ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ދައުރުގެ ތެރޭގައި އިތުރު 5 އެއާޕޯޓް އެޅުމުގެ މަސައްކަތް ފަށްޓަވާނެ ކަމަށް އެމަނިކުފާނު ވިދާޅުވެއްޖެއެވެ. 

ރިޔާސީ ކެންޕެއިނަށް ތިލަދުންމަތީ އުތުރުބުރިއަށް ކުރައްވަމުންދާ ދަތުރުފުޅުގައި އެ އަތޮޅު ހޯރަފުށްޓަށް މިއަދު ވަޑައިގެން ދެއްކެވި ވާހަކަފުޅުގައި ރައީސް ޞާލިހު ވިދާޅުވީ، އެ މަނިކުފާނު ވެރިކަމަށް ވަޑައިގެންނެވުމުގެ ކުރިން ވޭތުވެދިޔަ 70 އަހަރުގެ ތެރޭގައި ހޯރަފުށީގެ ތަރައްޤީއަށް މާ ބޮޑު ކަމެއް ކުރެވިފައި ނުވާ ކަމަށެވެ. އެހެންނަމަވެސް އެމަނިކުފާނުގެ ފަސް އަހަރުގެ ދައުރުގައި އެ ރަށަށް ގިނަ ކަންކަން ކޮށްދެވިފައިވާ ކަމަށް ވިދާޅުވިއެވެ. 

އެގޮތުން އެމަނިކުފާނުގެ ދައުރުގައި އެޅަންފަށައި ނިންމި ފުރަތަަމަ އެއާޕޯޓަކީ ހޯރަފުށީ އެއާޕޯޓް ކަން ފާހަގަކުރައްވައި ރައީސް ޞާލިހު ވިދާޅުވީ މިހާރުވެސް 4 އެއާޕޯޓެއްގެ މަސައްކަތް ކުރިއަށްދާ ކަމަށެވެ. 

ރައީސް ޞާލިހު ވިދާޅުވީ އެއާޕޯޓް ތައް އެޅުމުގެ ބޭނުމަކީ މުޅި ރާއްޖެއެކު އެކީގައި ތަރައްޤީ ކުރުމަށް ކަމަށެވެ. 

މި ސަރުކާރުން އަޅަން ފަށާފައިވާ، އަދި ނިންމާފައިވާ އެއާޕޯޓް ތަކުގެ ތެރޭގައި އަލިފުށީގައި އަޅާ އެއާޕޯޓާއި، ހދ. މަކުނުދޫ، ށ. ބިލަތްފަހި، ބ. ތުޅާދޫ، މ. މުލި، ފ. މަގުދޫ، ތ. ވިލުފުށި އަދި ރ. އަތޮޅުގެ އިތުރު ރަށެއްގައި އަޅާ އެއާޕޯޓް ހިމެނެއެވެ. މިއަހަރު ނިމުމުގެ ކުރިން މ. މުލި އެއާޕޯޓް ހުޅުވުމަށް ސަރުކާރުން މަސައްކަތް ކުރަމުން އަންނަ ކަމަށްވެސް މީގެ ކުރިން ބުނެފައި ވެއެވެ.