އިކޮނޮމިކް މިނިސްޓްރީގެ ސީނިއަރ އެގްޒެކެޓިވް ޑައިރެކްޓަރުގެ މަގާމްގައި ހުރި އެމްޑީޕީގެ މީސް މީޑިއާ އެކްޓިވިސްޓު އަހުމަދު އަންވަރު (ސިމްވާރު) ސަރުކާރުން އިސްތިއުފާދީ، އެމްޑީޕީގެ ކުރީގެ ރައީސް ނަޝީދު އުފައްދަވާފައިވާ ޑިމޮކްރެޓްސް ޕާޓީއާއި ގުޅިއްޖެއެވެ.

ސިމްވާރު ސަރުކާރުން އިސްތިއުފާދިންކަން ހާމަކޮށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހަށް އެޑްރެސްކޮށް ފޮނުވި ސިޓީގައި ވަނީ މިސަރުކާރުގައި މަސައްކަތް ކުރުމަށް ދެއްވި ފުރުސަތާއި އަދި ބެހެއްޓި ގާތްކަމަށް ޝުކުރު ދަންނަވާފައެވެ. 

ސިމްވާރަކީ އެމްޑީޕީން ވަކިވެ ނަޝީދުގެ ޑިމޮކްރެޓްސް އަށް ސޮއި ކޮށްފައިވާއިރު ، އެމްޑީޕީގެ ޕްރައިމަރީގައި އޭނާ ތާއީދު ކޮށްފައިވަނީ ރައީސް ޞާލިހަށް ކަން ފާހަގަކޮށްލަން ޖެހެއެވެ. އަދި އިސްތިއުފާ ދިނުމުގެ ކުރިން އޭނާ އަކީ ރައީސް ޞާލިހަށް ތާއީދުކޮށް މީސް މީޑިއާގައި ވަރަށް ހަރަކާތްތެރިކޮށް އުޅުނު މީހެއްކަން ފާހަގަކޮށްލަން ޖެހެއެވެ. 

އެމްޑީޕީން އިސްތިއުފާ ދިނުމަށްފަހު އޭނާ މިހާރު ހަރަކާތްތެރިވަމުންދަނީ ޑިމޮކްރެޓްސް ގެ ސިޔާސަތު 'ފަސޭހަ ވިޔަފާރި' ލޯންޗް ކުރަމުގެ މަސައްކަތުގައި އަތޮޅު ތެރޭގައެވެ. 

ސިމްވާރު ގެ އިތުރުންވެސް އެމްޑީޕީގެ މެންބަރުންގެ ތެރެއިން ސަރުކާރުގެ މަގާމުތަކުގައި ތިބި ގިނަ މެންބަރުންތަކެއް އިސްތިއުފާދީ ޑިމޮކްރެޓްސް އާއި ވަނީ ގުޅިފައެވެ.