މި ފަހަރުގެ ރިޔާސީ އިންތިހާބުގެ ނަތީޖާ ނުކުންނަ ގޮތަކުން މި ސަރުކާރުން މިހާރު ފަށާފައިވާ މަޝްރޫއުތައް ހުއްޓިދާނެ ކަމަށް އެމްޑީޕީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު މިއަދު ވިދާޅުވެއްޖެ އެވެ.

ހއ. އަތޮޅަށް ކުރައްވަމުން ގެންދަވާ ދަތުރުފުޅުގައި ތަކަންދުއަށް ވަޑައިގެން އެ ރަށުގެ ބޭއްވި ބައްދަލުވުމުގައި ވާހަކަފުޅު ދައްކަވަމުން ރައީސް ޞާލިހް ވިދާޅުވީ، އެމަނިކުފާނުގެ މި ސަރުކާރުން ރައްޔިތުންނަށް ވައުދުވީ ކުޑަ ރަށެއް ބޮޑު ރަށެއް ތަފާތު ނުކުރުމަށާއި ހުރިހާ ރަށަކަށް ވެސް އަސާސީ ހިދުމަތްތައްް ހޯދައި ދެއްވަން ކަމަށެވެ.

އެގޮތުން، ތަކަންދޫ އަށްވެސް ގިނަ ކަންކަން ކޮށްދެއްވާފައިވާ ކަން އެމަނިކުފާނު ފާހަގަކުރެއްވިއެވެ. އޭގެ ތެރޭގައި ދަތުރުފަތުރުގެ ނިޒާމު ހަރުދަނާކުރުމަށ،ް ރާއްޖެ ޓްރާސްޕޯޓް ލިންކް (އާރްޓީއެލް) ގެ ފެރީ ނިޒާމް އެ އަތޮޅަށް ތައާރަފް ކުރުމާއި، ފެނާއި ނަރުދަމާގެ މަސައްކަތް ހިމެނޭ ކަމަށް ވިދާޅުވި އެވެ.

Advertisement

މިއާއެކު އެމަނިކުފާނު ވަނީ އެ ރަށުގެ ބަނދަރުގައި ބަދަލުކުރަން ޖެހޭ ކަންކަން ބަދަލުކުރާނެކަމަށާއި، އަދި ބަނދަރު ބޮޑުކުރާނެކަމަށް ވައުދުވެވަޑައިގެންފައެވެ. އަދި ރަށުގެ ރައްޔިތުން އެދިފައިވާގޮތަށް އިޖުތިމާއީ މަރުކަޒެއް ގާއިމްކޮށްދެއްވާނެކަމަށް ވައުދުވެވަޑައިގެންނެވިއެވެ.

ރައީސް ޞާލިހު ވިދާޅުވީ، ރާއްޖެއަށް ގެންނަން ފެށި ތަރައްގީީގެ މަސައްކަތްތައް އަދި ނުނިމޭކަމަށާއި، އަދިވެސް ގިނަ މަސައްކަތްތަކެއް ކުރަންޖެހިފައިވާކަމަށް ފާހަގަކޮށް، ބަނދަރުތައް ތަރައްގީކުރުމާއި، ފެނާއި ނަރުދަމާގެ މަސައްކަތްތަކާއި، އަދި ސުކޫލުތަކަށް އިމާރާތް އިތުރުކުރުންފަދަ އެތައް މަސައްކަތެއް އެއްފަހަރާ ކުރަން ޖެހިފައި އެބައޮތްކަމަށެވެ.

އެހެންނަމަވެސް، ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި ނުކުންނަ ނަތީޖާއަކުން އެ މަޝްރޫއުތައް ހުއްޓުމަކީ އެކަށީގެންވާ ކަމެއް ކަމަށް ރައީސް ސޯލިހު ވިދާޅުވި އެވެ.

ރައީސް ސާލިިހު ވިދާޅުވީ އެމްޑީޕީގެ މި ސަރުކާރުން ގާއިމްކޮށްދިން އުފާވެރިކަމާއި، އަމާންކަން ބީވެގެންދިޔަ ނުދީ ހިފަހައްޓަން ޖެހޭ ސަބަބަކީ ގައުމުގެ ތަރައްގީގެ މަޝްރޫއުތައް ކުރިއަށް ގެންދިއުމަށްކަމަށެވެ.