ރާއްޖޭގެ ވެރިކަން ކުރެއްވުމަށް ދެވަނަ ދައުރަކަށް ކުރިމަތިލައްވާއިރު، އެމަނިކުފާނުގެ އެންމެ ބޮޑު އެއް އަމާޒަކީ ރާއްޖޭގެ އިގްތިސާދު ދެގުނަ ކުރުން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
"އުފާވެރި އަމާން ރާއްޖެ" ރިޔާސީ ކެމްޕެއިނުގައި މާފުށީގައި ރޭ ބޭއްވި ކެމްޕެއިނު ޖަލްސާގައި ވާހަކަ ދައްކަވަމުން ރައީސް ޞާލިހް ވިދާޅުވީ މި ސަރުކާރު ވެރިކަމަށް އައުމަށް ފަހު އެންމެ ފުރަތަމަ ކުރަންޖެހުނު ކަމަކީ ރާއްޖޭގައި އޮތް ހަލަބޮލިކަން ނައްތާލައި ރާއްޖެއަށް ހަމަޖެހުން ގެނައުމުގެ މަސައްކަތް ކަމަށެވެ. އަދި އޭގެ ނަތީޖާ މިހާރު ފެންނަމުންދާ ކަމަށެވެ.
"އިރާދަކުރެއްވިއްޔާ މިއަދު ރާއްޖޭގެ ކޮންމެ ކޮޅަކުން ފެންނަމުން އެ ދަނީ އެ ހަމަޖެހުން އެ އަމާންކަން،" ރައީސް ޞާލިހު ވިދާޅުވި އެވެ.
މިއާއެކު ރައީސް ޞާލިހް ވިދާޅުވީ، އެމަނިކުފާނުގެ ކުރިއަށް އޮތް ދައުރުގެ އެންމެ މުހިންމު އެއް އަމާޒަކީ އައު ޒުވާނުންނަށް ފުރުސަތު ހުޅުވާލުން ކަމަށެވެ.
"ކުރިއަށް މިއޮތް ދައުރު އެންމެ މުހިންމު އަމާޒަކީ އާ ޒުވާނުންނަށް، އެ ޖީލަށް ފުރުސަތު ހުޅުވާލުން، ރާއްޖޭގެ ކަންކަމުގައި ބަސްބުނެ، ހަރަކާތްތެރިވުމުގެ ޖާގަ ޒުވާނުންނަށް މިހާރަށްވުރެ ރަނގަޅަށް ދިނުން، އަމާން މުޖުތަމައެއް ގާއިމް ކުރުމަށް ފަށާފައިވާ މި މަސައްކަތައިގެން ކުރިއަށް ދިއުން،"
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
މީގެ އިތުރުން، ކުރިއަށް އޮތް ދައުރުގައި އިސްކަންދެއްވާނެ އިތުރު ކަންކަން ފާހަގަކުރައްވަމުން ރައީސް ޞާލިހު ވަނީ، އުފާވެރި ދިރިއުޅުމެއް ރައްޔިތުންނަށް ހޯދައިދިނުމާއި ހެޔޮވެރިކަމެއް ކޮށް، އިގްތިސޯދު ދެ ގުނަ ކުރުމަކީ ކުރަން ހުރި އެންމެ މުހިންމު ކަންކަން ކަމަށެވެ.
"އުފާވެރި ދިރިއުޅުމެއް ރައްޔިތުންނަށް ހޯދައި ދިނުން. ހެޔޮ ވެރިކަމެއް ކޮށް، އިގްތިސާދު ދެގުނަ ކުރުން އެއީ އަޅުގަނޑުމެންގެ އެންމެ ބޮޑު އަމާޒަކީ. އަޅުގަނޑުމެން ބޭނުންވަނީ އުފާވެރި ރާއްޖެއެއް. އަޅުގަނޑުމެން ބޭނުންވަނީ އަމާން ރާއްޖެ އެއް. އާދެ އުފާވެރި އަމާން ރާއްޖެއެއް."
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ރައީސް ޞާލިހު ގެ ވާހަކަފުޅުގައި އެމަނިކުފާނު ވަނީ، މާފުށީގައި މިހާރު ކުރަމުންދާ މަސައްކަތްތަކާއި ކުރިއަށް ރޭވިފައި ހުރި މުހިންމު ކަންކަމަށްވެސް އަލިއަޅުވާލައްވާފައެވެ. އެގޮތުން، އެ މަނިކުފާނު މާފުށްޓަށް ވެވަޑައިގެންނެވި ހުރިހާ ވައުދެއްހެން މިހާރު ފުއްދެމުން ދާ ކަމަށް ވިދާޅުވި އެވެ. އަދި އޭގެ އިތުރުން ވެސް ކަންކަން މިހާރު ކުރިއަށްދާ ކަމަށް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
