އިދިކޮޅުގައި އެމްޑީޕީ އޮވެ 7 އަހަރު މަގުމަތީގައި ތިބެގެން އެމްޑީޕީގެ އާންމު މެމްބަރުން ކުރި ބުރަ މަސައްކަތުގެ އަގު ވެރިކަމަށް ވަޑައިގެން ރައީސް އިބްރާހިމް މުޙައްމަދު ޞާލިހު ދެއްވި ގޮތް އެ މެމްބަރުން ރަނގަޅަށް ވިސްނާވަޑައިގަތުމަށް އެމްޑީޕީގެ ކުރީގެ ނައިބު ރައީސް އަހުމަދު ޝިފާޒު ގޮވާލައްވައިފި އެވެ.
ދަ ޑިމޮކްރެޓްސްގެ ހަރުގެ ޖަލްސާގައި ވާހަކަދައްކަވަމުން ޝިފާޒު ވަނީ "ވެރިކަމަށް ބޫތުކައިގެން" ރައީސް ޞާލިހު މިހާރު އުޅުއްވާ ގޮތުގެ މައްޗަށް އަލިއަޅުވާލައްވާފަ އެވެ.
އޭނާ ވިދާޅުވީ ރައީސް ޞާލިހު މިއަދު ވެރިކަން ކުރައްވަމުން ދަނީ ސަރުކާރުގެ ވަޒީފާތައް މީހުންނަށް ދީގެން، އެމީހުން އަޅުވެތިކޮށްގެން ކަމަށެވެ. ސަރުކާރުގެ ވަޒީފާއެއްގައި ހުންނަ އެއްވެސް މީހަކަށް ރައީސް ޞާލިހަށް ފާޑު ނުކިޔޭ ކަމަށާއި، ނުރުހޭ ގޮތަކަށް ބަހެއް ބުނާ މީހަކު ނަމަ ވަޒީފާއިން ކަނޑާލާކަމަށް އޭނާ ވިދާޅުވި އެވެ.
އެއާއެކު ޝިފާޒު ވިދާޅުވީ މި ސަރުކާރުން ރައްޔިތުންގެ މާލިއްޔާއަށް ބޮޑެތި ޚިޔާނާތް ވަމުންދާ ކަމަށެވެ.
އެގޮތުން ކުދި ކުދި މަޝްރޫއުތައް ހިންގުމުގެ ނަމުގައި ބޮޑެތި ޚަރަދުތައް ކުރަމުންދާއިރު، ރައީސް ޞާލިހުގެ އަރިސް މީހުންނަށް އެކި މަޝްރޫއުތައް ދީގެން ކޮރަޕްޝަންގެ ބޮޑެތި އަމަލުތައް ހިންގަމުންދާކަމަށް އޭނާ ތުހުމަތު ކުރެއްވި އެވެ.
އެކަންކަން ފާހަގަކުރައްވާ ޝިފާޒު ވިދާޅުވީ 7 އަހަރު މަގުމަތީގައި ތިބެގެން އެމްޑީޕީގެ އާންމު މެމްބަރުން ރައީސް ޞާލިހު ވެރިކަމަށް ގެނައީ އެކަންކަން ރަނގަޅު ކުރުމަށް ކަމަށެވެ. ވައްކަމާއި ކޮރަޕްޝަން ހުއްޓުވުމަށް ކަމަށެވެ. އަދި ރައްޔިތުންގެ އަސާސީ ހައްގުތައް ކަށަވަރުކުރުމަށް ކަމަށެވެ.
އެހެން ނަމަވެސް، އޭގެ ބަދަލުގައި ރައްޔިތުން މިއަދު ވަޒީފާގެ އަޅުންނަށް ހަދައި ސަރުކާރުން ދައުލަތުގެ މާލިއްޔާއަށް ޚިޔާނާތްތެރިވަމުންދާކަމަށް ޝިފާޒު ވިދާޅުވި އެވެ.
މިއީ ރައީސް ޞާލިހު ވެރިކަމަށް ގެނައުމަށް އެމްޑިޕީގެ އާންމު މެމްބަރުން ކުރި ބުރަ މަސައްކަތުގެ އަގު އެމަނިކުފާނު އަދާކުރެއްވި ގޮތް ކަމަށާއި، މި ކަންކަމާއި ދޭތެރޭ ރައްޔިތުން ފުންކޮށް ވިއްނުމަށް ޝިފާޒު ވަނީ ގޮވާލައްވާފަ އެވެ.
Advertisement
This content is created and paid for by advertisers and does not involve Voice Journalists
