ގދ. ރަތަފަންދޫ ކައުންސިލްގެ މެޖޯރިޓީ އެމްޑީޕީއަށް ގެއްލިއްޖެއެވެ.
މިކަން އިއުލާނު ކުރައްވައި އެސްޓީއޯގެ ކުރީގެ މެނޭޖިން ޑިރެކްޓަރު ހުސެން އަމްރު ކުރެއްވި ޓުވީޓެއްގައި ވިދާޅުވީ ރަތަފަންދޫ ކައުންސިލްގެ ނައިބު ރައީސް އަމާނީ މުއީން ދަ ޑިމޮކްރެޓްސް އާ ގުޅިވަޑައިގަނެފައިވާ ކަމަށެވެ. އެއާއެކު އެމްޑީޕީއަށް އެ ރަށުގެ ކައުންސިލްގެ މެޖޯރިޓީ ގެއްލިފައިވާ ކަމަށްވެސް އަމްރު ވިދާޅުވި އެވެ.
އަމާނީ ދަ ޑިމޮކްރެޓްސް އަށް ސޮއި ކުރެއްވުމުން ރަތަފަންދޫ ކައުންސިލްގެ 5 މެންބަރުންގެ ތެރެއިން އެމްޑީޕީ މެންބަރުންގެ ގޮތުގައި މިހާރު ތިބީ 2 މެންބަރުންނެވެ. އަނެއް ދެ މެންބަރުންނަކީ މިނިވަން ކެންޑިޑޭޓުންނެވެ.
މީގެ ކުރިން ވެސް ބ. ގޮއިދޫގެ ދެ ކައުންސިލަރަކު ޑިމޮކްރެޓްސް އަށް ސޮއިކުރުމުން އެ ރަށުގެ ކައުންސިލް މެޖޯރިޓީވެސް ވަނީ އެމްޑީޕީއަށް ގެއްލިފައެވެ. އަދި ކުޅުދުއްފުށީ ސިޓީ ކައުންސިލް ގެ ހުރިހާ މެންބަރުން އެކުއެކީ ޑިމޮކްރެޓްސް އަށް ސޮއި ކުރުމުންގެ އެ ކައުންސިލްގެ ވެސް މެޖޯރިޓީ އެއްކޮށް އެމްޑީޕީއަށް ގެއްލުނެވެ.
އެމްޑީޕީގެ ކުރީގެ ރައީސް މުހައްމަދު ނަޝީދުގެ ވަފާތެރި މެންބަރުން އުފައްދަވާފައިވާ ދަ ޑިމޮކްރެޓްސް އަށް މިހާރު އެމަނިކުފާނު ވެސް ވަނީ ސޮއި ކުރައްވާފައެވެ. އެގޮތުން އެކަމަށްޓަކައި ޚާއްސަ ޖަލްސާ އެއްވެސް ބޭއްވިފައިވާ އިރު، އެ ޖަލްސާގައި ވާހަކަ ދައްކަވަމުން ރައީސް ނަޝީދު ވިދާޅުވެފައިވަނީ އެމްޑީޕީ ރޫޅާލާނެކަމަށެވެ.
Advertisement
This content is created and paid for by advertisers and does not involve Voice Journalists
