ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ވެރިކަމުގެ ދެވަނަ ދައުރެއްގައި މަގުމަތީގައި މުޒާހަރާކޮށް އަޑުއފުލުމުގެ ފުރުސަތު ނުދެއްވާނެކަމަށް ވިދާޅުވެ ހޯމް މިނިސްޓަރު އަދި ސަރުކާރުގެ ކޯލިޝަން ޕާޓުނަރު އަދާލަތު ޕާޓީގެ ރައީސް އިމްރާނު އަބްދުالله ދެއްކެވި ވާހަކަތަކަށް ކުރީގެ ޖެންޑާ މިނިސްޓަރު ޝިދާތާ ޝަރީފު ރައްދުދެއްވައިފި އެވެ. 

ރައީސް ޞާލިހު މ އަތޮޅަށް ކުރެއްވި ދަތުރުފުޅުގައި އެ އަތިޅުގެ ބައެއް ރަށްތަކުން އެމަނިކުފާނާއި ދެކޮޅަށް މުޒާހަރާކޮށް، އެމަނިކުފާނުގެ އިސްތިއުފާއަށް ގޮވާލުމާއި ގުޅިގެން އިމްރާނު ވަނީ ނުރުހުން ފާޅުކުރައްވާފަ އެވެ. 

އެގޮތުން  ދިއްގަރުގައި ބޭއްވި ޖަލްސާއެއްގައި ވާހަކަދައްކަވަމުން އިމްރާނު ވިދާޅިވީ ސިޔާސީ މަސައްކަތް ކުރުމަށް މަގުމަތީގައި މުޒާހަރާކުރުމަކީ މި ޒަމާނާއި ފެތޭކަމެއް ނޫން ކަމަށެވެ. އަދި ރައީސް ޞާލިހުގެ ދެވަނަ ދައުރެއްގައި އެފަދައިން މަގުމަތީ ހަރަކާތްތައް ހިންގުމަށް ފުރުސަތު ނުދެއްވާނެ ކަމަށެވެ. 

Advertisement

ހޯމް މިނިސްޓަރު އިމްރާނު

އިމްރާނުގެ އެ ވާހަކަތަކަށް ޝިދާތާ ވަނީ ޓްވީޓާގައި ރައްދުދެއްވާފަ އެވެ. ޝިދާތާއަކީ އަދާލަތު ޕާޓީގައި މީގެ ކުރިން ހުންނެވި ބޭފުޅެކެވެ. 

އެގޮތުން ޝިދާތާ ވިދާޅުވީ މުޒާހަރާއާއި ދެކޮޅަށް މިއަދު ވަކާލާ ކުރައްވަމުން ގެންދަވާއިރު، ހޯމް މިނިސްޓަރު އިމްރާނު ވެސް ޖަލު ބަންދުން ސަލާމަތް ވެގެންދިޔައީ ރައްޔިތުންތަކެއް ނިކުމެ ކުރި މުޒާހަރާތަކުގެ ސަބަބުން ކަމަށެވެ. 

ރައީސް ޔާމިނުގެ ޒައާމަތުގައި އިމްރާނުގެ މައްޗަށް ޖަލު ހުކުމެއް އިއްވާ ޖަލުގައި ބަންދުކުރުމާއި ގުޅިގެން ރައްޔިތުން ފުރަމާލޭގައި ވަރުގަދަ މުޒާހަރާތަކެއް ކޮށްފައިވެއެވެ. ޝިދާތާގެ ޓްވީޓުގައި އިޝާރާތްކުރީ ކުރީގެ ސަރުކާރުގައި އިދިކޮޅުގައި ތިބިގެން ހިންގި މުޒާހަރާތަކަށެވެ. 

ޝިދާތާ ޝަރީފު

ޝިދާތާގެ އެ ޓްވީޓުގައި ވަނީ ރައީސް ޞާލިހާއި މިނިސްޓަރު އިމްރާނު ވެސް ޓެގުކުރައްވާފަ އެވެ.

ރައީސް ޞާލިހުގެ ދެވަނަ ދައުރެއްގައި މުޒާހަރާކޮށް މަގުމަތީ ހަރަކާތްތައް ހުއްޓުވާނެކަމަށް ވިދާޅުވެ އިމްރާނު ދެއްކެވި ވާހަކަތަކަށް ގިނަބައެއްގެ ނުރުހުން އަމާޒުވެފައިވާއިރު، މިނިސްޓަރު އިމްރާނަކީ ވެސް އިދިކޮޅުގައި ހުންނެވި އިރު އޭރުގެ ސަރުކާރާއި ދެކޮޅަށް ކުރި ބޮޑެތި މުޒާހަރާތައް ލީޑުކުރި ބޭފުޅެކެވެ. 

އަދި އޭރު ބޭއްވި މުޒާހަރާތަކުގައި އިމްރާނު ވަނީ ކުރީގެ ރައީސް ޔާމިނުގެ އިސްތަށިފުޅުގައި ޑރ އަފްރާޝީމްގެ ގަތުލާއި ގުޅިގެން ބޮޑެތި އިލްޒާމުތައް އަޅުވާފައެވެ.