ރާއްޖޭގައި ހިންގާ ފަތުރުވެރިކަމުގެ އެންމެ ބިޔަ މަޝްރޫއު، ލަސްތަކެއް ނުވެ ވ އަތޮޅުގައި ފަށްޓަވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ރިޔާސީ އިންތިހާބުގެ ކެމްޕޭންގައި ވ. ކެޔޮދޫއަށް ވަޑައިގެން ވާހަކަފުޅު ދައްކަވަމުން ރައީސް ޞާލިހު މިއަދު ވިދާޅުވީ ވ އަތޮޅަކީ އާބާދީގެ ގޮތުން މީސްކޮޅު މަދު ރަށެއް ނަމަވެސް، އެ އަތޮޅުގައި އިގްތިޞާދީ ގޮތުން ގިނަ މަސައްކަތް ތަކެއް ކުރުމަށް ސަރުކާރުން ރާވާފައިވާ ކަމަށެވެ. އެގޮތުން ލަސްތަކެއްނުވެ ރާއްޖޭގައި ހިންގާ ޓޫރިޒަމްގެ އެންމެ ބޮޑު މަޝްރޫއު އެ އަތޮޅުގައި ފަށްޓަވާނެ ކަމަށް ރައީސް ޞާލިހު ވިދާޅުވި އެވެ.
"ރާއްޖޭގައި ހިންގާ ޓޫރިޒަމްގެ އެންމެ ބޮޑު އެއް މަޝްރޫއު އިރާދަކުރެއްވިޔާ ލަސްތަކެއް ނުވެ މި އަތޮޅުގައި ފެށިގެންދާނެ. އަޅުގަނޑު އޭގެ ތަފްސީލް ތައް އިރާދަކުރެއްވިޔާ ކުރިއަށް އޮތް ތަނުގައި ތިޔަ ބޭފުޅުންނަށް ދެމުން ގެންދާނަން. ޓޫރިޒަމްގެ ބޮޑު އެ މަޝްރޫއު ފެށިގެންދާއިރުގައި ވައިގެ މަގުން މި އަތޮޅާއި ގުޅިގެންދާނެ،"
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ރައީސް ސޯލިހު ވިދާޅުވީ މަޝްރޫއުގެ ބައެއް އެއްބަސްވުންތަކުގައި ސޮއިކުރެވިފައިވާ ކަމަށާއި މާދަމާ އޮންނަ އިކޮނޮމިކް ކައުންސިލްގައި ބައެއް އިތުރު ކަންކަން ނިމިގެންދާނެ ކަމަށެވެެ. އަދި އެއަށްފަހު އޮންނާނީ އަމަލީގޮތުން ކުރަންޖެހޭ ކަންކަން ފެށުން ކަމަށްވެސް ވިދާޅުވި އެވެ.
މިއާއެކު ރައީސް ޞާލިހް ވިދާޅުވީ އެ ހުރިހާ ކަމެއް ނިމިގެން ދާއިރު، ވ. އަތޮޅުގައި ޕިކްނިކް އައިލެންޑެއް ހައްދަވާނެ ކަމަށެވެ.
ވ އަތޮޅަކީ ރާއްޖޭގައި އޮތް އާބާދީގެ ގޮތުން އެންމެ ކުޑަ އަތޮޅު ނަމަވެސް މިހާރު ރާއްޖޭގައި ގެސްޓްހައުސްގެ ވިޔަފާރި އެންމެ ބޮޑަށް ފުޅާވަމުންދާ އެއް އަތޮޅަކީވެސް އެ އަތޮޅެވެ. ކުރީގެ ސަރުކާރުތަކުން ވަނީ ވ. އަތޮޅު ބޮޑުމޮހޮރާގައި ފަތުރުވެރިކަމުގެ ބޮޑު މަޝްރޫއެއް ހިންގަން އިއުލާނުކުރި އެވެ. ނަމަވެސް އަމަލީ އެއްވެސް މަސައްކަތެއް ކޮށްފައިނުވެ އެވެ.
Advertisement
This content is created and paid for by advertisers and does not involve Voice Journalists
