ދިވެހިރާއްޖޭގެ 58 ވަނަ މިނިވަން ދުވަހުގެ މުނާޞަބަތުގައި މިރޭ ހުޅުވަން ހަމަޖެހިފައި އޮތް "މިނިވަން އުފާ" ކާނިވާ ހުޅުވުން ފަސްކޮށްފި އެވެ. 

މިނިވަންދުވަހާއި ގުޅުވައި މިރޭ ބޭއްްވުމަށް ހޯމް މިނިސްޓްރީން ނިންމާފައި އޮތީ ފުޅަނދުތައް އާންމުންނަށް ދައްކާލުމާއި މިނިވަން ކާނިވާ ހުޅުވުމެވެ. އެގޮތުން ފުޅަނދުތައް އާންމުންނަށް ދައްކާލުން އޮތީ މިރޭ 8:30 އިން ފެށިގެން ހުޅުމާލެ ސެންޓްރަލް ޕާކުގައެވެ. މީގެ އިތުރުން 29 ޖުލައިގެ ހަވީރާއި ރޭނގަނޑުވެސް ފުޅަނދުތައް ދައްކާލުން އޮންނާނެ ކަމަށް ހޯމް މިނިސްޓްރީން މައުލޫމާތު ދެއެވެ. 

އަދި މިނިވަންއުފާ ކާނިވާ ހުޅުވުން އޮތީ މިރޭ 8:30 ގައެވެ.  ކާނިވާ ހުޅުއްވައި ދެއްވާން ހަމަޖެހިފައި އޮތީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު އެވެ. 

Advertisement

އެހެންނަމަވެސް، މިހާރު ފެތުރެމުންދާ ހޮޑާއި ބޭރަށް ހިންގުން ރޯގާ އާއި ގުޅިގެން، ކާނިވާ ހުޅުވުން ފަސް ކުރުމަށް އެޗްޕީއޭ އިން ލަފާ ދީފައިވާ ކަމަށާ، އެހެންކަމުން އެ ހަރަކާތް ފަސް ކުރެވިފައިވާ ކަމަށް ހޯމް މިނިސްޓްރީން ވަނީ ބުނެފަ އެވެ. 

މީގެ އިތުރުން ހޯމް މިނިސްޓްރީން ބުނީ، ކާނިވާ ހުޅުވާނެ އިރެއް ފަހުން އެންގޭނެ ކަމަށެވެ. 

މާލެ ސަރަހައްދުގައި ފެތުރެމުންދާ ބަލި މަޑު ކަމާއި ގުޅިގެން ހޮސްޕިޓަލު ތަކަށް ބާރު ބޮޑުވެފައި ވާއިރު ޑޮކްޓަރުން އަންނަނީ ކަންބޮޑުވުން ފާޅުކުރަމުންނެވެ. އަދި ބަލިން ރައްކާތެރި ވުމުގެ ފިޔަވަޅުތައް އެޅުމަށް އެ ފަރާތްތަކުން އަންނަނީ ނަސޭހަތްތެރިވަމުން ނެވެ.