އެމްޑީއޭގެ ރައީސް އަހުމަދު ސިޔާމުގެ ޕާސްޕޯޓު ސިންގަޕޫރުން ހިފަހައްޓާފައިވާކަމަށް ބުނެ ދޮގު ޚަބަރު ފެތުރުމުގެ ފަހަތުގައި ތިބީ "ދަ ޑިމޮކްރޭޓްސް" ކަމަށް އެމަނިކުފާނު ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވީ ސިންގަޕޫރުން އަނބުރާ މާލެ ވަޑައިގެން ރޭ މީޑިއާއަށް މައުލޫމާތު ދެއްވަމުން ނެވެ.
ސިޔާމު ވިދާޅުވީ ސިންގަޕޫރަށް އެމަނިކުފާނު ކުރެއްވި ދަތުރުފުޅުގައި، ސިންގަޕޫރުން އެމަނިކުފާނުގެ ޕާސްޕޯޓު ހިފަހައްޓާ، ނުވަތަ ބަންދުކޮށް އެފަދަ އެއްވެސް ކަމެއް ހިނގާފައި ނުވާކަމަށެވެ.
އެމަނިކުފާނު ޕާސްޕޯޓު ސިންގަޕޫރުން ހިފެހެއްޓިކަމަށް ބުނެ މީޑިއާތަކުގެ ޚަބަރު ފަތުރަން ފެށުމުން ވަރަށް ހައިރާންވި ކަމަށް ސިޔާމު ވިދާޅުވި އެވެ.
އެކަން ފާހަގަކުރައްވާ ސިޔާމު ވިދާޅުވީ އެމަނިކުފާނާއި ގުޅޭގޮތުން އެ ވާހަކަ ނުވަތަ އެމަނިކުފާނުގެ ޕާސްޕޯޓު ހިފަހައްޓާފައިވާކަމަށް ބުނެ ފެތުރި ދޮގު ޚަބަރުތަކުގެ ފަހަތުގައި ތިބީ "ދަ ޑިމޮކްރެޓްސް" ކަމަށް ބެލެވޭ ކަމަށެވެ.
އެވާހަކަ އެންމެ ފުރަތަމަ ޖެހީ "ހަސަން ކުރުސި" ކިޔާ އެކައުންޓަކުން ކަމަށާއި، އެއީ ދަ ޑިމޮކްރެޓްސް ހިންގާ އެކައުންޓެއް ކަމަށް ސިޔާމު ތުހުމަތު ކުރެއްވި އެވެ.
"އަޅުގަނޑަށް ހީވަނީ، ރާއްޖޭގައި އެންމެ ފަހުން ހެއްދެވި ސިޔާސީ ޕާޓީގެ ލީޑަރު ދަ ޑިމޮކްރަސީ...(ދަ ޑިމޮކްރޭޓްސް) އެބޭފުޅުން ކުރެއްވި ކަމެއްގެ ގޮތުގައި އަޅުގަނޑަށް ފާހަގަކުރެވިފައި އިނީ. އެއީ ކޮންމެސް ކުރު ސޮރެއް ކިޔާ ހަސަން ކުރުސި ކިޔާ މީހަކު ޓްވީޓުކޮށްލީ.. ކޮށްލާފަ އަޅުގަނޑު މިހެންނޭ އޮތީ.. އެހެންވީމަ އެބޭފުޅުން ހިންގި ކަމެއްކަމަށް އަޅުގަނޑަށް ބޮޑަށް ލަފާކުރެވެނީ"
އެމްޑީއޭގެ ރައީސް ސިޔާމު
އެކަންކަން ފާހަގަކުރައްވާ ސިޔާމު ވިދާޅުވީ އެފަދަ މައުލޫމާތެއް ލިބުނު ނަމަވެސް، އެއީ ޞައްހަ މައުލޫމާތެއް ތޯ ސާފުކުރުމަށް މީޑިއާތަކުން އެމަނިކުފާނާއި ނުވަތަ ޕާޓީއާއި، ނުވަތަ ކުންފުންޏާއި ވެސް ގުޅާފައި ނުވާކަމަށެވެ.
ސިޔާމުގެ ޕާސްޕޯޓު ހިފަހައްޓާފައިވާކަމަށް ވިދާޅުވެ މީޑިއާތަކުން ފެތުރީ ދޮގު ޚަބަރެއް ކަމަށާއި، އެއީ ވަރަށް ޒިންމާދާރުކަން ކުޑަކޮށް ކޮށްފައިވާ ކަމެއްކަމަށް ސިޔާމު ވިދާޅުވި އެވެ.
އަދި މުސްތަގުބަލުގައި އެފަދަ ޚަބަރުތައް ނުފެތުރުމަށާއި، ޒިންމާދާރުކަމާއެކު ނޫސްތަކާއި ޓީވީތަކުން މަސައްކަތް ކުރުމަަށް ސިޔާމު ވަނީ ގޮވާލައްވާފަ އެވެ.
Advertisement
This content is created and paid for by advertisers and does not involve Voice Journalists
