ކޮރަޕްޝަނަށް "ޒީރޯ ޓޮލަރެންސް" ސިޔާސަތު ހިއްޕަވައިގެން ވެރިކަމަށް ވަޑައިގެން ނަމަވެސް މިއަދު ރައީސުލްޖުމްހޫރިއްޔާ އިބްރާހިމް މުޙާއްމަދު ޞާލިހު ގެންގުޅުއްވަނީ ކޮރަޕްޝަން އާންމު ކުރުމުގެ ސިޔާސަތުކަމަށް ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވެއްޖެ އެވެ.
ހަސަން ލަތީފު މިފަދައިން ވިދާޅުވެފައިވަނީ އެމްޑީޕީގެ ކުރީގެ ރައީސް އަދި މަޖިލީހުގެ ރައީސް މުޙައްމަދު ނަޝީދު ދަ ޑިމޮކްރެޓްސްއާއި ގުޅިވަޑައިގަތުމަށް ބޭއްވި ޚާއްސަ ޖަލްސާގައި ވާހަކަދައްކަވަމުން ނެވެ.
ހަސަން ލަތީފުގެ ވާހަކަފުޅު ފައްޓަވަމުން ވިދާޅުވީ ސަރުކާރު ހިންގާ މައި ޕާޓީއިން ގިނަ އަދަދެއްގެ ބަޔަކު ވަކިވާން ނިންމީ އެ ޕާޓީއިން ހިފަހައްޓަމުން އައި އަސާސްތައް ދޫކޮށްލާ މުޅިން އެހެން "ވިޔަފާރި" އެއް ޕާޓީން ފެއްޓުމާއި ގުޅިގެން ކަމަށެވެ.
އެގޮތުން މިހާރު އެ ޕާޓީ ބިނާވެފައިވާ މައިގަނޑު އަސާސްތަކަކީ ވައްކަމާއި ކޮރަޕްޝަނަށް ހަދާފައިވާ ކަމަށާއި، ވައްކަމާއި ކޮރަޕްޝަނާއި ނުލާ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ސަރުކާރުގެ އެއްވެސް މަޝްރޫއެއްގެ އުންސުރު ފުރިހަމަ ވެސް ނުވާކަމަށް ހަސަން ލަތީފު ވިދާޅުވި އެވެ.
އޭނާ ވިދާޅުވީ ވައްކަމާއި ކޮރަޕްޝަން ނުހިމެނޭ ނަމަ މިއަދު ސަރުކާރުން ރައްޔިތަކަށް ފޯރުކޮށްދޭ ޚިދުމަތްތައް ވެސް ހުއްޓާލާ ކަމަށެވެ. އަދި މިއަދު ރައީސް ޞާލިހު ގެންގުޅުއްވާ ސިޔާސަތަކީ ވެސް ވައްކަމާއި ކޮރަޕްޝަން އާންމު ކުރުންކަމަށް އޭނާ ފާހަގަކުރެއްވި އެވެ.
"ސަރުކާރުން ކޮށްދޭ ޚިދުމަތުގައި ކޮރަޕްޝަނުގެ އުންސުރު ހަމަނުވާ ކަމަށް ވަންޏާ ރައްޔިތަކަށް ފަސޭހައިން ކަމެއް ވާކަމަށް ނޯވޭ. އެއީ މި ސަރުކާރުން ގެންގުޅޭ ސިޔާސަތަކީ. ކޮރަޕްޝަން އާންމު ކުރުން އެއީ ރައީސް ޞާލިހުގެ މިއަދުގެ ސިޔާސަތަކީ"
ހެންވޭރު ހުޅަނގު ދާއިރާގެ މެމްބަރު ހަސަން ލަތީފު
ހަސަން ލަތީފު ވިދާޅުވީ ދަ ޑިމޮކްރެޓްސްގެ ނަމުގައި އާ ސިޔާސީ ޕާޓީއެއް އުފައްދަން ޖެހުނީ އެފަދަ އެތައް ސަބަބުތަކެއް ހުރުމުން ކަމަށެވެ.
ވައްކަމާއި ކޮރަޕްޝަން އިންތިހާއަށް އިތުރުވެގެން ދިއުމާއި، ރައީސް ޞާލިހަށް ތާއީދު ނުކުރާ އެންމެން ޕާޓީން އެމްޑީޕީން ވަކިކުރަން ފެށުމަކީ ވެސް އާ ސިޔާސީ ޕާޓީއެއް އުފައްދަން ޖެހުނު ސަބަބުތަކުގެ ތެރޭގައި ހިމެނޭ ސަބަބެއް ކަމަށް ހަސަން ލަތީފު ވިދާޅުވި އެވެ.
އެކަންކަން ފާހަގަކުރައްވާ ހަސަން ލަތީފު ވިދާޅުވީ ދަ ޑިމޮކްރެޓްސް އޮންނާނީ ވާދަވެރި ސިޔާސީ ޕާޓީއެއްގެ ގޮތުގައި ކަމަށެެވެ. އަދި ސަރުކާރަށް ފާރަވެރިވާ ސިޔާސީ ޕާޓީއެއްގެ ގޮތުގައި ކަމަށެވެ.
އެ ޕާޓީން އަބަދުވެސް މަސައްކަތް ކުރާނީ އެމްޑީޕީ ވެސް އުފެއްދި އަސާސްތައް ހިފަހައްޓާ ރައްޔިތުންގެ މަސްލަހަތު ކުރިއަށް ނެރެގެންކަމަށް ހަސަން ލަތީފުގެ ވާހަކައިގައި ވަނީ ފާހަގަކުރައްވާފަ އެވެ.
Advertisement
This content is created and paid for by advertisers and does not involve Voice Journalists
