ވެރިކަމުގެ ދެވަނަ ދައުރެއް ހޯއްދެވުމުގެ ނިޔަތުގައި ކޯވިޑް-19 މެނޭޖުކުރި ގޮތުގެ ވާހަކަ ދެއްކުމަކީ ބޭކާރު ކަމެއް ކަމަށާއި، އެ ވާހަކަތައް ދައްކައިގެން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ދެވަނަ ދައުރެއް ނުލިބޭނެ ކަމަށް އެމްޑީޕީގެ ކުރީގެ ރައީސް އަދި މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެ އެވެ. 

ރައީސް ނަޝީދު މިފަދައިން ވިދާޅުވެފައި ވަނީ ދަ ޑިމޮކްރެޓްސްގެ ހަރުގެ ޖަލްސާގައި ވާހަކަދައްކަވަމުން ނެވެ. 

އެ ޖަލްސާގައި ވާހަކަދައްކަވަމުން ނަޝީދު ވަނީ ރައީސް ޞާލިހު ރިޔާސީ ކެމްޕޭނަށް ރަށްރަށަށް ވަޑައިގެން ވައުދުފުޅުވެލައްވަމުންދާ ގޮތަށް ފާޑުވިދާޅުވެފަ އެވެ. 

Advertisement

އެގޮތުން ނަޝީދު ވިދާޅުވީ އެމަނިކުފާނު ވައުދުފުޅު ވަނީ އެ ވައުދުތައް ފުއްދާނެ ގޮތެއް ހޯއްދަވާފައި ނޫންކަމަށެވެ. އަދި ގިނަ ފަހަރަށް ވައުދުތައް ވެލައްވަނީ ރަށްރަށަށް ވަޑައިގަތުމުން، އެކި މީހުންގެ ފަރާތުން ހުށައަޅާ ހުށައެޅުންތަކަށް ބިނާކޮށް ކަމަށެވެ. 

އެހެންކަމުން އެފަދައިން ވައުދުތައް ވެލައްވައިގެން ރިޔާސީ އިންތިޚާބެއް ކާމިޔާބު ނުކުރެއްވޭނެކަމަށް ނަޝީދު ވިދާޅުވި އެވެ. 

އެ ވާހަކައާއި ގުޅުވާ ނަޝީދު ވިދާޅުވީ ވެރިކަމުގައި ކޮށްދިން ކަންކަމުގެ ވާހަކަ ދައްކައިގެން ވެސް ދެވަނަ ދައުރެއް އަދި ނުހޯއްދެވޭނެ ކަމަށެވެ. 

އެގޮތުން ރައީސް ޞާލިހުގެ ވެރިކަމުގައި ދިމާވި ކޯވިޑް-19 ގެ ސިއްޙީ ކުއްލި ނުރައްކަލުގެ ހާލަތުގައި ސަރުކާރުން ކަންކަން މެނޭޖުކުރި ގޮތުގެ ވާހަކަތައް މިއަދާއި ހަމަޔަށް ދައްކަމުން އައިސްފައިވާއިރު، އަދި އެކަންކަން ފާހަގަކޮށް ރައީސް ޞާލިހަށް އެމަނިކުފާނުގެ އަރިސް ބޭފުޅުން ތައުރީފު ކުރައްވަމުންދާއިރު، އެ ވާހަކަތައް އެ މޭރުމުން ދައްކައިގެން ދެވަނަ ދައުރެއް، ނުވަތަ ރައްޔިތުންގެ ވޯޓެއް ނުލިބޭނެކަމަށް ނަޝީދު ވަނީ ވިދާޅުވެފަ އެވެ. 

އެކަން ކަން ފާހަގަކުރައްވާ ރައީސް ނަޝީދު ވިދާޅުވީ އިންތިޚާބުތަކުގައި ރައްޔިތުންނަށް ބުނެދޭންވީ ދެން އަންނަ ވެރިކަމެއްގައި ވާން އޮތް ކަންކަމުގެ ވާހަކަ ކަމަށެވެ. އިންތިޚާބުގެ ނަތީޖާ ބިނާވަނީ ރައްޔިތުން އޮތް އުންމީދުތަކުގެ މައްޗަށްކަމަށް ނަޝީދު ވިދާޅުވި އެވެ. 

އެއާއެކު ނަޝީދު ވިދާޅުވީ ދަ ޑިމޮކްރެޓްސްއިން ވެރިކަމަށް ނިކުތީ ރައްޔިތުންގެ އުންމީދުތައް ފުރިހަމަކޮށްދިނުމަށް ކަމަށެވެ. ވައްކަމާއި ކޮރަޕްޝަނާއި ދުރު، ރައްޔިތުން ބޭނުންވާ ފަހި ދިރިއުޅުން ހޯދައި ދިނުމަށް ކަމަށެވެ. 

އެހެންކަމުން މި އިންތިޚާބުގައި އިލިޔާސް ދެވަނަ ބުރަށް ދާނެ ކަމަށާއި، އަދި އެމްޑީޕީގެ ގިނަ މެމްބަރުންގެ ވޯޓު ވެސް ދަ ޑިމޮކްރެޓްސްއަށް ލިބިގެންދާނެކަމަށް ނަޝީދު ވިދާޅުވި އެވެ.