ދިވެހި ދައުލަތަށް އެންމެ ގިނަ ޓެކްސް ދައްކަނީ އެމްޑީއޭގެ ރައީސް އަހުމަދު ސިޔާމުކަމަށް އެ ޕާޓީގެ ނައިބު ރައީސް އަލީ މައުރޫފު ވިދާޅުވެއްޖެ އެވެ.
މައުރޫފު މިފަދައިން ވިދާޅުވެފައި ވަނީ ސިޔާމު ސިންގަޕޫރުން ވަޑައިގަންނަވާތީ އޭނާއަށް މަރުހަބާ ދެންނެވުމަށް ރޭ އެއާޕޯޓަށް ވަޑައިގެން، މީޑިއާއަށް ދެއްވި އިންޓަވިއުއެއްގަ އެވެ.
މައުރޫފު ވިދާޅުވީ ފާއިތުވި 25 އަހަރު އޭނާ ސިޔާމުއާއެކު، އޭނާގެ ވިޔަފާރީގެ އެކި ކަންކަމުގައި މަސައްކަތްޕުޅު ކުރައްވާފައިވާނެ ކަމަށެވެ. އަދި ސިޔާމާއެކު މަސައްކަތް ކުރެވުނު އެ ދިގު މުއްދަތުގެ ތެރޭގައި އޭނާގެ ތަޖުރިބާ ވެސް މައުރޫފު ވަނީ މީޑިއާއާއި ހިއްސާކޮށްފަ އެވެ.
އެގޮތުން މައުރޫފު ވިދާޅުވީ ސިޔާމަކީ "ވަރަށް ކުލީން" ބޭފުޅެއް ކަމަށެވެ. އެމަނިކުފާނަކީ ވައްކަމާއި ކޮރަޕްޝަނުގައި ޖެހިވަޑައިގެން އެފަދަ ކަމެއް ކުރައްވާނެ، އަދި ކުރައްވާފައި އޮތް ވެސް ބޭފުޅެއް ނޫން ކަަމަށާއި، ސިޔާމުގެ ފަރާތްޕުޅުން އެއްވެސް މީހަކަށް މާލީ ގެއްލުމެއް ދީފައި ނޯންނާނެ ކަމަށް މައުރޫފު ވިދާޅުވި އެވެ.
އޭގެ އިތުރުން އޭނާ ވިދާޅުވީ ސިޔާމަކީ ދައުލަތަށް ބަރާބަރަށް ޓެކްސް ދައްކަވާ ބޭފުޅެއް ކަމަށެވެ. ދިވެހި ދައުލަތަށް އެންމެ ގިނަ ޓެކްސް ދައްކަވާ ބޭފުޅަކީ ވެސް ސިޔާމު ކަމަށް މައުރޫފު ވިދާޅުވި އެވެ.
"މިއަދު ދިވެހިރާއްޖޭގެ ދައުލަތަށް ދައްކާ އެންމެ ގިނަ ޓެކްސް މި ދައްކަނީ ސިޔާމު"
އެމްޑިއޭގެ ނައިބު ރައީސް މައުރޫފު
މައުރޫފު ވިދާޅުވީ ސިޔާމަކީ ރާއްޖޭގައި މިވަގުތު ހުރި އެންމެ ފުންނާބު އުސް ވިޔަފާރި ވެރިޔާ ކަމަށެވެ. އަދި ފަތުރުވެރިކަން ކުރިއެރުވުމުގެ ބާނީ ކަމަށެވެ.
އެއާއެކު ވެސް އެއްވެސް ސަރުކާރަކުން ނާޖާއިސް މަންފާއެއް ސިޔާމު ނަންގަވާފައި ނޯންނާނެކަމުގެ ފުރިހަމަ ޔަގީންކަން ދެއްވާކަމަށް މައުރޫފު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
