ދިވެހި ދިދައިގެ ނިދާ އަކީ ކުރިއަށް އޮތް ދައުރަށް، ރައީސުލްޖުމްހޫރިއްޔާ ކަމުގެ ހުވާ، އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ކުރެއްވުން ކަމަށް ކ އަތޮޅު ކައުންސިލްގެ ރައީސް މުހައްމަދު ނިމާލް ވިދާޅުވެއްޖެއެވެ. 

ނިމާލް ފޭސްބުކް ގައި ލިޔުއްވާފައިވާ ޕޯސްޓެއްގައި ވިދާޅުވީ، މިވަގުތު ރައީސް ޔާމީން ޖަލުގައި ހުންނެވި ނަމަވެސް، މާތް الله ރަހުމަތާއި އެކު އެމަނިކުފާނަށް އިންސާފު ލިބި ޖަލުން މިނިވަންވެ ވަޑައިގަންނަވާނެ ކަމަށެވެ. އަދި މި ގައުމަށް ހެޔޮއެދޭ ކޮންމެ ދަރިއަކުވެސް ރައީސް ޔާމީނަށް އިންސާފު ލިބުމަށް އެދޭނެ ކަމަށް ނިމާލް ވިދާޅުވި އެވެ. 

މިއާއެކު ރައީސް ޔާމީނަށް ތައުރީފު އޮއްސަވާލައްވަމުން ނިމާލް ވިދާޅުވީ، މިދިވެހި ފަސްގަނޑުގެ މުސްތަގުބަލަށްޓަކައި ރައީސް ޔާމީން ވެވަޑައިގަންނަވަމުންދަނީ މަތިވެރި ގުރުބާނީއެއް ކަަމަށެވެ. 

"ޚުއްބުލް ވަތަންގެ ސިފަތަކުން މިއަދުގެ ޖީލަށް މަނިކުފާނު ތިޔަ ދައްކަވަމުންދަނީ މަތިވެރި ގައުމީ ލޯބީގެ އަގުހުރި ފިލާވަޅުތަކެއް. އަނިޔާވެރިންގެ މަކަރުވެރި ރޭވުންތަކުގެ ކުރިމަތީގައި، މަނިކުފާނު ކުޑަކަކޫ މައްޗަށް ތިރި ނުކުރެވޭނެ ކަން މިއަދުގެ ދިރިތިބީން ގަބޫލު ކޮށްފި. ތިޔައީ ހިތްވަރުފުޅުގަދަ، އަޒުމް ފުޅު ވަރުގަދަ، ދިވެހި ދަރިއެއް." ނިމާލް ވިދާޅުވިއެވެ. 

މިއާއެކު ނިމާލް ވިދާޅުވީ މި އަހަރުގެ ރިޔާސީ އިންތިހާބު ވެގެން ދާނީ، ރައީސް ޔާމީން، ދިވެހިރާއްޖޭގެ ވަލިއްޔުލް އަމްރު ކަމުގައި ހަވާލުވެވަޑައިގަންނަވާނެ އިންތިޚާބަކަށް ކަމަށާ، މުޅި ދިވެހި ގައުމުވެސް އޮތީ އެމަނިކުފާނު ވެރިކަމަށް އިންތިޚާބު ކުރުމުގެ އަޒުމުގައި ކަމަށެވެ. އަދި ދިވެހި ދިދައިގެ ނިދާ އަކީ ވެސް އެއީ ކަމަށް އޭނާ ވިދާޅުވި އެވެ.