ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ވެރިކަމުގެ ދެ ދައުރު ނިމޭއިރު، ދެން އެއަށްފަހު އަންނަ ރައީސް އަކު ރާއްޖޭގެ ތަރައްގީއަށް ކުރާނެ މަސައްކަތެއް ނޯންނާނެ ކަމަށް ސްޓެލްކޯގެ މެނޭޖިން ޑިރެކްޓަރު އަހުމަދު ޝަރީފް ވިދާޅުވެއްޖެއެވެ.
"އުފާވެރި އަމާން ރާއްޖެ" ރިޔާސީ ކެމްޕެއިނުގައި މާފުށީގައި ރޭ ބޭއްވި ކެމްޕެއިނު ޖަލްސާގައި ޝަރީފުގެ ވާހަކަ ފައްޓަވަމުން ވިދާޅުވީ، އޭނާއަށް ރާއްޖޭގެ ރައީސް ކަން ކުރެއްވި، ކުރީގެ ރައީސް މައުމޫން އަބްދުލްޤައްޔޫމާއި، ރައީސް މުހައްމަދު ނަޝީދު އާއި، ރައީސް ޑރ. މުހައްމަދު ވަހީދު އާއި ރައީސް ޔާމީން އަބްދުލްގައްޔޫމް ގެ އިތުރުން ރައީސް ޞާލިހުގެ ވެރިކަންވެސް ފެނިފައިވާ ކަމަށެވެ. އަދި އެ ހުރިހާ ރައީސުންގެ ތެރެއިންވެސް ރައީސް ޞާލިހަކީ ނަމޫނާ ޝަޚްޞިއްޔަތެއް ކަމަށް އޭނާ ވިދާޅުވި އެވެ.
ރައީސް ޞާލިހަކީ ނަމޫނާ ޝަޚްޞިއްޔަތެއް ކަމަށް އަޅުގަނޑު ދެންނެވީމާ ތި ބޭފުޅުން ހީފުޅުކުރައްވަފާނެ، އަޅުގަނޑަކީ ސަރުކާރު ކުންފުންޏެއްގެ މެނޭޖިން ޑިރެކްޓަރު ވީމާ، ރައީސުލްޖުމްހޫރިއްޔާ އަށް ހުޝާމަދު ކުރަނިއްޔޭ. ނޫން. އަޅުގަނޑު ހުޝާމަދު ކުރަނީއަކީ ނޫން. މިއީ ހަގީގަތް. ރާއްޖޭގެ ރައީސުލްޖުމްހޫރިއްޔާ އަކީ އޯގާތެރި ބޭފުޅެއް. ހިކުމަތްތެރި ބޭފުޅެއް. ރައްޔިތުންގެ އަޑު އައްސަވާ ބޭފުޅެއް. ރައްޔިތުންނަށް ވައުދެއް ވެ ވަޑައިގެންފި ނަމަ، އެ ވައުދެއް ފުއްދަވާ ބޭފުޅެއް. މިފަދަ ޝަޚުޞިއްޔަތެއް، މިފަދަ ވެރިން، އަޅުގަނޑުމެން ރާއްޖޭގެ ވެރިންގެ ގޮތުގައި ބޭނުން ވަނީ
ސްޓެލްކޯގެ މެނޭޖިން ޑިރެކްޓަރު އަހުމަދު ޝަރީފް
ޝަރީފު ވިދާޅުވީ، ރައީސް ޞާލިހަށް ދެވަނަ ދައުރެއް ދެއްވަން ޖެހޭ ސަބަބު ތަކުގެ ތެރެއިން އެއް ސަބަބަކީވެސް އެ މަނިކުފާނުގެ އެ ޝަޚުސިއްޔަތު ކަމަށެވެ.
މީގެ އިތުރުން އޭނާ ވިދާޅުވީ، ތަރައްޤީ ގެ މުއްދަތަކީ 10 އަހަރު ކަމަށެވެ. އަދި އެ ދިހަ އަހަރުގެ ތެރެއިން ރައީސް ޞާލިހުގެ ފުރަތަމަ ފަސް އަހަރުގެ 2 އަހަރަކީ ކޮވިޑްގެ ޢާލަމީ ވަބާގެ ސަބަބުން މުޅި ދުނިޔެވެސް ހުއްޓިފައިވި ދެ އަހަރު ކަމަށެވެ. އެހެންނަމަވެސް، ލިބުނު 3 އަހަރުގެ ތެރޭގައި، ވޭތިވެދިޔަ ވެރިކަން ތަކުގައި ނުކޮށް ހުރި ހުރިހާ ކަމެއް ކޮށްފައިވާ ކަމަށާ، އެ ވެރިކަން ތަކުން ކޮށްފައިވާ މަސައްކަތްތަކުގެ ތިން ގުނަ މަސައްކަތް ތިން އަހަރު ތެރޭގައި މި ސަރުކާރުން ކޮށްފައިވާ ކަމަށް ޝަރީފު ވިދާޅުވި އެވެ.
ޝަރީފް އިތުރަށް ވިދާޅުވީ ރާއްޖޭގައި ތަރައްގީގެ ގިނަ މަސައްކަތް ކުރެއްވީ ކުރީގެ ރައީސް އަބްދުﷲ ޔާމީން ކަަމަށް މީގެ ކުރިން ހީކުރެވުނު ނަމަވެސް ރައީސް ޞާލިހު ވަނީ ތަރައްގީގެ މާ އުސްމިންގަނޑެއް ކަނޑައަޅުއްވާފައި ކަމަށެވެ.
"އަޅުގަނޑުމެން މީގެ ކުރިން ހީކުރީ، މީގެ ކުރީގެ ދައުރުގައި ރާއްޖޭގެ ވެރިކަން ކުރެއްވި ރައީސް ޔާމީން އޭ ރާއްޖޭގެ ތަރައްގީގެ އެންމެ ގިނަ މަސައްކަތް ކުރެއްވީ. ނޫން. އަޅުގަނޑުމެންނަށް ރާއްޖޭގެ މިހާރުގެ ރައީސުލްޖުމްހޫރިއްޔާ، އަޅުގަނޑުމެންގެ ރިޔާސީ ކެންޑިޑޭޓް ވަނީ، އެއަށްވުރެ މާ އުސްމިންގަޑެއް ކަނޑަ އަޅުއްްވާފައި. އަޅުގަނޑުމެންގެ ދެ ދައުރު ހަމަ ކޮށްފައި ދެން އަންނަ ރައީސް އަކަށް، ރާއްޖޭގެ ތަރައްގީގައި އިތުރަށް ކުރާނެ މަސައްކަތް ތަކެއް އަޅުގަނޑުމެން ނުބާއްވާނަން"
ސްޓެލްކޯގެ މެނޭޖިން ޑިރެކްޓަރު އަހުމަދު ޝަރީފް
މިފަދަ ސަބަބު ތަކަށްޓަކައި ރައީސް ޞާލިހު ދެވަނަ ދައުރަކަށް އިންތިހާބު ކުރައްވަންޖެހޭ ކަމަށާ، އިންތިހާބުގައި ވޯޓު ލާއިރު އެމަނިކުފާނަށް ވޯޓު ދެއްވުމަށް ޝަރީފު އެދިވަޑައިގެންނެވިއެވެ.
Advertisement
This content is created and paid for by advertisers and does not involve Voice Journalists
