ސަރުކާރު ހިންގާ މައި ޕާޓީއާއި އެކު ކޯލިޝަން ހަދައި ރިޔާސީ ރޭހަށް ނިކުންނައިރު އެންމެ އުފާވަނީ އެ ޕާޓީ ތެރޭގައި މީގެ ކުރިން އޮތް "ލާދީނީ ފިކުރު" މިހާރު ނެތި ދިއުމުންކަމަށް އެމްޑީއޭގެ ރައީސް އަހުމަދު ސިޔާމު މުޙައްމަދު ވިދާޅުވެއްޖެ އެވެ. 

ސިޔާމު މިފަދައިން ވިދާޅުވެފައިވަނީ މާފުށީގައި އޮތް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން ނެވެ. 

ސިޔާމު ވިދާޅުވީ މީގެ ކުރިން ވެރިކަން ކުރެއްވި ބައެއް ރައީސުލް އިސްލާމްދީނަށް ފުރައްސާރަކުރުމާއި ކީރިތި މާތް ނަބިއްޔާއަށް ކުޑައިމީސް ވާ ގޮތަށް އެތައް ފަހަރެއްގެ މަތިން ވާހަކަފުޅު ދައްކަވާފައިވާކަން ރައްޔިތުންގެ ހަނދާނުގައި ހުންނާނެ ކަމަށެވެ. 

Advertisement

އެގޮތުން ރާއްޖެއިން ބޭރުގެ ގައުމުތަކަށް ވަޑައިގެން ވެސް އެ މޭރުމުން ވާހަކަފުޅު ދައްކަވާފައިވާކަމަށް ސިޔާމު ވިދާޅުވި އެވެ. 

ވަކި ބޭފުޅެއްގެ ނަން ވިދާޅު ނުވި ނަމަވެސް ޝިޔާމު އެ ނިސްބަތްކުރެއްވީ އެމްޑީޕީގެ ފުރަތަމަ ރައީސް މުޙައްމަދު ނަޝީދަށްކަން އެނގެއެވެ. އެއީ ނަޝީދު ޑެންމާކުގައި ހުންނަވާ ދައްކަވާފައިވާ އިސްލާމްދީނާއި ބީރައްޓެހި ވާހަކަފުޅުތަކުގެ ސަބަބުން އެމަނިކުފާނަށް ދީނީ އިލްމުވެރިންގެ ބޮޑެތި ފާޑުކިޔުންތަކެއް އަމާޒުވެގެން ދިޔައެވެ. 

ނަޝީދުގެ އިސްތަށުފުޅުގައި "ލާދީނީ" ޓެގު އެޅުވިގެން ދިޔައީ ވެސް އެ ދުވަސްވަރު އެމަނިކުފާނު ދެއްކެވި ބައެއް ވާހަކަފުޅުތަކާއި ގުޅުވާ ބައެއް ސިޔާސީ ޕާޓީތަކުގައި ތިއްބެވި ދީނީ އިލްމުވެރިންގެ ފާޑުކިޔުންތަކުގެ ތެރެއިން ނެވެ. 

އެކަންކަމަށް އިޝާރާތްކުރައްވާ ސިޔާމު ވިދާޅުވީ އެމްޑީޕީއާއި އެކު މިއަދު ކޯލިޝަން ހަދައިގެން ތިބިއިރު ލިބޭ އެންމެ ބޮޑު ހިތްހަމަޖެހުމަކީ އެމްޑީޕީގައި އޭރު އޮތް ލާދީނީ ފިކުރު މިހާރު ޕާޓީތެރެއިން ނެތިގެން ގޮސްފައިވާތީ އެވެ. 

ރައީސް ނަޝީދު ދަ ޑިމޮކްރެޓްސްއާއި ގުޅިވަޑައިގެން ޖަލްސާގެ ތެރެއިން

ސިޔާމު މިފަދައިން ވިދާޅުވެފައިވާއިރު އެމްޑީޕީގެ ރައީސްގެ މަޤާމުގައި ހުންނެވުމަށްފަހު ނަޝީދު ވަނީ އެ ޕާޓީ ދޫކުރައްވާ ވަޑައިގެންފަ އެވެ. އަދި ނަޝީދަށް ތާއީދުކުރާ ގިނަ މެމްބަރުންތަކެއް ވެސް ވަނީ އެ ޕާޓީ ދޫކުރައްވާ ވަަޑައިގެން އާ ސިޔާސީ ޕާޓީއެއް އުފައްދަވާފައެވެ. 

އެމްޑީޕީ ތެރޭގައި އޮތް ލާދީނީ ފިކުރު ނެތިގެން ދިޔަކަމަށް ސިޔާމް އެ އިޝާރާތްކުރެއްވީ ނަޝީދާއި އޭނާގެ ވަފާތެރިން އެމްޑީޕީން ނިކުތުމަށްކަމަށް ބެލެވެއެވެ.