ކުރީގެ ރައީސް މައުމޫން އަބްދުލް ގައްޔޫމް އުފެއްދެވި މައުމޫން ފައުންޑޭޝަން އުވާލަން ނިންމައިފިއެވެ.

ދިވެހިރާއްޖޭގައި ރަޖިސްޓަރީ ކޮށްގެން ހިންގަމުންދާ ޖަމްއިއްޔާތަކުގެ ތެރެއިން ލިޔެކިޔުންތައް ފުރިހަމަނުވާ ޖަމްއިއްޔާތައް އުވާލަން ނިންމާ އެ ޖަމްއިއްޔާތަކުގެ ލިސްޓް މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވާމަންޓް އިން އާންމު ކޮށްފައިވާއިރު އޭގެ ތެރޭގައި މައުމޫން ފައުންޑޭޝަން ގެ އިތުރުން ގިނަ ސިޔާސީ މީހުންގެ ފައުންޑޭޝަން ތައްވެސް ހިމެއެވެ. 

މައުމޫން ފައުންޑޭޝަން ހިންގަން ފެށީ ރައީސް މައުމޫންގެ ވެރިކަން ނިމުނު ފަހުންނެވެ. އޭގެ ފަހުން އެ ފައުންޑޭޝަންއިން ދިޔައީ އިޖުތިމާއި އެކި ކަންކަމަށް މަސައްކަތް ކުރަމުންނެވެ.

އެގޮތުން އެ ޖަމިއްޔާ މެދުވެރިކޮށް ވަނީ ދިވެހި ޒުވާނުންނަށް މަތީ ތައުލީމުގެ ފުރުސަތުތައް ހޯދައި ދިނުމުގެ ގޮތުން، ސްކޮލަޝިޕްތަކެއް ވެސް ދީފައެވެ.

ސިޔާސީ މީހުންގެ ޖަމިއްޔާ ތަކުގެ އިތުރުން ދީނީ ގިނަ ޖަމިއްޔާތައްވެސް އުވާލާ ލިސްޓުގައި ހިމެނެއެވެ. އޭގެ ތެރޭގައި، މިހާރުވެސް ގިނަ ދީނީ ހަރަކާތްތައް ހިންގަމުންދާ ޖަމްޢިއްޔަތުއް ސަލަފް ވެސް ހިމެނެއެވެ. 

ޔޫތު މިނިސްޓްރީން ކުރި އިއުލާނުގައިވަނީ 2023 ވަނަ އަހަރުގެ ނިޔަލަށް ވިދިވިދިގެން 2 އަހަރުގެ އަހަރީ ރިޕޯޓް ހުށަހަޅާފައި ނުވާތީ ނުވަތަ ހިންގާ ކޮމެޓީ ރަޖިސްޓްރީ ކޮށްފައި ނުވާތީ 1989 ޖަމިއްޔާ އުވާލުމަށް ނިންމާފައިވާ ކަމަށެވެ.

އަދި މި ޖަމްޢިއްޔާތަކުގެ ތެރެއިން އެ ޖަމްޢިއްޔާއެއް އުވާލުން ހުއްޓުވައިދިނުމަށް އެދޭ ޖަމިއްޔާ ތަކުން، އެ ޖަމްޢިއްޔާގެ މެންބަރަކަށް ނުވަތަ މަޞްލަޙަތު އޮތް ތިންވަނަ ފަރާތަކަށް ޖަމްޢިއްޔާތަކުގެ ރަޖިސްޓްރާރ އަށް ލިޔުމުން ހުށަހެޅުމުގެ ފުރުޞަތު 24 ސެޕްޓެމްބަރ 2023 ވާ އަންގާރަ ދުވަހުގެ 14:00 އާއި ހަމައަށް އޮތްކަމުގައި ކަމަށްވެސް ޔޫތު މިނިސްޓްރީން ބުނެފައިވެއެވެ. 

ޔޫތު މިނިސްޓްރީން ބުނީ، 24 ސެޕްޓެމްބަރު ގެ ނިޔަލަށް ލިޔުމުން ހުށަނާޅާ ޖަމްޢިއްޔާތައް، ޖަމްޢިއްޔާތަކުގެ ރަޖިސްޓްރީން އެ ޖަމްޢިއްޔާގެ ނަން އުނިކުރެވޭނެ ކަމަށެވެ.