ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ވެރިކަމުގެ ފަސް އަހަރަކީ އެންމެ ކުށް މަދު 5 އަހަރުކަމަށް ބުނުމުން ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުޙައްމަދު ވަހީދު (ވައްޑެ) ރައްދުދެއްވައިފި އެވެ. 

މިދިޔަ ފަސް އަހަރަކީ ރާއްޖޭގެ ފަހުގެ ތާރީޚު ދުށް އެންމެ ކުށް މަދު ފަސް އަހަރުކަން ފާހަގަކުރައްވައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ކުރެއްވި ޓުވީޓެއްގައި ވިދާޅުވީ ކުރިއަށް މި އޮތް ފަސް އަހަރުގައި މި އިންސައްތަ މިއަށްވުރެވެސް ދަށް ކުރައްވާނެ ކަމުގައެވެ.

މިދިޔަ ފަސް އަހަރުގައި ހާސިލުވި ތަރައްގީގެ ބިންގަލަކީ މިއޮތް ސުލްހަވެރިކަމާއި އަމާންކަން ކަމުގައިވެސް އެމަނިކުފާނު ވިދާޅުވި އެވެ.

Advertisement

ރައީސް ޞާލިހުގެ މި ވާހަކަތަކަށް މެމްބަރު ވައްޑެ ވަނީ ޓްވީޓާގައި ރައްދުދެއްވާފަ އެވެ. 

އެގޮތުން ވައްޑެ ވިދާޅުވީ ކުށް މަދުވެއްޖެކަމަށް ބުނެ ދައްކާ ވާހަކައަކީ ރައްޔިތުންނަށް އޮޅުވާލަން ދައކާ ވާހަކަތަކެއް ކަމަށެވެ. އެގޮތުން ކޯވިޑް-19 ގެ ކުއްލި ނުރައްކަލުގެ ހާލަތު ރައްޔިތުން ގެތަކުގައި ތިބި 2 އަހަރު ކަނޑާފައި ގުނާނަމަ ހަގީގަތުގައި ނިސްބަތުން ކުށްތައް ވާނީ އިތުރުކަމަށް އޭނާ ވިދާޅުވި އެވެ. 

މީ އެންމެ ކުށްމަދު 5 އަހަރުކަމަށް ސަރުކާރުން ބުނި ނަމަވެސް، ވައްކަމާއި، ގެވެށިއަނިޔާއާއި، ކުޑަކުދިންނަށް ޖިންސީ ގޯނާކުރުމުގެ މައްސަލަތައް މަހުން މަހަށް އިތުރުވަމުން އައިސްފައިވާކަން ފުލުހުންގެ ތަފާސް ހިސާބުތަކުން ދައްކައެވެ.