ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ވެރިކަމުގެ 5 އަހަރު ތެރޭ އިހަވަންދޫއަށް މާޒީވި 50 އަހަރުން ނުގެނެސްދެވުނު ތަރައްގީ ގެނެސްދެއްވާފައިވާކަމަށް އެ ދާއިރާގެ މެމްބަރު މުޙައްމަދު ޝިފާއު ވިދާޅުވެއްޖެ އެވެ.
ޝިފާއު މިފަދައިން ވިދާޅުވެފައި ވަނީ ހއ އިހަވަންދޫގައި ބޭއްވި ރައީސް ޞާލިހުގެ ރިޔާސީ ކެމްޕޭނު ޖަލްސާއެއްގައި ވާހަކަދައްކަވަމުން ނެވެ.
ޝިފާއު ވިދާޅުވީ ރައީސް ޞާލިހަކީ އިހަވަންދޫގެ ޗާޓު ބަދަުކޮށްދެއްވި ރައީސް ކަމަށެވެ. އެގޮތުން މީގެ ކުރިން އެއްވެސް ސަރުކާރުން އިހަވަންދޫގެ ބިން ހިއްކައި ނުދީ އޮތއްވާ އެ ބިން ހިއްކައިދިނީ ރައީސް ޞާލިހު ކަމަށާއި، އެކަމަށްޓަކައި އިހަވަންދޫ ރައްޔިތުން ވެސް އަބަދުވެސް ޝުކުރުވެރިވާނެ ކަމަށް ޝިފާއު ވިދާޅުވި އެވެ.
އޭގެ އިތުރުން ޝިފާއު ވިދާޅުވީ ހއ އަތޮޅުގެ ރައްޔިތުންގެ އަޑު އެއްސެވި ރައީސަކީ ރައީސް ޞާލިހު ކަމަށެވެ. އަދި އިހަވަންދޫއަށް އެމަނިކުފާނު ކޮށްދެއްވި ކަންކަން ރައްޔިތުން ބަލައިގަނެ އެކަން އިންތިޚާބުގެ ނަތީޖާއިން ދައްކާނެކަމަށް ޝިފާއު ވަނީ ވިދާޅުވެފަ އެވެ.
"ރައީސުލްޖުމްހޫރިއްޔާ އަކީ މި އިހަވަންދޫއަށް ވޭތުވެދިޔަ 50 އަހަރު ނުކޮށްދޭ ޚިދުމަތްކޮށްދިން، ވޭތުވެދިޔަ 50 އަހަރު މި ފަސްގަނޑަށް ނުގެނެސްދިން އުމުރާނީ ތަރައްގީ އެންމެ 5 އަހަރުން ގެނެސްދިން ރައީސް"
އިހަވަންދޫ މެމްބަރު ޝިފާއު
ޝިފާއު ވިދާޅުވީ އިހަވަންދޫއަކީ އެމްޑީޕީގެ ރަށެއް ކަމަށެވެ. މިހާތަނަށް ވެސް އިންތިޚާބުތަކުގައި އިހަވަންދޫއިން ވަނީ އެމްޑީޕީއަށް ގޮނޑިތަކެއް ކާމިޔާބުކޮށްދީފައި ކަމަށާއި، ކުރިއަށް އޮތް ރިޔާސީ އިންތިޚާބުގައި ވެސް ރައްޔިތުން އެ ނަތީޖާ ނެރޭނެކަމަށް ޝިފާއު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
