ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ރަނިންމޭޓު ކަމަށް ޚާރިޖީ ވަޒީރު ޢަބްދުالله ޝާހިދު، ކަނޑައަޅުއްވައިފި ނަމަ، އެމަނިކުފާނުގެ ރައީސް ކަމުގެ ދައުރު ފުރިހަމަ ކުރިޔަ ނުދެއްވާނެ ކަމަށް މަހިބަދޫ ދާއިރާގެ މެންބަރު އަހުމަދު ޠާރިގު ވިދާޅުވެއްޖެއެވެ.

ކުރިއަށް އޮތް ރިޔާސީ އިންތިހާބުގައި، އެމްޑީޕީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ރަނިންމޭޓް ކަމަށް ކަނޑައަޅާނެ ބޭފުޅަކާއި ގުޅޭގޮތުން ކޮންމެ ރެއަކުހެން އެކި ބޭފުޅުންނާއި މަޝްވަރާތައް ކުރައްވާ ކަމަށާ، އަދި އެ ބޭފުޅުން އެކި ނަންތައް ހުށަހަޅުއްވަމުން ގެންދަވާ ކަމަށް އިއްޔެ ރައީސް ޞާލިހު ވަނީ ވިދާޅުވެފަ އެވެ. 

އެކަމާއި ގުޅިގެން ތާރިގު ކުރެއްވި ޓްވީޓެއްގައި ވިދާޅުވީ ރަނިންގމޭޓް ނެގުމުގައި ރައީސް ޞާލިހަށް އިހުތިޔާރެއް ނެތް ކަމަށެވެ. އެ މަގާމަށް މިނިސްޓަރު ޝާހިދު ކަނޑައެޅުއްވުން ނޫން ގޮތެއް ނެތް ކަމަށްވެސް ޠާރިގު ވިދާޅުވި އެވެ. 

"އޮތް ހަމައެކަނި ގޮތަކީ ޝާހިދު ނެގުމެވެ. ބިރަކީ ޝާހިދު ނާއިބު ރައީސްއަކަށް ވެއްޖެނަމަ މަނިކުފާނު އެ ދައުރެއް ފުރިހަމަ ކުރިޔަކަނުދޭނެކަމުގެ ބިރެވެ." ޠާރިގު ވިދާޅުވި އެވެ. 

މަހިބަދޫ ދާއިރާގެ މެންބަރު އަހުމަދު ޠާރިގު--

ރިޔާސީ އިންތިޚާބުގެ ކެމްޕެއިނަށް ވ އަދި މ އަތޮޅަށް ކުރެއްވި ދަތުރުފުޅު ނިންމަވާލައްވަމުން ނޫސްވެރިންގެ ސުވާލުތަކަށް ޖަވާބު ދެއްވަމުން ރައީސް ޞާލިހު ވިދާޅުވީ، އެމަނިކުފާނު މިވަގުތު ކުރައްވަން އޮތް ކަންކަމުގެ ތެރެއިން އެންމެ އުނދަގޫ ކަމަކީ ރަނިންމޭޓް ކަނޑައެޅުމުގެ މަސައްކަތް ކަމަށެވެ. އެހެންކަމުން، އެކަމާއި ގުޅިގެން އެމްޑީޕީގެ އިސް ފަރާތްތަކާއި ކޮންމެ ރެއަކުހެން މަޝްވަރާ ކުރައްވަމުން ގެންދަވާ ކަމަށާ، އަދި އެބޭފުޅުން އެކި ނަންތައް ހުށަހަޅުއްވަމުން ގެންދަވާ ކަމަށް އެމަނިކުފާނު ވިދާޅުވިއެވެ. 

"އަޅުގަނޑު ސިކުނޑީގައި މިވަގުތި އިން އެންމެ ބޮޑު މައްސަލަ. މައްސަލައޭ މި ދެންނެވީ ޑިސިޝަނެއް ނަގަން ޖެހިފައި އޮތް މައްސަލަ. އަޅުގަނޑު ވަކިވަކިން ޕާޓީގެ އިސްބޭފުޅުންނާ އެބަ ވާހަކަ ދައްކަން. އެ ބޭފުޅުންގެ ވިސްނުމާ ހިޔާލު އަޅުގަނޑު އެބަ ހޯދަން. ކޮންމެ ދުވަހަކު ކޮންމެ ރެއަކު ކަހަލަ ގޮތަކަށް ވަކިވަކިން އަޅުގަނޑު އެބަ ބައްދަލުކުރަން. އެކި ނަންތައް އެބަ އާދޭ،"  ރައީސް ޞާލިހު ވިދާޅުވި އެވެ..