ޑެންގީ ހުމާއި ބޭރަށް ހިންގުން މާލޭގައި އިންތިހާއަށް އިތުރުވެ، ގިނަ ބަޔަކު ހޮސްޕިޓަލްތަކުގައި އެދުމަތި ކުރަމުން ދިޔަ ނަމަވެސް، މިނިވަންދުވަހާއި ގުޅިގެން ހޯމް މިނިސްޓްރީން ކުރިއަށް ގެންދާ ހަރަކާތައް ކެންސަލް ނުކޮށް ކުރިއަށް ގެންދާނެ ކަމަށް އެ އިދާރާއިން ބުނެފިއެވެ. 

ހޮޑުލުމާއި ބޭރަށް ހިނގުން ކުއްލިއަކަށް އިތުރުވެ، އެބަލި ފެތުރޭ ސަބަބު ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިހާރު ވަނީ ބަލަން ފަށާފައެވެ. 

މި ބަލި، މާލޭ ސަރަހައްދުގައި ބާރު މިނެއްގައި އިތުރުވެ، އޭޑީކޭ ހޮސްޕިޓަލުގެ އިތުރުން އައިޖީއެމްއެޗްގެ އެމަޖެންސީ ރޫމުވެސް ފުރިފައިވާ ކަމަށް މައުލޫމާތު ލިބެއެވެ. މާލޭގެ އިތުރުން ހުޅުމާލޭގައިވެސް ރޯގާ ޖެހޭ ކުޑަކުދިންގެ އަދަދު އިތުރުވެ، ހުޅުމާލޭ ހޮސްޕިޓަލަށްވެސް ވަރަށް ބާރު ބޮޑުވެފައިވާ ކަމަށް މައުލޫމާތު ލިބެއެވެ. 
ހުޅުމާލޭ ހޮސްޕިޓަލަށް ގެންދާ ކުޑަކުދިންގެ އަދަދު އިތުރުވި ނަމަވެސް، އެތަނުގައި ހިދުމަތް ދެމުން އަންނަނީ އެންމެ ކައުންޓަރަކުން ކަމަށްވާތީ ފަރުވާ ނުލިބި ގިނަ އިރުވާކަމުގެ ޝަކުވާ ވެސް ބައެއް ފަރާތް ތަކުން އަންނަނީ ކުރަމުންނެވެ. 

Advertisement

މާލެ ސަރަހައްދުގައި ފެތުރެމުންދާ މި ބަލި މަޑު ކަމާއި ގުޅުގެން ރާއްޖޭގައި ނަން މަޝްހޫރު ޑޮކްޓަރުންވެސް އަންނަނީ ކަންބޮޑުވުން ފާޅުކުރަމުންނެވެ. އަދި ބަލިން ރައްކާތެރި ވުމުގެ ފިޔަވަޅުތައް އެޅުމަށް އެ ފަރާތްތަކުން އަންނަނީ ނަސޭހަތްތެރިވަމުން ނެވެ. 

މާލޭގައި މިފަދަ ބޮޑު ބަލިމަޑުކަމެއް ފެތުރި، ޑޮކްޓަރުން ކަންބޮޑުވުން ފާޅުކުރަމުންދާއިރުވެސް، މިނިވަންދުވަހާއި ގުޅުވައި މިރޭ ބޭއްްވުމަށް ހަމަޖެހިފައިވާ ހަރަކާތްތައް ވެސް ކުރިއަށް ދާނެ ކަމަށް ހޯމް މިނިސްޓްރީން ވަނީ ބުނެފަ އެވެ. 

އެގޮތުން، މިނިވަންދުވަހުގެ ހަރަކާތްތަކުގެ ތެރޭގައި ހިމެނޭ ފުޅަނދުތައް އާންމުންނަށް ދައްކާލުން މިރޭ 8:30 އިން ފެށިގެން ހުޅުމާލެ ސެންޓްރަލް ޕާކުގައި ކުރިއަށްދާނެ ކަމަށް އެ މިނިސްޓްރީން ބުނެއެވެ.

އަދި މިނިވަންއުފާ ކާނިވާ މިރޭ 8:30 ގައި ހުޅުވުމަށްވެސް ވަނީ ހަމަޖެހިފައިވާ ކަމަށާ ކާނިވާ ހުޅުއްވައި ދެއްވާނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ކަމަށް އެ މިނިސްޓްރީން ބުނެފައިވެއެވެ.

މީގެ އިތުރުން 29 ޖުލައިގެ ހަވީރާއި ރޭނގަނޑުވެސް ފުޅަނދުތައް ދައްކާލުން އޮންނާނެ ކަމަށް ހޯމް މިނިސްޓްރީން މައުލޫމާތު ދެއެވެ.