މި ސަރުކާރުން ވ. ފޮއްތެޔޮ ފަޅު ނުއަގުގައި ވިއްކާލުމަށް ކުރަމުންދާ މަސައްކަތް ހުއްޓާލުމަށާއި، އެފަޅު ވިއްކާލިޔަސް، ޕީޕީއެމްގެ ވެރިކަމެއްގައި އަނބުރާ ސަރުކާރަށް ހޯދާނެކަމަށް ޕްރޮގްރެސިވް ކޮންގްރެސް ކޯލިޝަނުން (އިދިކޮޅުން) ބުނެފި އެވެ. 

އިދިކޮޅު ކޯލިޝަނުން މިފަދައިން ބުނެފައިވަނީ ފޮއްތެޔޮ ފަޅު ވިއްކާލުމަށް ސަރުކާރުން މަސައްކަތްކުރަމުން ދިއުމާއި ގުޅިގެން ކަންބޮޑުވުން ފާޅުކޮށް އެ ކޯލިޝަނުން ނެރުނު ބަޔާނެއްގަ އެވެ. 

އިދިކޮޅު ކޯލިޝަނުން ބުނީ ވ. ފޮއްތެޔޮ ފަޅަކީ ރާއްޖޭގައި އޮތް އެންމެ ބޮޑު އަދި މުޅި ދުނިޔޭގެ 3 ވަނައަށް އެންމެ ބޮޑު ފަޅުކަމަށް ވާއިރު، މި ސަރުކާރުން ނުއަގުގައި އެ ފަޅު ވިއްކާލަން އުޅޭކަމުގެ މައުލޫމާތު އެ ކޯލިޝަން ލިބިފައިވާކަމަށެވެ. އަދި އެ ފަޅު ވިއްކާލަނީ އެމްޑީޕީގެ ރިޔާސީ ކެންޑިޑޭޓު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ރިޔާސީ އިންތިޚާބުގެ ކެމްޕޭނަށް ޚަރަދުކުރާނެ ފައިސާ ހޯދުމަށްކަން ވެސް އެ ކޯލިޝަނަށް އެނގިފައިވާ ކަމަށެވެ. 

އިދިކޮޅުން ބުނީ ރައީސް ޞާލިހުގެ ވެރިކަން ނިމެން މަދު ދުވަސްކޮޅަކަށް ވެފައިވަނިކޮށް ދިވެހިރައްޔިތުންގެ ހަރުމުދާ ވަކި ބަޔަކަށް މަންފާވާ ގޮތަށް ވިއްކާލުމަކީ ފަހަރެއްގައި ވެސް އެ ކޯލިޝަނުން ބަލައިގަންނާނެ، އަދި ރައްޔިތުން ވެސް ބަލައިގަންނާނެ ކަމެއް ނޫން ކަމަށެވެ. 

އޭގެ އިތުރުން އެކަމަކީ ކަނޑައެޅިގެން ދިވެހިރާއްޖޭގެ ޤާނޫނާއި ޚިލާފުކަމަށް ވާތީ މިހާރުން މިހާރަށް އެކަން ހުއްޓާލުމަށް އިދިކޮޅުން ވަނީ ސަރުކާރަށް ގޮވާލާފަ އެވެ. 

އެއާއެކު އިދިކޮޅުން ވަނީ ފޮއްޔެތޮ ފަޅު ވިއްކާލުމަށް ސަރުކާރުން ކުރަމުންދާ ކަންކަން، އަވަސްކޮށް ތަހުގީގުކުރުމަށް އެންޓި ކޮރަޕްޝަން ކޮމިޝަނަށް ގޮވާލާފަ އެވެ. 

އެކަންކަން ފާހަގަކޮށް އިދިކޮޅުން ބުނީ ކޮރަޕްޝަނަށް މަގުފަހިވާގޮތަށް، އަދި ނުއަގުގައި ރައްޔިތުންނަށް ގެއްލުންވާ ގޮތަށް މި ސަރުކާރުން ހަދާ އެއްބަސްވުންތައް ބާތިލުކޮށް އެފަދަ ތަންތަން ދޫކޮށްފައިވާ ފަރާތްތަކުގެ އަތުން އެ ތަންތަން ޕީޕީއެމްގެ ވެރިކަމެއްގައި އަތުލާނެކަމުގެ ޔަގީންކަން ދެއްވާކަމަ ށެވެ. 

އެހެންކަމުން ކުންފުނިތަކުން ވެސް ޤާނޫނާއި ޚިލާފަށް ނުއަގުގައި ދޫކުރެވޭ ތަންތަނާއި ހަވާލުވުމުގެ ބަދަލުގައި އެފަދަ އެއްބަސްވުންތަކާއި ދުރުވުމަށް އިދިކޮޅު ކޯލިޝަނުން ވަނީ ގޮވާލާފަ އެވެ. 

އިދިކޮޅުން ބުނީ އެފަދަ މުއާމަލާތްތަކުގައި ބައިވެރިވާ ސަރުކާރުގެ އެކިއެކި ފަރާތްތަކާއި ޤާނޫނު އަރާ ހަމަކުރާނެކަން ވިސްނަވައިގެން ތިއްބެވުމަށް ވެސް ގޮވާލާކަމަ ށެވެ.