މި އުފާވެރި މިނިވަން ދުވަހު، ދިވެހި ކޮންމެ ރައްޔިތަކު ވެސް އަޒުމު ކަނޑައަޅަންވީ މިނިވަންކަމާއި އިސްތިގްލާލް ފުރިހަމަ ގޮތުގައި ދެމެހެއްޓުމަށް ކަމަށް ޖުމުހޫރީ ޕާޓީ (ޖޭޕީ) ގެ ލީޑަރު އަދި ރައްޔިތުންގެ މަޖިލިހުގެ މާމިގިލީ ދާއިރާގެ މެމްބަރު ގާސިމް އިބްރާހިމް މިއަދު ވިދާޅުވެއްޖެއެވެ.

ފަހުރުވެރި މިނިވަން ދުވަހުގެ ތަހްނިޔާ އާއި ހެޔޮ އެދުންތައް، ދިވެހި ރައްޔިތުންނަށް އަރިސް ކުރައްވާ ގާސިމް ކުރެއްވި ޓްވީޓެއްގައި ވަނީ މި އުފާވެރި ދުވަހުގައި ހަމަކޮންމެ ދިވެހި ރައްޔިތަކު އަޒުމު ކަނޑައަޅަންވީ ކާބަފައިން އަޅުގަނޑުމެންނާއި ހަމައަށް ވާސިލް ކޮށްދިން މިނިވަންކަމާއި އިސްތިގްލާލް އޭގެ ފުރިހަމަ ގޮތުގައި ދަމެހެއްޓުމަށް ކަމަށް ވިދާޅުވެފައެވެ.

" އެ ބަތަލުން ދެއްކެވި ފަދަ އަޒުމާއި، ކެރުމާއި، މޫރިތިކަން އަލުން މި ގައުމުގައި ދިރުވައި އާލާކޮށް މާދަމާގެ ޖީލަށް ނަމޫނާ ދެއްކޭތޯ އަވަސް ވެގަތުމަށް އަޒުމު ކަނޑައަޅަން ޖެހޭ." ގާސިމް ވިދާޅުވިއެވެ.

Advertisement

މިއަދަކީ ދިވެހިރާއްޖޭގެ މިނިވަންކަމަށް 58 އަހަރުފުރޭ 59ވަނަ މިނިވަންދުވަހެވެ. 

ދިވެހިރާއްޖޭގެ މިނިވަން ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެވެސް ޖުލައިމަހުގެ 26 ވަނަ ދުވަހެވެ. ދިވެހިރާއްޖެއަށް ފުރިހަމަ މިނިވަންކަން ލިބިފައި ވަނީ 26 ޖުލައި 1965 ގައެވެ.