އައިޖީއެމްއެޗްގައި ކުޑަ ކުއްޖެއްގެ ފުއްޕާމެއިން ކުޅޭ އެއްޗެއްގެ ބައެއް ނަގައިފިއެވެ.

މިކަން ހާމަކޮށް އައިޖީއެމްއެޗްގެ އެތެރެހަށީގެ ޑޮކްޓަރު މުހައްމަދު އަލީ ކުރެއްވި ޓްވީޓެއްގައި ވިދާޅުވީ، އެ ހޮސްޕިޓަލުގެ ދަ ނޭޝަނަލް ސެންޓަރ ފޯ ރެސްޕިރެޓޮރީ މެޑިސިން ޓީމުން، ކުއްޖެއްގެ ފުއްޕާމޭގެ ކަނާއަތު ފަޅިން ކުޅެން ގުންގުޅޭ ސޮފްޓް ޓޯއީއެއްގެ އަޑު ގޮވާ ތަންކޮޅު ނަގާފައިވާ ކަމަށެވެ.

އަދި ބެލެވޭ ގޮތުގައި އެ ހާދިސާ ހިނގީ އޭގެން އަޑު ގޮއްވަން ފުމެއް މަސައްކަތް ކުރުމުގެ ތެރޭގައި ކަމަށްވެސް ޑޮކްޓަރ ވިދާޅުވި އެވެ. 

"ހީވާގޮތުން އެ ކުއްޖާ އުޅުނީ އޭތި ދެ ތުންފަތް ދޭތެރޭގައި ބާއްވައިގެން ފުމުމުން އަޑު ގޮވާތީ، އޭނާގެ ކޮއްކޮއަށް އެ މަންޒަރު ދައްކަން. އެހެން ނަމަވެސް އެކަން ބިރުވެރި ހާދިސާއަކަށްވެ، ނޭގުމެއްގެ ތެރެއިން އެ ކުއްޖާއަށް އޭތި ދިރުވާލެވުނީ". ޑރ. މުހައްމަދު އަލީ ވިދާޅުވިއެވެ.

މީގެ އިތުރުން މުހައްމަދު އަލީ ވަނީ ދެ ތުންފަތް ދޭތެރޭގައި އެފަދަ ފުމެގެން ކުޅޭ އެއްޗެހި ލައިގެން އުޅުމީ ނުރައްކާތެރި ކަމެއް ކަމަށް ވިދާޅުވެ އިންޒާރު ދެއްވާފައެވެ. 

ޑޮކްޓަރު ވަނީ މިކަމުގައި ރޭޑިއޮލޮޖީ ޓީމާއި، އަދި މިކަމުގައި އިސްކޮށް މަސައްކަތް ކުރެއްވި ޑޮކްޓަރުންނާއި ނަރުހުންގެ ފަރާތުން ލިބުނު ފުރިހަމަ އެއްބާރު ލުމާއި އެ ޓީމުގެ މަސައްކަތް ފާހަގަކުރައްވާފައެވެ. 

މިފަދަ ތަކެތީގެ އިތުރުންވެސް, ރުފިޔާ ފޮއްޗާއި، ޕިނާއި, އެނޫންވެސް ކުދި ކުޅޭ ތަކެތި ކުދިންގެ އަތުގައި ޖެހޭ ހިސާބުގައި ނުބެހެއްޓުމާއި، އެފަދަ ތަކެތި އަނގަޔަށް ނުލުމަށް ޑޮކްޓަރުން އަބަދުވެސް އިރުޝާދު ދެއްވައެވެ.