުންވަނީ ތަރައްގީއާއި އަމާންކަން މަތީގައި ދިރިއުޅެން ކަމަށެވެ.
2018 ވަނަ އަހަރުވެސް ރައްޔިތުން އެމަނިކުފާނާއި ހަވާލުކުރީ އެ މަސްއޫލިއްޔަތު ކަމަށާއި، އެކަން ފާއިތުވި 4 އަހަރު އެކަށީގެންވާ މިންވަރަކަށް ކޮށްދެވިއްޖެކަމަށް ރައީސް ޞާލިހު ވިދާޅުވި އެވެ.
އެގޮތުން ޝަރުއީ ދާއިރާއަށް އޮތް ނުފޫޒާއި ޙިޔާލުފާޅުކޮށްގެން ޖަލަށް ދާން ޖެހުމާއި، ސިޔާސީ ލީޑަރުންނަށް ދައުވާކުރުމަކީ މާޒީގެ ތެރެއަށް މިހާރު ދޫކޮށްލެވިފައިވާ ކަންކަމުގެ ގޮތުގައި ރައީސް ޞާލިހު ފާހަގަކުރެއްވި އެވެ.
އެއާއެކު އެމަނިކުފާނު ވިދާޅުވީ މި އަމާންކަން ދެމެހެއްޓުމުގެ ބާރު މިހާރު އޮތީ ރައްޔިތުންގެ އަތްމަތީގައި ކަމަށެވެ.
Advertisement
This content is created and paid for by advertisers and does not involve Voice Journalists
