މަޖުބޫރުވެގެން ނޫނީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ރަނިން މޭޓުކަން ޤަބޫލު ނުކުރައްވާނެކަމަށް ރިޔާސީ އިންތިޚާބުގައި ރައީސް ޞާލިހާއެކު ކޯލިޝަން ހަދާފައިވާ އެމްޑީއޭގެ ރައީސް އަހުމަދު ސިޔާމު ވިދާޅުވެއްޖެ އެވެ. 

ސިޔާމް މިހެން ވިދާޅުވީ، ސަން ޓްރެވަލް ކުންފުންޏާ ދެކޮޅަށް ސިންގަޕޫރުގައި ކުރިއަށް ދިޔަ އަޑުއެހުންތަކަށް ހާޒިރުވެ ވަޑައިގަތުމަށް ފަހު ރޭ ރާއްޖެ އަށް އެނބުރި ވަޑައިގެން ބޭއްވި ނޫސްވެރިންގެ ބައްދަލުވުމުގައި މީޑިއާތަކުން ކުރި ސުވާލުތަކަށް ޖަވާބުދެއްވަމުން ނެވެ. 

ސިޔާމު ވިދާޅުވީ ކުރިއަށް އޮތް ރިޔާސީ އިންތިޚާބުގައި ރައީސް ޞާލިހަށް ފުރިހަމައަށް ތާއީދުކުރެއްވި ނަމަވެސް، އެމަނިކުފާނުގެ ރަނިން މޭޓަކަށް ވެވަޑައިގަތުމުގެ އެއްވެސް ޝައުގުވެރިކަމެއް ނެތް ކަމަށެވެ. 

Advertisement

އެހެން ނަމަވެސް މަޖުބޫރު ޙާލަތެއް ދިމާވެ، ކޮންމެހެން ރަނިން މޭޓުަކަން ޤަބޫލުކުރަން ޖެހިއްޖެ ނަމަ އެކަން ކުރައްވާނެކަމަށް ސިޔާމު ވިދާޅުވި އެވެ. 

ރައީސް ޞާލިހުގެ ރަނިންމޭޓަކަށް ވުމުގެ ޝައުގުވެރިކަން ގިނަ ފަރާތްތަކުން ފާޅުކުރައްވަމުންދާ ކަމަށާއި، އެހެން ނަމަވެސް މިހާތަނަށް އަދި ރަނިން މޭޓު ކަނޑައަޅުއްވާފައި ނުވާކަމަށް ރައީސް ޞާލިހު ވަނީ ވިދާޅުވެފަ އެވެ. 

ރައީސް ޞާލިހުގެ ރަނިން މޭޓަކަށް ވުމުގެ ޝައުގުވެރިކަން ނައިބު ރައީސް އަދި 2018 ވަނަ އަހަރު ރައީސް ޞާލިހުގެ ރަނިން މޭޓުގެ ގޮތުގައި ހުންނެވި ފައިސަލް ނަސީމު ފާޅުކުރައްވާފައިވާ ކަމަށް ބައެއް ފަރާތްތަކުން އަންނަނީ ބުނަމުންނެވެ. 

އަދި އެމްޑީޕީގެ ތެރެއިން ވެސް ފުންނާބު އުސް ބައެއް ފަރާތްތަކުން، އޭގެ ތެރޭގައި ފޮރިން މިނިސްޓަރު އަބްދުالله ޝާހިދާއި، އިކޮނޮމިކް މިނިސްޓަރު ފައްޔާޒު އިސްމާއިލް ޝައުގުވެރިކަން ހުރިކަމަށް ބައެއް ފަރާތްތަކުން ދަނީ ބުނަމުން ނެވެ. އެހެން ނަމަވެސް އެވާހަކަށް ފައްޔާޒު ދޮގު ކުރައްވައެވެ.