ޖުމްހޫރީ މައިދާނުގައި އިއްޔެ އިދިކޮޅުު ޕީޕީއެމް/ޕީއެންސީ ކޯލިޝަނުން ކުރިއަށް ގެންދިޔަ އިހްތިޖާޖު ކަވަރު ކުރަމުންދިޔަ ނޫސްވެރިންގެ މަސައްކަތަށް ފުލުހުން ހުރަސް އަޅާ، އެ ނޫސްވެރިންނަށް އަނިޔާކުރި މައްސަލަ ބަލަން އިދިކޮޅުުން ގޮވާލައިފި އެވެ. 

އިދިކޮޅު ލީޑަރު އަދި ރިޔާސީ ކެނޑިޑޭޓު ރައީސް ޢަބްދުالله ޔާމީނުގެ އިސްތިއުނާފު މައްސަލައިގެ އަޑުއެހުންތައް ދިވެހިރާއްޖޭގެ ހައިކޯޓުގައި ލަސްވާތީ އިދިކޮޅު އިއްތިހާދުގެ ލީޑަރުން ޖުމްހޫރީ މައިދާނުގައި އިށީނދެވަޑައިގެން ނޫސްވެރިންނަށް މައުލޫމާތުދެއްވަމުން ގެންދަވަނިކޮށް ފުލުހުން އެތަނަށް އައިސް ނޫސްވެރިންތަކެއް ކޮއްޕައި ބިންމައްޗަށް ވައްޓައިލި މަންޒަރު ފެންނަ ވީޑިއޯ މިހާރު މީސްމީޑިއާގައި އަންނަނީ ދައުރުވަމުންނެވެ.

މިކަމާއި ގުޅިގެން އިދިކޮޅުން ނެރުނު ބަޔާނެއްގައި ބުނީ، އެކޯލިޝަންގެ އިހްތިޖާޖު، ކަވަރު ކުރަން އެތަނުގައި ޙަރަކާތްތެރިވަމުން ދިޔަ ނޫސްވެރިންގެ ޤައުމީ ވާޖިބަށް އަދި ޒިންމާއަށް ފުލުހުން ހުރަސް އަޅާ ކޮއްޕާ ވައްޓާލާ އަނިޔާ ކޮށްފައިވާ ކަމަށެވެ. އަދި އިދިކޮޅުން ވަނީ އެކަން އެންމެ ހަރުކަށި އިބާރާތުން ކުށްވެރިކޮށްފައެވެ.

"ނޫސްވެރިންނަކީ އެމީހުންގެ މަސައްކަތުގެ މާހައުލުގައި ހިމާޔަތާއި ރައްކާތެރިކަން ކަށަވަރުކޮށްދޭން ޖެހޭ ބަޔަކަށްވާއިރު، އެކަމަށް ބެލުމެއް ނެތި ނޫސްވެރިންގެ މަސައްކަތަށް ހުރަސް އަޅާ ނޫސްވެރިންނަށް ތަކުރާރުކޮށް ފުލުހުން އަނިޔާ ކުރަމުން ގެންދިއުމަކީ އެއްގޮތަކަށްވެސް ބަލައިގަނެވޭނޭ ކަމެއް ނޫނެވެ." އިދިކޮޅުގެ ބަޔާނުގައި ބުނެފައިވެއެވެ. 

މިއާއެކު އިދިކޮޅުުން ވަނީ އެ މައްސަލަ އަވަސް މައްސަލައެއްގެ ގޮތުގައި ބަލައި ނޫސްވެރިންގެ ރައްކާތެރިކަމަށް އަޅަން ޖެހޭ ފިޔަވަޅުތައް އެޅުމަށް ހިޔުމަންރައިޓްސް ކޮމިޝަން އޮފް ދަ މޯލްޑިވްސްއާއި، ބްރޯޑްކާސްޓިންގ ކޮމިޝަނާއި، މީޑިއާ ކައުންސިލް އަދި އިންޓެގްރިޓީ ކޮމިޝަނަށް ގޮވާލާފައެވެ.