ސަރުކާރުގެ އިސްވެރިންގެ ކުންފުނިތަކަށް މަޝްރޫއުތައް ދީގެން މި ސަރުކާރަށް ކްލާސް ރޫމެއް ހަދާ ނިމެނީ ހަތަރު ފަސް ކޮޓަރީގެ ގެއެއް އަޅާ ނިންމާހާ ބޮޑު ޚަރަދުކޮށްގެން ކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުޙައްމަދު ވަހީދު (ވައްޑެ) ވިދާޅުވެއްޖެ އެވެ. 

ވަހީދު މިފަދައިން ވިދާޅުވެފައި ވަނީ ސަރުކާރުން ހިންގާ އެންމެ އާދައިގެ މަޝްރޫއުތަކުގެ ޚަރަދުތައް ވެސް އިންތިހާއަށް ބޮޑުކަން ފާހަގަކުރައްވާ ކުރެއްވި ޓްވީޓެއްގަ އެވެ. 

ވަހީދު ވިދާޅުވީ (ސަރުކާރަށް ތާއީދުކުރާ) ރައްޔިތުންގެ މަޖިލީހުގެ ކޮންމެވެސް މެމްބަރެއްގެ ނުވަތަ ސަރުކާރުގެ އިސްވެރިއެއްގެ ކުންފުންޏަކާއި ސަރުކާރުގެ ޕްރޮޖެކްޓުތައް ހަވާލުކުރުމުގެ ނަތީޖާއަށް ވަގެންދަނީ އާދައިގެ ކްލާސްރޫމެއް ހަދަން ތިން، ހަތަރު ކޮޓަރީގެ ގެއެއް އަޅަންކުރާ ޚަރަދު ކުރަން ޖެހުން ކަމަށެވެ. 

އެކަން ފާހަގަކުރައްވާ ވަހީދު ވިދާޅުވީ ކުދި ކުދި މަޝްރޫއުތަކަށް ބޮޑެތި ޚަރަދުތައް ސަރުކާރުން ކުރަމުންދާއިރު އެ ޚަރަދުތައް ކުރަމުންދަނީ ރައްޔިތުންގެ ފައިސާއިން ކަމަށެވެ. 

އެހެންކަމުން ރައްޔިތުންގެ ފައިސާ އިސްރާފުވާގޮތަށް ޕްރޮޖެކްޓުތައް ހިންގުމުގެ ނަމުގައި ސަރުކާރުގެ އިސްވެރިންގެ ކުންފުނިތަކަށް މި ސަރުކާރުން ކުރަމުންދާ ބޮޑު ޚަރަދާއި ދޭތެރޭގައި ރައްޔިތުން ވަރަށް ފުންކޮށް ވިސްނަން ޖެހޭކަމަށް ވަހީދު ވިދާޅުވި އެވެ. 

އޭނާ މިފަދައިން ވިދާޅުވެފައިވާއިރު، އެކި ފަރާތްތަކާއި ހަވާލުކޮށްގެން ރަށްރަށުގައި ހިންގާ ޕީއެސްއައިޕީ ޕްރޮޖެކްޓުތައް ނުނިމި ދިގުލައިގެންދާ ކަމުގެ ޝަކުވާތައް ރައްޔިތުން ދަނީ އުފުލަމުން ނެވެ. 

ރައީސް ޞާލިހު ރިޔާސީ ކެމްޮޕޭނަށް މ އަދި ވ އަތޮޅަށް ކުރެއްވި ދަތުރުފުޅުގައި ވެސް ރަށްރަށުގައި ފަށާފައިވާ މަޝްރޫއުތައް ނުނިމި ދިގުލައިގެންދާކަމުގެ ޝަކުވާތައް ވަނީ ރައީސް ޞާލިހާއި ހިއްސާކުރައްވާފަ އެވެ.