ވިޔަފާރިވެރިޔާ އަދި ރައްޔިތުންގެ މަޖިލީހުގެ މީދޫ ދާއިރާގެ މެމްބަރު އަހްމަދު ސިޔާމް (ސަން ސިޔާމް)ގެ ޕާސްޕޯޓު ސިންގަޕޫރުން ހިފެހެއްޓި މައްސަލައިގެ ތެރެއަށް ދިވެހި ސަރުކާރާއި ފުލުހުން ވަދެއްޖެއެވެ.

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ރިޔާސީ ކެމްޕެއިންގައި އުޅުއްވުމަށް ފަހު، ސިޔާމް ސިންގަޕޫރަށް ވަޑައިގެންފައިވާ އިރު، "ވޮއިސް" ކަށަވަރުވެފައިވާ ގޮތުގައި ސިޔާމްގެ ޕާސްޕޯޓް ހިފަހައްޓާފައިވަނީ މިދިޔަ ހޯމަ ދުވަހުއެވެ. އަދި ޕާސްޕޯޓް ހިފަހައްޓައި ފުރުން މަނާކުރީ ހިލްޓަން މައްސަލައާ ގުޅިގެން ކަމަށްވެސް މައުލޫމާތު ލިބެއެވެ.
ހިލްޓަން އިން އެއްބަސްވުމާ ހިލާފުވެފައިވާ ކަމަށް ބުނެ ސަން ޓްރެވަލްސް އިން ނ. އިރުފުށީގެ އެއްބަސްވުން ބާތިލުކުރީ 30 އޭޕްރިލް 2013ގަ އެވެ. އެއްބަސްވުން ބާތިލުކުރި މައްސަލަ ސިންގަޕޫރުގެ އާބިޓްރޭޝަނަށް ހުށަހެޅުމުން، އާބިޓްރޭޝަނުން 'ފައިނަލް އެވޯޑް' ނެރެ ސަން ޓްރަވަލްސްއަށް އެންގީ 20.9 މިލިއަން ޑޮލަރާއި ޖޫރިމަނާ އާއި އިތުރު ހަރަދުތައް ދެއްކުމަށެވެ.
އެކަމަކު ހުކުމާ އެއްގޮތަށް އެ ފައިސާ ނުދެއްކުމުން އާބިޓްރޭޝަންގެ ނިންމުން ތަންފީޒު ކުރަން ހިލްޓަންއިން ސިންގަޕޫރުގެ ހައި ކޯޓަށް ހުށަހެޅީ އެވެ.

މިފަދަ މައްސަލަތަކުގައި ސިންގަޕޫރުގެ ގާނޫނުގައި އޮންނަ ގޮތުން ސިޔާމަކީ ފިލާފާނެ ބޭފުޅެއްގެ ގޮތުގައި ބަލައި ފުރުން މަނާކޮށްފައިވާއިރު، އޭނާގެ ދިފާއުގައި ފޮރިން މިނިސްޓްރީން ސިންގަޕޫރަށް ފޮނުވި ސިޓީގައި ވަނީ ސިޔާމަކީ ދެކުނު ކޮރެއާ އާއި ރޯމޭނިއާ އިން ރާއްޖެއަށް ކަނޑައަޅާފައި ހުންނެވި އޮނަރަރީ ކޮންސުލްގެ މަގާމްގައި ހުންނެވި ރަނގަޅު ޝަހުސިއްޔަތެއްކަން ފާހަގަކޮށްފައިވެ އެވެ.

އަދި ޑިޕްލޮމެޓިކް އިމިއުނިޓީ ލިބިވަޑައިގެންނެވުމުގެ އިތުރަށް އޭނާއަކީ ރާއްޖޭގެ ޓޫރިޒަމް ދާއިރާ ކުރިއެރުވުމުން އެވޯޑް ލިބިވަޑައިގެން ހުންނެވި ދިވެހި ވިޔަފާރިވެރިއެއްގެ އިތުރުން ރައްޔިތުންގެ މަޖިލީހަށް ޚިދުމަތްތެރި އަދި ރާއްޖޭގެ ހަތަރު ވަނަ އަށް އެންމެ ބޮޑު ސިޔާސީ ޕާޓީގެ ލީޑަރު ކަމަށް ފޮރިން މިނިސްޓްރީގެ ސިޓިގައި ވެ އެވެ.

އެހެންކަމުން ސިޔާމާ މެދު ގޮތެއް ނިންމުމުގެ ކުރިން ސިޓީގައިވާ ކަންކަމަށް ރިއާޔަތް ކޮށްދިނުމަށް މިނިސްޓްރީން ވަނީ އެދިފައެވެ. 

އެ މައްސަލާގައި ފުލުހުން ފޮނުވި ސިޓީގައިވެސް ވަނީ އެކަންކަން ފާހަގަކޮށް، ސިޔާމް އަކީ އެއްވެސް ކުށުގެ ރިކޯޑެއް ނެތް މީހެއް ކަމަށާ، އަދި އޭނާ އާއި ދެކޮޅަށް ފުލުހުން އެއްވެސް ތަހުގީގެއްވެސް ހިންގަމުން ނުދާ ކަމަށް އެ ސީޓީގައި ބުނެފައިވެއެވެ.