ރައީސް އިބްރާހިމް މުޙައްމަދު ޞާލިޙް ވ ކެޔޮދުއަށް ވަޑައިގެންފިއެވެ.

ރައީސް ކެޔޮދުއަށް މި ވަޑައިގަތީ ރިޔާސީ އިންތިޚާބުގެ ކެމްޕޭނު ދަތުރުފުޅެއްގައި މ އަތޮޅަށާއި ވ އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ.

މިއަދު ރައީސް އެންމެ ފުރަތަމަ ވަޑައިގަތީ ވ ރަކީދޫއަށެވެ. ރަކީދޫ އަށް ވަޑައިގެން އެރަށު ބަނދަރު ހުޅުވައިދެއްވައިފައިވެއެވެ. އަދި އެރަށުގެ ގޮނޑުދޮށް ހިމާޔަތް ކުރުމަށް ކުރިޔަށް ގެންދިޔަ މަޝްރޫޢުގެ ނިމުން ވަނީ ފާހަގަކޮށްދެއްވައިފައެވެ.

އެރަށަށް ވަޑައިގެން އެރަށުގެ ރައްޔިތުންނާއި ރައީސް ޞާލިޙް ވަނީ ބައްދަލު ކުރައްވަވާފައެވެ.

ރިޔާސީ އިންތިޚާބުގެ ކެމްޕޭނަށް ރައީސް ޞާލިޙް ކުރައްވަމުން މިގެންދަވާ ދަތުރުފުޅުގައި 15 ޖުލައި ގައި ވަނީ މ ކޮޅުފުށި، ނާލާފުށި، މުލި އަދި މުލަކަށް ވަޑައިގެންފައިވެއެވެ. އަދި އިއްޔެ މ ވޭވަށް، ރަތްމަންދޫ، ދިއްގަރު އަދި މަޑުއްވަރިއަށް ވަޑައިގެންފައިވެއެވެ.

މިއަދު ރައީސް ވަޑައިގެންނެވުމަށް ހަމަޖެހިފައިވަނީ ވ ރަކީދޫ، ކެޔޮދޫ، ފެލިދޫ، ތިނަދޫ އަދި ފުލިދުއަށެވެ.

ރިޔާސީ ކެމްޕޭނުގެ ތެރެއިން ރައީސް މިދިޔަ ހަފްތަގައި ވަނީ ށ އަދި ކ ގެ ބައެއް ރަށްރަށަށްވެސް ވަޑައިގެންފައެވެ.